بھمبر(نیوز ایجنسیاں)جنگی جنون میں مبتلا بھارت سرکار باز نہ آئی ، کنٹرول لائن کے بھمبر سیکٹر کے علاقے باروہ میں بھارتی افواج نے گزشتہ رات فائرنگ کر کے شہری آبادی کو نشانہ بنایا ۔ فائرنگ سے ایک خاتون زخمی ہوگئی ، پاک فوج کی جانب سے دشمن کو بھرپور جواب دیا گیا ۔ آئی ایس پی آر کے مطابق بھارتی فوج نے ایک بار پھر رات گئے بھمبر سیکٹر کے علاقے باروہ میں بلااشتعال فائرنگ کی ۔ بھارتی افواج نے شہری آبادی کو نشانہ بنایا ۔ فائرنگ سے ایک خاتون زخمی ہو گئی ۔ پاک فوج کی جانب سے دشمن کو بھرپور جواب دیا گیا ۔ موثر جواب پر بھارتی بندوقیں خاموش ہو گئیں ۔ آئی ایس پی آر کے مطابق پاک فوج ہر قسم کی مہم جوئی کا جواب دینے کے لئے تیار ہے ۔ گزشتہ ماہ کے دوران بھارتی فوج نے چندروٹ ، نکیال ، بروہ اور خنجر کے مقامات پر آر پی جی سیون اور آٹو میٹک گرنیڈ لانچر سے بلااشتعال فائرنگ کی جس کامنہ توڑ جواب دیا گیا ۔
