پنجاب حکومت کی سی ڈی ڈی میں نیا کائونٹر نیریٹوونگ قائم کرنیکا فیصلہ

لاہور (این این آئی) پنجاب حکومت نے کائونٹر ٹیرر ازم ڈیپارٹمنٹ (سی ٹی ڈی) میں نیا  کائونٹر نیریٹو ونگ قائم کرنے کا فیصلہ کرلیا۔ کائونٹر نیریٹو اینڈ کاگنیٹو سکیورٹی ونگ کے قیام کی منظوری دے دی گئی ہے جبکہ نئے ونگ کے لیے 120 نئی آسامیوں پر بھرتیوں کی بھی منظوری دی گئی ہے۔ منصوبے کے تحت پروجیکٹ ڈائریکٹر، ڈپٹی ڈائریکٹرز اور سینئر اینالسٹس کی بھرتی کی جائے گی۔ او ایس آئی این ٹی اور ڈارک ویب اینالسس کے ماہرین بھی نئے ونگ کا حصہ ہوں گے۔ اس کے علاوہ ڈیجیٹل میڈیا منیجرز، سوشل میڈیا اسٹرٹیجسٹس، فیکٹ چیکنگ سپیشلسٹس اور کنٹینٹ رائٹرز بھی بھرتی کیے جائیں گے۔ نئے ونگ کے لیے 40 فیلڈ کوآرڈی نیٹرز سمیت دیگر معاون عملے کی بھرتی کی بھی منظوری دی گئی ہے۔ کائونٹر نیریٹو ونگ کے لیے سالانہ 49 کروڑ 21 لاکھ روپے کے بجٹ کی منظوری دی گئی ہے جبکہ اس منصوبے پر مجموعی طور پر 3 ارب روپے سے زائد لاگت آئے گی۔ نیا ونگ ڈیجیٹل پروپیگنڈے اور ریاست مخالف بیانیے سے نمٹنے پر توجہ دے گا جبکہ ڈیجیٹل پلیٹ فارمز پر معلومات کے تجزیے اور فیکٹ چیکنگ بھی کرے گا۔