بھارتی ریاست مدھیہ پردیش میں اپنی نوعیت کا ایک انوکھا واقعہ پیش آیا جہاں گاؤں کے ایک شہری نے صرف ایک لڈو ملنے پر براہِ راست وزیر اعلیٰ کی ہیلپ لائن پر شکایت درج کروا دی۔
بھارتی میڈیا کے مطابق یہ واقعہ بھارت کے یومِ آزادی سے متعلق جاری تقریبات کے دوران گرام پنچایت بھون میں پیش آیا جہاں ایک تقریب کے شرکاء میں مٹھائی تقسیم کی گئی، جب گاؤں کے رہائشی کملیش کشواہا کی باری آئی تو اِنہیں ایک ہی لڈو دیا گیا، کشواہا نے فوراً دوسرے لڈو کا مطالبہ کرتے ہوئے کہا کہ ان کے ساتھ بیٹھے شخص کو دو لڈو ملے ہیں لیکن انہیں منع کر دیا گیا۔
بھارتی میڈیا کے مطابق دوسرا لڈو نہ ملنے پر کملیش کشواہا ناراض ہوگئے اور پنچایت بھون کے باہر سے ہی وزیراعلیٰ کی ہیلپ لائن نمبر پر کال کر کے شکایت درج کروا دی۔
اپنی تحریری شکایت میں کشواہا نے لکھا کیا کہ آزادی کے موقع پر مٹھائیوں کی تقسیم درست طریقے سے نہیں ہوئی اور اس معاملے پر کارروائی کی جانی چاہیے۔
بھارتی میڈیا کے مطابق پنچایت کے سیکریٹری رویندر سریواستو نے اس واقعے کی تصدیق کرتے ہوئے بتایا کہ شہری باہر سڑک پر کھڑا تھا، اسے ایک لڈو دیا گیا لیکن اس نے دو پر اصرار کیا، انکار پر اس نے شکایت درج کروا دی۔
بھارتی میڈیا کے مطابق شکایت موصول ہونے کے بعد پنچایت نے معاملے کو رفع دفع کرنے کے لیے غیر معمولی قدم اٹھاتے ہوئے فیصلہ کیا ہے کہ مارکیٹ سے ایک کلو مٹھائی خرید کر شکایت کنندہ کو دے کر اس سے معافی مانگی جائے گی۔
