دارالعلوم سراجیہ نعیمیہ کے زیراہتمام 41ویں سالانہ سیرت النبی ۖ کانفرنس آج ہوگی

لاہور (این این آئی)دارالعلوم سراجیہ نعیمیہ کے زیراہتمام 41ویں سالانہ سیرت النبی ۖ کانفرنس برائے خواتین آج(بدھ)30 ستمبر کو الحمرا  ہال نمبر ایک، مال روڈ لاہور میں منعقد ہوگی۔ کانفرنس کی صدارت ناظمہ دارالعلوم سراجیہ نعیمیہ نبیرہ عندلیب نعیمی کریں گی، جبکہ مختلف شعبہ ہائے زندگی سے تعلق رکھنے والی ممتاز خواتین، دینی و علمی شخصیات اور مختلف سیاسی و مذہبی جماعتوں کی رہنما خواتین کانفرنس سے خطاب کریں گی۔کانفرنس سے مسلم لیگ کی رہنما شازیہ کامران،عظمیٰ زعیم قادری، جماعت اسلامی کی رہنما ڈاکٹر سمیحہ راحیل قاضی اور تحریک منہاج القرآن کی رہنما لبنیٰ مشتاق خطاب کریں گی۔ اس کے علاوہ ڈاکٹر لبنیٰ ظہیر، ڈاکٹر بصیرہ عنبرین، ڈاکٹر حافظہ سعدیہ، ڈاکٹر پروین اور ڈاکٹر ناہید بخاری بھی سیرت النبی ۖ کے مختلف پہلوؤں پر اظہار خیال کریں گی۔کانفرنس میں خواتین کی دینی، تعلیمی اور معاشرتی ذمہ داریوں، سیرت النبی ۖ کی روشنی میں خواتین کے کردار اور عصر حاضر میں اسلامی تعلیمات کی ضرورت و اہمیت سمیت مختلف موضوعات پر مقررین اپنے خیالات کا اظہار کریں گی۔سالانہ سیرت النبی ۖ کانفرنس میں لاہور کے مختلف دینی مدارس اور تعلیمی اداروں سے وابستہ ناظمات اور خواتین کی بڑی تعداد کی شرکت کرے گی۔ جامعہ عرفہ للبنات، جامعہ عائشہ صدیقہ، جامعہ تعلیم القرآن، جامعہ باغ مدینہ، جامعہ محمدیہ فریدیہ، جامعہ حنفیہ نظامیہ رضویہ، جامعہ کشف العلوم، جامعہ نعمانیہ اور جامعہ غوثیہ سمیت دیگر مدارس کی ناظمات بھی کانفرنس میں شرکت کریں گی۔ کانفرنس کے اختتام پر ملکی سلامتی، استحکام، امت مسلمہ کے اتحاد اور امن و سلامتی کے لیے خصوصی دعا بھی کی جائے گی۔