ممبئی: بالی ووڈ کے مسٹر پرفیکشنسٹ عامر خان اور ماضی کی سُپر ہٹ فلم ‘تارے زمین پر’ کے چائلڈ اسٹار درشیل سفارے کا اشتہار سوشل میڈیا وائرل ہوگیا جس میں اداکار نے منفرد کردار ادا کیے ہیں۔
حال ہی میں عامر خان کی چند تصاویر سوشل میڈیا پر وائرل ہوئی تھیں جن میں اداکار کو منفرد کرداروں میں دیکھا گیا تھا، ان تصاویر پر تبصرے کرتے ہوئے مداحوں کا کہنا تھا کہ یہ شاید عامر خان کی نئی آنے والی فلم ‘ستارے زمین پر’ کی جھلکیاں ہیں۔
تصاویر دیکھ کر مداح کافی پُرجوش ہوگئے تھے کیونکہ ان میں سے ایک تصویر میں عامر خان کے ساتھ ‘تارے زمین پر’ کے چائلڈ اسٹار درشیل سفارے بھی موجود تھے۔
اب درشیل سفارے نے مداحوں کے انتظار کو ختم کرتے ہوئے اپنے آفیشل انسٹاگرام اکاؤنٹ پر عامر خان اور اپنے نئے اشتہار کی ویڈیو پوسٹ کی ہے، یہ اشتہار سافٹ ڈرنک کے لیے بنایا گیا ہے۔
اشتہار میں عامر خان کو بوڑھے آدمی کے روپ سے لیکر جنگلی آدمی، پائلٹ اور خلاباز کے روپ میں دیکھا جاسکتا ہے جبکہ درشیل سفارے اشتہار میں عامر خان کے پوتے بنے ہوئے ہیں۔
یہ اشتہاری ویڈیو دیکھ کر مداح خوش تو ہوئے لیکن یہ سوال بھی کررہے ہیں کہ عامر خان اور درشیل سفارے دوبارہ ایک ساتھ فلم میں کب نظر آئیں گے؟
واضح رہے کہ عامر خان اب اپنی نئی فلم ‘ستارے زمین پر’ میں نظر آئیں گے، فلم کی شوٹنگ کا آغاز ہوگیا ہے اور اس فلم میں بھی اُن کے ساتھ ایک مرتبہ پھر فلم ‘تارے زمین پر’ کے چائلڈ اسٹار درشیل سفارے جلوہ گر ہوں گے۔
فلم ‘ستارے زمین پر’ میں عامر خان کے ساتھ اداکارہ جینیلیا دیش مکھ مرکزی کردار میں نظر آئیں گی، وہ عامر خان کی محبت کا کردار نبھائیں گی اور اپنے مرکزی کردار کو ابنارمل بچوں کی ٹریننگ کیلئے سپورٹ مہیا کریں گی۔
