فصائی آلودگی میں تشویشناک حد تک اصافہ سموگ نے خطرے کی گھنٹی بجا دی

ملتان (نامہ نگار خصوصی ) پنجاب کے بیشتر بڑے شہروں میں موسمِ سرما کے باقاعدہ آغاز سے قبل ہی فضائی آلودگی تشویشناک حد تک بڑھنے لگی،ائیر کوالٹی انڈیکس ریڈ پوائنٹ سے متجاوز ہوکر 200 AQi کو چھو گیا۔ ماہرین ماحولیات نے ستمبر،اکتوبر کے حالیہ ہفتہ وار ائیر کوالٹی انڈیکس کے پیش نظرصوبہ کے بڑے شہروں میں قبل از وقت سموگ پھیلنے کے خطرے کا الارم بجا دیا۔ ستمبر اور اکتوبر کے پہلے ہفتہ کے دوران فضائی آلودگی میں تیزی سے اضافہ ریکارڈ ہونے کی بڑی وجہ کارخانوں،اینٹوں کے روایتی بھٹوں اور گاڑیوں کے دھویں کے اخراج کی مؤثر روک تھام نہ ہونا ہے۔ذرائع کے مطابق پنجاب انوائرمنٹل پروٹیکشن ایجنسی کے فضائی آلودگی کے حالیہ اعداد و شمار پر پنجاب حکومت کے حکام نے سموگ کے خطرات کم کرنے کے لئے سر جوڑ لئے ہیں۔رپورٹ کے مطابق لاہور کا ایئر کوالٹی انڈیکس اکتوبر کے آغاز ہی میں 295 AQi کی ہفتہ وار بلند ترین سطح تک پہنچا ہے جو ”انتہائی غیر صحت بخش ” کیٹیگری ہے۔ ملتان سمیت جنوبی پنجاب کے متعدد شہروں میں ستمبر اور اب تک اکتوبر کے دوران AQI کی سطح 200 سے تجاوز کر گئی ہے، حالانکہ سرما سیزن ابھی باقاعدہ شروع نہیں ہوا ہے۔محکمہ ماحولیات کے کروڑوں روپے فنڈز کی لاگت سے گزشتہ سال سے شروع انسداد سموگ آپریشن کے باوجود پنجاب بھر کے متعدد شہروں میں فضائی آلودگی کی غیر صحت بخش اور خطرناک سطح ریکارڈ کی جا رہی ہے، جس سے صوبائی ماحولیاتی حکام کی جانب سے اٹھائے جانے والے اقدامات سوالیہ نشان بن گئے ہیں۔پنجاب انوائرمنٹ پروٹیکشن ڈیپارٹمنٹ کے آفیشل ایئر کوالٹی انڈیکس (AQI) ڈیش بورڈ پر دستیاب تازہ ترین اعداد و شمار بتاتے ہیں کہ صوبے کے بیشتر حصوں میں آلودگی بدستور بلند ہے۔7 اکتوبر 2026 تک، ننکانہ صاحب میں پنجاب میں سب سے زیادہ AQI 367 تھا، جو ”انتہائی غیر صحت بخش ” کے زمرے میں آتا ہے، اس کے بعد ڈیرہ غازی خان میں 331 اور ملتان میں 290 ہے۔ بھکر میں AQI 232، میانوالی 215، خانیوال 219اور وہاڑی میں 217 ریکارڈ کیا گیا ہے۔
فضائی آلودگی