ایم کیو ایم انٹرا پارٹی انتخابات کرانے میں ناکام’ الیکشن کمیشن کی ڈیڈ لائن ختم

کراچی(این این آئی)الیکشن کمیشن کی جانب سے مقرر کردہ ڈیڈ لائن گزرنے کے باوجود متحدہ قومی موومنٹ پاکستان (ایم کیو ایم) کے انٹرا پارٹی انتخابات نہیں ہوسکے۔ الیکشن کمیشن نے پارٹی کو انتخابات کرانے کے لیے 15 اکتوبر تک مہلت دی تھی، تاہم مقررہ مدت میں انتخابی عمل مکمل نہیں کیا جا سکا۔ذرائع کے مطابق اکتوبر میں سیاسی اور ملکی صورت حال کے باعث انتخابات کا انعقاد ممکن نہیں ہوسکا۔ ایم کیو ایم پاکستان کے رہنماؤں نے کہا کہ پارٹی کی اعلیٰ قیادت کی اسلام آباد میں مصروفیات کے باعث انتخابات کی تیاری نہیں ہوسکی۔اطلاعات کے مطابق پارٹی کے سربراہ ڈاکٹر خالد مقبول صدیقی انٹرا پارٹی انتخابات کے انعقاد کے لیے مزید مہلت حاصل کرنے کی غرض سے الیکشن کمیشن کو خط لکھیں گے۔ بتایا گیا ہے کہ خالد مقبول صدیقی اس سے قبل بھی الیکشن کمیشن سے تین مرتبہ مہلت حاصل کرچکے ہیں۔