دنیا سے جوڑیں احسن اقبال نے 100 ارب ڈالر برآمدات کا عملی راستہ پیش کر دیا

اسلام آباد(نامہ نگار خصوصی )وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال نے پاکستان کی برآمدات 100 ارب ڈالر تک پہنچانے کے لیے اڑان پاکستان کے آٹھ شعبوں میں کلسٹر کی بنیاد پر ترقی، مکمل ویلیو چینز کی تشکیل اور عالمی سپلائی چینز سے مضبوط روابط کا عملی راستہ پیش کیا۔پاکستان انسٹی ٹیوٹ آف ڈویلپمنٹ اکنامکس، پائیڈ میں پاکستان سوسائٹی آف ڈویلپمنٹ اکنامسٹس کی 39ویں سالانہ کانفرنس کا افتتاح کرتے ہوئے انہوں نے کہا کہ پاکستان کی معاشی خودمختاری اپنی ترقی کے وسائل خود کمانے کی صلاحیت سے وابستہ ہے۔انہوں نے کہا: ہم ایسا پاکستان کیسے تعمیر کریں جو اپنی خوشحالی خود کمائے، اپنی ترقی کے وسائل خود پیدا کرے اور اپنی معاشی تقدیر کے فیصلے خود کرے؟ ہمارا جواب ہے: مشن 100 ارب ڈالر برآمدات!خطے کی دیگر معیشتوں کے ساتھ تقابلی جائزہ پیش کرتے ہوئے احسن اقبال نے بتایا کہ کیلنڈر سال 2024 میں پاکستان کی مصنوعات کی برآمدات تقریبا 32.3 ارب ڈالر تھیں، جبکہ بنگلہ دیش کی 47.2 ارب ڈالر، ملائیشیا کی 330.4 ارب ڈالر اور ویتنام کی 404.8 ارب ڈالر تھیں۔ انہوں نے واضح کیا کہ ان اعداد میں خدمات کی برآمدات شامل نہیں ہیں۔وفاقی وزیر نے کہا کہ پاکستان معاشی استحکام کی حفاظت کرتے ہوئے پیداواری صلاحیت اور عالمی مقابلے کی استعداد بڑھا کر زرمبادلہ کے بار بار پیدا ہونے والے دبا سے نکل سکتا ہے۔انہوں نے ایسے برآمدی کلسٹرز کی تشکیل پر زور دیا جو پیداوار دینے والے اداروں کو خصوصی سپلائرز، ہنرمند کارکنوں، جامعات، جانچ کی تجربہ گاہوں، مالی وسائل، رسد و ترسیل اور بین الاقوامی خریداروں سے جوڑیں۔انہوں نے کہا: کلسٹر تعمیر کریں۔ ویلیو چین مضبوط کریں۔ اسے دنیا سے جوڑیں۔یہ طریقہ زراعت، صنعت، خدمات، انفارمیشن ٹیکنالوجی، معدنیات، افرادی قوت و مہارتوں، بحری معیشت اور تخلیقی صنعتوں میں اختیار کرنے کی ضرورت ہے۔ انہوں نے کہا کہ ہر کلسٹر کی حکمتِ عملی عالمی خریدار کی ضروریات سے شروع ہو اور سرمایہ کاری، تربیت، بنیادی ڈھانچے اور معیار کو متعلقہ منڈی کے تقاضوں سے ہم آہنگ کرے۔احسن اقبال نے زور دیا کہ عالمی سپلائی چینز میں شرکت سے پاکستانی سپلائرز ترقی کریں، ملک کے اندر زیادہ معاشی قدر پیدا ہو اور بہتر روزگار کے مواقع بڑھیں۔ انہوں نے سی پیک کے اگلے مرحلے میں بنیادی ڈھانچے اور خصوصی اقتصادی زونز کو برآمدی پیداوار سے جوڑنے کے مواقع بھی اجاگر کیے۔پالیسی کے تسلسل کی اہمیت بیان کرتے ہوئے انہوں نے کہا: پاکستان کے برآمدی آرڈر کا مستقبل کسی حکومت کے سیاسی مستقبل کا محتاج نہیں ہونا چاہیے۔وفاقی وزیر نے پائیڈ اور کانفرنس کے شرکا کو آٹھوں شعبوں میں عملی کلسٹر اور ویلیو چین لائح عمل تیار کرنے کی دعوت دی، جن میں ترجیحی مصنوعات، ہدفی منڈیوں، صلاحیتوں کی کمی، ذمہ دار اداروں، لاگت اور مدتِ تکمیل کی واضح نشاندہی ہو۔ انہوں نے حکومتی مفروضوں کو چیلنج کرنے اور بہتر فیصلوں میں مدد دینے والی آزاد تحقیق کا خیرمقدم کیا۔انہوں نے کہا کہ اس مشن کی اصل کامیابی عوام کی زندگیوں میں بہتری ہوگی۔اس مشن کی کامیابی کا اصل پیمانہ یہ ہوگا کہ پاکستان کی پیداواری اور مسابقتی صلاحیت بڑھنے سے کتنے پاکستانیوں کی زندگی بہتر ہوتی ہے۔