ادویات کی رجسٹریشن کے لیےڈرگ روگولیٹری اٹھارٹی نے طریقہ کارعوام کے سامنے رکھ دی

اسلام آباد( عادل عباسی)عالمی ادارہ صحت کی گائیڈ لائنز کی روشنی میں ڈرگ ریگولیٹری اتھارٹی پاکستان نے اہم اقدام کرتے ہوئے ادویات کی رجسٹریشن کے طریقہ کار سے متعلق رہنما دستاویز پہلی بار عوامی سطح پر جاری کر دی۔ڈرگ ریگولیٹری اتھارٹی پاکستان کے مطابق رہنما دستاویز میں ادویات کی رجسٹریشن کے مختلف راستوں، مراحل اور طریقہ کار کی وضاحت کر دی گئی ہے، جبکہ درخواست گزاروں کو رجسٹریشن کے لیے درکار ضروری معلومات اور دستاویزات پہلے سے فراہم کرنے سے متعلق رہنمائی بھی شامل کی گئی ہے۔اتھارٹی کا کہنا ہے کہ اس اقدام کا بنیادی مقصد ادویات کی رجسٹریشن کے عمل میں شفافیت، اعتماد اور مستقل مزاجی کو فروغ دینا ہے۔ نئی رہنمائی کے ذریعے دوا ساز کمپنیوں اور درخواست گزاروں کو درخواستیں مکمل اور درست انداز میں جمع کرانے میں سہولت فراہم کی جائے گی، جس سے رجسٹریشن کے عمل میں غیر ضروری تاخیر اور ابہام کو کم کرنے میں مدد ملے گی۔ڈرگ ریگولیٹری اتھارٹی کے مطابق رہنما دستاویز کی تیاری میں عالمی ادارہ صحت کے متعلقہ اصولوں اور معیارات کو مدنظر رکھا گیا ہے۔ اتھارٹی کا کہنا ہے کہ اس رہنمائی کے ذریعے پاکستان میں ادویات کی رجسٹریشن کے طریقہ کار کو عالمی معیار کے مزید قریب لانے میں مدد ملے گی۔رہنما دستاویز میں رجسٹریشن کے مختلف مراحل کے حوالے سے واضح معلومات فراہم کی گئی ہیں تاکہ درخواست گزاروں کو یہ معلوم ہو سکے کہ درخواست جمع کراتے وقت کون سی معلومات اور دستاویزات درکار ہوں گی۔ حکام کے مطابق اس سے رجسٹریشن کے عمل کو زیادہ منظم اور قابل فہم بنانے میں مدد ملے گی۔ڈرگ ریگولیٹری اتھارٹی کا کہنا ہے کہ شفاف اور واضح رجسٹریشن نظام کے نتیجے میں معیاری ادویات کی بروقت دستیابی میں بھی بہتری آئے گی، جبکہ دوا ساز اداروں کو رجسٹریشن کے تقاضوں کو سمجھنے اور ان پر عمل درآمد کرنے میں آسانی ہوگی۔اتھارٹی کے مطابق ادویات کی رجسٹریشن کے عمل میں شفافیت لانا ایک اہم اقدام ہے، جس کے ذریعے درخواست گزاروں، دوا ساز کمپنیوں اور متعلقہ اداروں کے درمیان اعتماد کو مزید مضبوط کیا جا سکے گا۔ رہنما دستاویز عالمی ادارہ صحت کے اصولوں سے ہم آہنگ ضابطہ کار کی جانب ایک اہم پیش رفت قرار دی جا رہی ہے۔