(ویب ڈیسک)سعودی عرب کی وزارتِ صحت نے عازمین حج کیلئے حج ویکسینیشن سے متعلق اہم ہدایات جاری کردیں۔
سعودی عرب کی وزارتِ صحت اور پبلک ہیلتھ اتھارٹی نے بیماریوں کی ایک فہرست جاری کی ہے جو جسمانی معذوری کے باعث عازمین کو حج اجازت نامہ جاری کرنے سے روک سکتی ہیں۔
سعودی خبر رساں ادارے کی رپورٹ کے مطابق سعودی وزارت صحت کا کہنا ہے کہ حج کی ادائیگی کے لیے جسمانی صحت کا بحال ہونا اہم ہے،ایسی بیماریاں جن کی وجہ سے جسمانی صحت کو خطرہ لاحق ہوتا ہے، ان میں گردوں کا فیل ہونا اور جس کے لیے ڈائیلاسز کی ضرورت ہوتی ہے، ہارٹ فیل، جگر کا سروسس، شدید دماغی امراض، بہت زیادہ عمراورڈیمنشیا کے علاوہ حاملہ خواتین جن کی زچگی میں آخری تین ماہ میں باقی ہوں شامل ہیں۔وزارتِ صحت نے زور دیا ہے کہ عازمین حج صحت کی ضروریات کو پورا کریں جو انہیں آسانی اور آرام سے مناسک ادا کرنے کے قابل بنائے۔
رپورٹس کے مطابق عازمین کے لیے اس سال حج پر آنے سے قبل گردن توڑ بخار سے بچاؤ کی ویکیسین لگوانا لازمی ہے،اس کے علاوہ انتہائی کمزور گروپوں میں تجویز کردہ ویکسینیشن میں کووڈ 19 کی ویکسین بھی شامل ہے، ایسے عازمین جن کی عمر 65 اور اس سے زیادہ ہو جبکہ حاملہ خواتین جنہوں نے جنوری 2025 سے قبل کورونا ویکیسین لگوائی تھی انہیں چاہیے کہ وہ بوسٹر ڈوز بھی لگوائیں۔
اس سال عازمین حج کے لیے سیزنل انفلوئنزا ویکسین بھی شامل ہے، اگر انہوں نے ستمبر 2025 سے قبل ویکسین لگوائی تھی تو انہیں چاہیے کہ فلو کی بوسٹر ڈوز ضرور حاصل کریں۔
سعودی وزارت صحت کے مطابق حج ویکسینیشن عازمین کی سیفٹی، اچھی صحت اور پرسکون حج کے لیے ضروری قدم ہے۔
