راولپنڈی(خصوصی رپورٹر)سابق امیر جماعت اسلامی پاکستان سراج الحق نے اسلامک سرکل آف سدرن افریقہ (ICSA) کی دعوت پر جنوبی افریقہ کا دورہ مکمل کر لیا،سراج الحق نے اپنے قیام کے دوران جنوبی افریقہ کے مختلف شہروں کا دورہ کیا اور اسلامک سرکل آف سدرن افریقہ کے زیر اہتمام منعقدہ کنونشنز، اجتماعات اور دیگر پروگراموں میں شرکت کی۔ ان کے دورے میں لیڈی سمتھ، ہارٹس واٹر، کیپ ٹان، کوئینز ٹان، کنگ ولیمز ٹان، ایسٹ لندن، پریٹوریا لوڈیم اور جوہانسبرگ سمیت مختلف شہر شامل تھے۔مختلف اجتماعات سے خطاب کرتے ہوئے سراج الحق نے اسلامی تعلیمات، امت مسلمہ کو درپیش چیلنجز، باہمی اتحاد، دعوت و اصلاح اور معاشرے میں مسلمانوں کے مثبت کردار کی اہمیت پر گفتگو کی۔ انہوں نے مقامی مسلم کمیونٹی کے مختلف طبقات سے ملاقاتیں بھی کیں اور ان کے مسائل، دینی و سماجی سرگرمیوں اور باہمی تعاون کے امور پر تبادلہ خیال کیا۔اسلامک سرکل آف سدرن افریقہ کے نومنتخب صدر ڈاکٹر فیاض حمید نے سراج الحق کے دورہ جنوبی افریقہ کو مسلم کمیونٹی کے ساتھ رابطے، فکری تبادلے اور دعوتی سرگرمیوں کے حوالے سے اہم قرار دیا۔ انہوں نے کہا کہ سراج الحق کی مختلف شہروں میں منعقدہ اجتماعات میں شرکت سے مقامی مسلم کمیونٹی کو دینی، فکری اور اصلاحی موضوعات پر رہنمائی حاصل ہوئی۔سراج الحق نے اپنے دورے کے دوران اسلامک سرکل آف سدرن افریقہ کے ذمہ داران، علما، کارکنان اور مقامی مسلم کمیونٹی سے ملاقاتیں کیں۔ دورہ مکمل ہونے کے بعد وہ عمرہ کی ادائیگی کے لیے سعودی عرب روانہ ہو گئے،
