قومی کرکٹر محمد رضوان کی جانب سے نیشنل سائبر کرائم انویسٹی گیشن ایجنسی (NCCIA) کو بھیجے گئے تحریری جواب کا متن سامنے آگیا ہے، جس میں انہوں نے اپنی طلبی کی وجہ اور موبائل فون واپس نہ کیے جانے سے متعلق سوالات اٹھائے ہیں۔
ذرائع کے مطابق محمد رضوان نے کورئیر کے ذریعے NCCIA کو جواب ارسال کیا۔ خط میں انہوں نے پوچھا کہ انہیں کس معاملے میں طلب کیا گیا اور اس کی وجہ کیا ہے؟ رضوان نے یہ بھی سوال کیا کہ ان کا موبائل فون اب تک واپس کیوں نہیں کیا گیا۔
محمد رضوان نے اپنے خط میں مزید استفسار کیا کہ ”میں نے کون سی ڈسپلن کی خلاف ورزی کی ہے، مجھے بتایا جائے۔“ انہوں نے ادارے سے اپنی طلبی کی وجوہات اور مبینہ خلاف ورزی کی وضاحت مانگی ہے۔
واضح رہے کہ محمد رضوان اور امام الحق کو انگلینڈ کے دورے کے دوران مبینہ ڈریسنگ روم لیکس اور ان کے موبائل فونز سے حاصل ہونے والی معلومات کی تحقیقات کے سلسلے میں NCCIA نے طلب کیا تھا۔ دونوں کرکٹرز لاہور میں ایجنسی کے سامنے پیش بھی ہو چکے ہیں اور تحریری جواب جمع کرانے کے لیے مزید وقت طلب کیا تھا۔
ابھی تک رضوان کے خلاف کسی مخصوص ڈسپلن کی خلاف ورزی حتمی طور پر ثابت ہونے یا حتمی سزا کا اعلان سامنے نہیں آیا۔ تحقیقات جاری ہیں
