راولپنڈی(سٹی رپورٹر)صدر بیرونی کے علاقہ سے خاتون کے 2 بچیوں سمیت اغوا کے مقدمہ میں اہم پیشرفت، صدر بیرونی پولیس کی موثر تفتیش، خاتون کو قتل کر کے نعش دفنانے والا ملزم گرفتار، پولیس نے خاتون کی دونوں بچیوں کو بھی بحفاظت بازیاب کر لیا۔ تفصیلات کے مطابق صدر بیرونی کے علاقہ سے خاتون کے 2 بچیوں سمیت اغوا کے مقدمہ میں اہم پیشرفت، صدر بیرونی پولیس نے موثر تفتیش کرتے ہوئے خاتون کو قتل کر کے نعش دفنانے والے ملزم کو گرفتارکرلیا، پولیس نے خاتون کی دونوں بچیوں کو بھی بحفاظت بازیاب کر لیا، ملزم خاتون کا دیور ہے، جس نے دیگر افراد کے ساتھ مل کر خاتون کو قتل کیا اور ثبوت مٹانے کے لیے گڑھا کھود کر دفنا دیا، ابتدائی تحقیقات کے مطابق قتل کا محرک جائیداد کا لالچ ہے تاہم مزید تفتیش جاری ہے، ملزم کی نشاندہی پر خاتون کی نعش برآمد کر کے پوسٹمارٹم کے لئے ہسپتال منتقل کی گئی ہے، ملزم کے دیگر ساتھیوں کی گرفتاری کے لئے خصوصی ٹیمیں تشکیل دے کر ریڈز کئے جا رہے ہیں، ایس پی صدر انعم شیر کا کہناتھاکہ واقعہ میں ملوث تمام ملزمان کو گرفتار کر کے قانون کے کٹہرے میں کھڑا کیا جائے گا، ملزم کتنا بھی شاطر کیوں نہ ہو قانون کی گرفت سے نہیں بچ سکتا۔
