اسلام آباد: سیکریٹری تجارت کا کہنا ہے کہ چین کے ساتھ گدھوں کی کھال پر بات طے پا گئی ہے البتہ گدھوں کے گوشت پر بات ہو رہی ہے۔
سینیٹ کی تجارت کمیٹی کے اجلاس میں سیکریٹری تجارت نے قائمہ کمیٹی کو بریفنگ میں بتایا کہ گدھے کی ایکسپورٹ پر کوئی پابندی نہیں ہے اور اگر کوئی گدھے ایکسپورٹ کرنا چاہے تو کر سکتا ہے، پاکستان میں گدھے کی فارمنگ بھی کی جاتی ہے۔
سیکریٹری تجارت نے مزید بتایا کہ دنیا کے 70 ممالک میں ہمارے ٹریڈ افسران تعینات ہیں اور ٹریڈ سے متعلق باڈیز کی ریگولیشن کی جاتی ہے۔ تنزانیہ اور موزمبیق میں نئے ٹریڈ مشن کھولنے جا رہے ہیں جبکہ مشرقی یورپ میں ہماری کوریج کم تھی اس کو بڑھا رہے ہیں، سنگاپور اور اورنچی میں ٹریڈ دفاتر کھولیں گے، ویتنام ویلیو ایڈ سے پانچ ارب ڈالرز سے زائد کما رہا ہے۔
کمیٹی کی چیئرپرسن سینیٹر انوشہ رحمان نے کہا کہ مصر اور ویتنام دو ممالک میں مزید کام کی ضرورت ہے، ان دونوں ممالک میں بھارت مارکیٹ پر قابض ہے۔
سیکریٹری تجارت نے بتایا کہ کرومچی سے ہم چین کے ساتھ دوطرفہ ٹریڈ کر رہے ہیں، ازبکستان اور قازقستان کے ساتھ بھی ٹریڈ کر رہے ہیں، ویتنام کی فرنیچر انڈسٹری 40 ارب ڈالر تک پہنچ چکی ہے۔
سینیٹر ذیشان خانزادہ کا کہنا تھا کہ ان ممالک کے پاس پاکستان کو دینے کو بہت کچھ ہے لیکن ہمارے پاس ان ممالک کو دینے کے لیے کیا ہے۔
بجٹ 2024-25 پر چیئرپرسن کمیٹی نے کہا کہ موجودہ بجٹ غیر معمولی تھا کسی نے خوشی کے ساتھ نہیں بنایا۔
سیکریٹری تجارت نے بتایا کہ پاکستان جی سی سی کے ساتھ بڑا تجارتی معاہدہ کرنے جا رہا ہے، معاہدے میں سرمایہ کاری کو بھی دیکھا جائے گا، چین کے ساتھ فوڈ سے متعلق 12 مصنوعات پرٹوکول طے پا گئے ہیں۔
