غیرملکی خاتون سے اجتماعی زیادتی واقعہ’اہم پیشرفت سامنے آگئی

لاہور (کرائم رپورٹر) ڈیفنس سی میں آذربائیجان سے تعلق رکھنے والی غیر ملکی خاتون ڈیانا سے مبینہ اجتماعی زیادتی کے واقعہ کی تحقیقات میں اہم پیش رفت سامنے آئی ہے۔ پولیس نے مبینہ واردات میں استعمال ہونے والی سفید رنگ کی گاڑی برآمد کرکے تحویل میں لے لی جبکہ واقعہ کے شبہ میں تین افراد کو حراست میں لے کر تفتیش شروع کر دی گئی ہے۔ پولیس ذرائع کے مطابق متاثرہ خاتون کا میڈیکل معائنہ کروا لیا گیا ہے تاہم طبیعت بہتر ہونے اور ہوش میں آنے کے بعد اس کا تفصیلی بیان قلمبند کیا جائے گا۔ میڈیکل رپورٹ سے واقعہ کے حوالے سے مزید حقائق سامنے آنے کی توقع ہے۔ ابتدائی تحقیقات کے مطابق ملزمان نے مبینہ طور پر خاتون کو ٹریپ کرکے لے جانے کے لیے سفید رنگ کی گاڑی استعمال کی جو مبینہ ملزم تنویر کی ملکیت بتائی جارہی ہے۔ پولیس نے گاڑی مرکزی ملزم کے ایک رشتہ دار کے گھر سے برآمد کی جبکہ مذکورہ رشتہ دار بھی فرار ہے اس کے علاوہ پولیس نے مبینہ زیادتی میں ملوث دو افراد کی شناخت کرلی ہے جن کے نام محسن اور تنویر بتائے گئے ہیں جبکہ تیسرے شخص کی شناخت تاحال نہیں ہوسکی۔ ملزمان کے نام مبینہ طور پر سٹاپ لسٹ میں بھی شامل کیے گئے ہیں۔ پولیس کا کہنا ہے کہ اب تک تین افراد کو حراست میں لیا گیا ہے جنہیں ڈیفنس اور ایک نجی ہائوسنگ سوسائٹی سے حراست میں لیا گیا۔ حراست میں لیے گئے افراد مبینہ ملزمان کے رشتہ دار اور سہولت کار بتائے جارہے ہیں، تاہم پولیس کی جانب سے ان کے کردار کا تعین تفتیش کے بعد کیا جائے گا۔ ایس پی کینٹ عاصم افتخار کی سربراہی میں خصوصی ٹیم تشکیل دی گئی ہے جو مبینہ ملزمان کی گرفتاری کے لیے مختلف مقامات پر چھاپے مار رہی ہے۔ پولیس کے مطابق دیگر ملزمان کو بھی جلد گرفتار کرنے کی کوششیں جاری ہیں۔ پولیس ذرائع کے مطابق واقعہ جمعہ اور ہفتہ کی درمیانی شب پیش آیا۔ تحقیقات میں متاثرہ خاتون کی ٹریول ہسٹری بھی سامنے آئی ہے جس کے مطابق وہ رواں سال مارچ اور مئی میں دو مرتبہ پاکستان آچکی تھی جبکہ تقریبا پندرہ روز قبل تیسری مرتبہ لاہور پہنچی۔ دستاویزات کے مطابق ڈیانا4 مارچ کو فلائٹ نمبر HY461 کے ذریعے تاشقند سے لاہور پہنچی جبکہ 20 مارچ کو فلائٹ نمبر J2146 کے ذریعے جاوید نامی شخص کے توسط سے باکو، آذربائیجان واپس گئی’ 22 مئی کو وہ فلائٹ نمبر PA469 کے ذریعے دوبارہ پاکستان آئی اور اس مرتبہ راشد علی کے پاس قیام کیا۔ پولیس ذرائع کا مزید کہنا ہے کہ غیر ملکی خاتون جوہر ٹائون اور ڈیفنس کے مختلف کیفے میں بھی جاتی رہی جبکہ اس کی سوشل میڈیا سرگرمیوں کے حوالے سے بھی معلومات اکٹھی کی جارہی ہیں۔ خاتون کی پنجاب اسمبلی میں موجودگی کی تصاویر اور اس کے ٹک ٹاک اکائونٹ سے متعلق مواد بھی پولیس کی تحقیقات کا حصہ بنایا گیا ہے۔ پولیس حکام کے مطابق واقعہ کے تمام پہلوئوں سے تفتیش کی جارہی ہے، متاثرہ خاتون کا بیان، میڈیکل رپورٹ، گاڑی سے حاصل ہونے والے شواہد اور دیگر دستیاب شواہد کی روشنی میں مقدمے کو آگے بڑھایا جائے گا۔