اسلام آباد (نیوز رپورٹر) چیئرمین سینیٹ رضا ربانی نے لیگی سینیٹر نہال ہاشمی کی درخواست پرانکا استعفیٰ قبول نہیں کیا۔ نجی ٹی وی کے مطابق پاناما لیکس کے حوالے سے اداروں کیخلاف متنازع تقریر کرنے والے نواز لیگ کے سینیٹر نہال ہاشمی نے پارٹی قیادت کے کہنے پر استعفیٰ دیا اور پھر چیئرمین سینیٹ کے پاس جا کر تردید کر دی جس کے بعد انکا استعفیٰ منظور نہیں کیا جا سکا۔ چیئرمین سینیٹ رضا ربانی نے رولنگ دیتے ہوئے کہا کہ نہال ہاشمی نے سیکریٹری سینیٹ کے دفتر میں آکراستعفیٰ پیش کیا اور مجھے یکم جون کو آرڈر جاری کرنے کی فائل دی گئی۔ سیکرٹری سینیٹ نے بتایا کہ سینیٹر نے استعفیٰ دیگرافراد کے ہمراہ جمع کرایا اور میں نے نہال ہاشمی کو 5 جون کو اپنے چیمبرمیں یہ دیکھنے کیلئے طلب کیا کہ استعفیٰ رضاکارانہ اور دستخط اصل ہیں۔ چیئرمین سینیٹ نے بتایا کہ سینیٹر نہال ہاشمی 6 جون کو دفتر آئے اور آکر استعفیٰ واپس لینے کی درخواست دی جس پر انکی درخواست منظور کرتے ہوئے استعفیٰ نامنظور کیا گیا۔
