دہلی گیٹ پیرا فورس کی غفلت کی وجہ سے تضاوزات کی بھر مار ٹریفک نظام درہم برہم

لاہور (محمد کامران سے) دہلی گیٹ میں تجاوزات کی بھرمار نے شہریوں کی آمدورفت متاثر کر دی جبکہ ٹریفک کی بدنظمی کے باعث پیرا فورس کی مبینہ غفلت اور عملی کارکردگی پر سوالات اٹھنے لگے۔ اہم گزرگاہ پر تجاوزات کے باعث راستوں کی دستیابی متاثر ہونے اور ٹریفک کی روانی میں رکاوٹوں کی شکایات سامنے آرہی ہیں تاہم صورتحال پر قابو پانے کے لیے موثر اقدامات کی ضرورت ہے۔ شہری حلقوں کے مطابق چھٹی کے روز دہلی گیٹ کے راستے نسبتا کھلے دکھائی دیتے ہیں جبکہ معمول کے دنوں میں ٹریفک کا دبائو اور تجاوزات آمدورفت میں مشکلات پیدا کرتے ہیں۔ اس صورتحال نے پیرا فورس کی نگرانی، تجاوزات کے خلاف کارروائی اور روزمرہ بنیادوں پر انتظامی اقدامات کے حوالے سے اہم سوالات کھڑے کر دیئے ہیں۔ تجاوزات کے خاتمے کی ذمہ داری متعلقہ اداروں پر عائد ہوتی ہے، ایسے میں سوال پیدا ہوتا ہے کہ دہلی گیٹ جیسے اہم مقام پر مستقل بنیادوں پر کارروائی کیوں یقینی نہیں بنائی جارہی؟ اگر چھٹی کے روز راستے کھلے رکھنا ممکن ہے تو عام دنوں میں بھی ٹریفک کی روانی برقرار رکھنے کے لیے موثر حکمت عملی کیوں اختیار نہیں کی جاتی۔ شہریوں نے اعلی حکام سے مطالبہ کیا ہے کہ دہلی گیٹ کی صورتحال کا فوری نوٹس لیا جائے، پیرا فورس کی کارکردگی کا جائزہ لیا جائے، تجاوزات کے خلاف بلاامتیاز کارروائی کی جائے اور روزانہ کی بنیاد پر نگرانی کا موثر نظام بنایا جائے تاکہ شہریوں کو ٹریفک کی مشکلات سے نجات ملے اور اہم گزرگاہ پر آمدورفت معمول کے مطابق بحال ہو سکے۔