لاہور(مانیٹرنگ ڈیسک)نائب امیر جماعت اسلامی پاکستان لیاقت بلوچ نے کہا ہے کہ پیٹرولیم لیوی اور دیگر ٹیکسوں کے خلاف 25ستمبر کو لاہور میں جلسہ عام کیا جائے گا، جس میں حافظ نعیم لانگ مارچ کے لائحہ عمل کا اعلان کریں گے، پرامن احتجاج ہر سیاسی جماعت کا آئینی حق ہے اور اسلام آباد حکمرانوں کی جاگیر نہیں۔منصورہ لاہور میں پریس کانفرنس کرتے ہوئے لیاقت بلوچ نے کہا کہ حکومت کی یقین دہانی پر لانگ مارچ اکتوبر تک موخر کردیا گیا ہے تاہم ملتان سے لاہور اور پھر اسلام آباد تک مارچ کی تیاریاں جاری ہیں، بجلی اور گیس کی قیمتیں عوام کے لیے ناقابل برداشت ہوچکی ہیں، جبکہ پیٹرولیم لیوی نے بھی اضافی بوجھ ڈال دیا ہے عالمی منڈی میں تیل کی قیمتوں میں کمی بیشی ہوسکتی ہے لیکن 107 روپے فی لیٹر لیوی قابل قبول نہیں۔انہوں نے حکومت سے مطالبہ کیا کہ آئی ایم ایف معاہدے کے دائرہ کار میں رہتے ہوئے پیٹرولیم لیوی ختم کیا جائے، آئی پی پیز سے ہونے والی بچت عوام کو منتقل کی جائے اور غیر ترقیاتی اخراجات میں کمی کی جائے، جماعت اسلامی نے معاشی بہتری کے لیے پالیسی ریٹ 9 فیصد تک لانے سمیت چھ تجاویز حکومت کو دی ہیں۔
جماعت اسلامی
