لاہور: (ویب ڈیسک) پنجاب کابینہ نے 56 کمپنیوں کے نمک کی کان کنی کے لائسنس منسوخ کرنے کی منظوری دے دی۔
نگران وزیراعلیٰ پنجاب محسن نقوی کی زیرصدارت کابینہ اجلاس ہوا، جس میں 56 کمپنیوں کے نمک کی کان کنی کے لائسنس منسوخ کرنے کا فیصلہ کیا گیا، پنجاب کابینہ نے لائسنس منسوخی کی منظوری بھی دیدی ہے۔
اجلاس میں کہا گیا کہ خلاف ضابطہ لائسنس جاری کر کے خزانے کو نقصان پہنچایا گیا، کان کنی کیلئے لائسنس کا اجرا اوپن آکشن کے ذریعے کیا جائے گا، پنجاب کی نئی ترمیم شدہ راک سالٹ پالیسی کی منظوری دے دی گئی۔
طلباء و طالبات کیلئے بڑا ریلیف
اجلاس میں اورنج لائن میٹرو ٹرین، میٹرو بس سروس پر سفر کرنے والے طلباء و طالبات کیلئے بڑے ریلیف کا اعلان کیا گیا ہے۔
صوبائی کابینہ اجلاس میں کہا گیا کہ یونیفارم پہنے طلباء و طالبات کو اورنج لائن میٹرو ٹرین، میٹرو بس پر مفت سفر کی سہولت ہوگی۔
سرکاری دفاتر میں بجلی کے کم استعمال کی ہدایت
نگران وزیراعلیٰ پنجاب نے سرکاری دفاتر میں بجلی کے استعمال میں کمی لانے کی ہدایت کی، تمام محکموں کو توانائی بچت پالیسی پر عملدرآمد کی ہدایت کرتے ہوئے سیکرٹریز سے بجلی کے استعمال کے حوالے سے رپورٹ طلب کر لی۔
محسن نقوی نے سول سیکرٹریٹ اور دیگر محکموں کو پیپر لیس کرنے کاحکم دیتے ہوئے کہا کہ محکموں کو پیپر لیس کرنے کیلئے پلان مرتب کیا جائے، سمریوں کو کم سے کم وقت میں نمٹایا جائے۔
پنجاب کابینہ: 56 کمپنیوں کے نمک کی کان کنی کے لائسنس منسوخ کرنے کی منظوری
