انسپکٹر جنرل نیشنل ہائی ویز اینڈ موٹروے پولیس سلطان احمد چوہدری کی ہدایت پر پنجاب بھر میں ہائی بیم لائٹس کے خلاف خصوصی مہم جاری ہے۔ موٹروے پولیس کے ترجمان کے مطابق مرکزی ریجن میں ہائی بیم لائٹس استعمال کرنے والے ڈرائیورز کے خلاف کارروائی کی جا رہی ہے۔
ترجمان کے مطابق لاہور اسلام آباد موٹروے M-2، لاہور سیالکوٹ موٹروے اور M-3 پر ہائی بیم لائٹس کے خلاف کارروائیاں جاری ہیں، جبکہ M-4 پندی بھٹیاں اور M-5 ملتان سکھر موٹروے پر بھی خصوصی آگاہی مہم چلائی جا رہی ہے۔
موٹروے پولیس کا کہنا ہے کہ ہائی بیم لائٹس کی تیز روشنی سامنے سے آنے والے ڈرائیورز کی بینائی کو شدید متاثر کرتی ہے، جس کے باعث انہیں سڑک، موڑ یا رکاوٹ بروقت نظر نہ آنے کا خطرہ بڑھ جاتا ہے۔
موٹروے پولیس نے شہریوں سے اپیل کی ہے کہ سامنے سے کوئی گاڑی آنے کی صورت میں فوری طور پر ہائی بیم لائٹس بند کرکے ڈِپ لائٹس استعمال کریں تاکہ سفر محفوظ بنایا جا سکے۔
