حرمین شریفین پر کسی جارحیت کو برداشت نہیں کیا جائے گا:علماء ومشائخ

سرگودھا (این این آئی) علما و مشائخ نے کہا کہ حرمین شریفین پر کسی جارحیت کو برداشت نہیں کیا جائے گا اس کا تحفظ ہمیں اپنی جانوں سے زیادہ عزیز ہے جس کی حفاظت کے لئے پوری امت مسلمہ متحد ہے۔ ان کا کہنا تھا کہ عظمت ناموس رسالت و اصحاب رسول اور تحفظ ختم نبوت کا دفاع ہمارے ایمان کا جز اول ہیں’ جس سے نونہالان وطن کو روشناس کرنا ہم سب کی ذمہ داری ہے اس لئے بچوں کو دین اور دنیا کی تعلیم سے آراستہ کرکے انہیں اچھا شہری بنایا جائے۔ ذرائع کے مطابق جمعیت اشاعت التوحید والسنہ کے صوبائی رہنما علامہ عطا اللہ بندیالوی، مرکزی جمعیت اہلحدیث پاکستان کے ایڈیشنل ناظم اعلی علامہ سید سبطین شاہ نقوی، انٹرنیشنل ختم نبوت پنجاب کے صدر قاری احمد علی ندیم، مرکزی اتحاد العلما کے ضلعی صدر قاضی نگاہ مصطفے جنرل سیکرٹری مولانا ملک ضیا الحق، نائب صدر چوہدری محمد ندیم، سیکرٹری اطلاعات شیخ نعیم طاہر، چیف آرگنائزر شفقت اقبال للہ، رابعہ مسجد کے خطیب پروفیسر فضل الحق بندیالوی، مسجد حامد علی شاہ کے خطیب مولانا احمد حسن چشتی اور دیگر نے کہا کہ حرمین شریفین پر کسی جارحیت کو برداشت نہیں کیا جائے جس کا تحفظ ہمیں اپنی جانوں سے زیادہ عزیز ہے جس کی حفاظت کے لئے پوری امت مسلمہ متحد ہے۔