آرمی چیف نے افغانیوں کو اہم پیغام دیدیا۔۔۔

راولپنڈی(این این آئی) چیف آف آرمی سٹاف جنرل قمر جاوید باجوہ نے کہا ہے کہ مجھے ہر پاکستانی کی طرح ہر افغان شہری بھی بہت عزیز ہے ، مجھے کسی افغان شہری کے دہشتگردی کا نشانہ بننے پر اتنا ہی دکھ ہوتا ہے جتنا کسی پاکستانی کیلئے محسوس کرتا ہوں۔جمعہ کو آئی ایس پی آر کے مطابق افغانستان کے صحافیوں کا 13 رکنی وفد پاکستان کے دورے پر آیا ہوا ہے وفد میں افغانستان کے معروف میڈیا اداروں سے تعلق رکھنے والے صحافی شامل ہیں ۔ وفد کے ارکان نے وزارت خارجہ ، وزارت سیفران ، وزارت تجارت، ہائر ایجوکیشن کمیشن، ہیڈ کوارٹر ایف سی خیبر پختونخوا، این ایس اے اور آئی ایس پی آر کا دورہ کیا ۔ دورے کا مقصد افغان میڈیا کو دہشتگردی ’ جو کہ دونوں برادر ممالک کیلئے مشترکہ خطرہ ہے ،کیخلاف جنگ کے حوالے سے پاکستان کی کوششوں کے بارے میں آگاہی فراہم کرنا تھا۔ وفد کے ارکان نے جمعہ کو پاک فوج کے شعبہ تعلقات عامہ آئی ایس پی آر کا دورہ کیا اس موقع پر پاکستانی میڈیا کے نمائندے بھی موجود تھے ۔ ڈائریکٹر جنرل آئی ایس پی آر نے پاک افغان سرحد اور اس حوالے سے پاکستانی کوششوں کے بارے میں وفد کو تفصیلی بریفنگ دی ۔ وفد کے ارکان کو دیگران وزارتوں کے سربراہوں کی جانب سے بھی بریفنگ دی گئی جن کا انہوں نے دورہ کیا ۔ ڈائریکٹر جنرل آئی ایس پی آر نے برطانیہ میں افغان ڈیفنس اتاشی کے ساتھ چیف آف آرمی سٹاف جنرل قمر جاوید باجوہ کے دورہ برطانیہ کے موقع پر ہونیوالی ملاقات کی تفصیلات سے بھی آگاہ کیا ۔ آرمی چیف نے افغان ڈیفنس اتاشی سے ملاقات کے دوران اپنے خیالات کا اظہار کرتے ہوئے کہا کہ مجھے ہر پاکستانی کی طرح ہر افغان شہری بھی بہت عزیز ہے ۔ مجھے کسی افغان شہری کے دہشتگردی کا نشانہ بننے پر اتنا ہی دکھ ہوتا ہے جتنا کسی پاکستانی کیلئے محسوس کرتا ہوں۔بیان کے مطابق وفد کے دورے سے پاکستان کی جانب سے خطے میں امن اور استحکام کیلئے کی جانیوالی کوششوں اور نکتہ نظر کو افغان میڈیا کے ذریعے سمجھنے میں مدد ملے گی ۔فریقین نے اس بات پر اتفاق کیا کہ دہشتگردی کی لعنت نے دونوں ممالک کو متاثر کیا ہے اور الزام تراشی کی بجائے باہمی اعتماد کی بنیاد پر وسیع تر تعاون کی ضرورت ہے ۔