لاہور (این این آئی) پاکستان مسلم لیگ (ن) کے سینئر رہنما خواجہ سعد رفیق نے کہا ہے کہ سنگین نوعیت کے مقدمات میں فوری انصاف اور بلا تاخیر فیصلوں کیلئے عدلیہ اور حکومت مل کر ٹھوس لائحہ عمل مرتب کریں ،سنگین جرائم کے مجرمان کو قانون کے شکنجے میں لانا ریاستی اداروں کا فرض ہے جبکہ مجرموں کے شفاف اور فوری عدالتی ٹرائل کے ذریعے انہیںسزائیں دینا عدلیہ کی ذمہ داری ہے ۔ اپنے بیان میں خواجہ سعد رفیق نے کہا کہ پاکستان میں نظام ِ عدل کے بریک ڈائون کی کیفیت پیدا ہو چکی ہے، انصاف کی فراہمی کیلئے غیر معمولی تاخیر اور بے پناہ رکاوٹیں ہیں ، مدعی یا متاثرہ فریق کی کوئی شنوائی ہے اور نہ انہیں کوئی تحفظ حاصل ہے ، عام آدمی کو انصاف نہیں مل رہا، نتیجہ قانون نافذ کرنے والے اداروں نے از خود عدالتی کردار سنبھال لیا ہے ، عدالتی عمل کے بغیر سزائیں معمول بن رہاہے ،یہ سلسلہ جاری رہا تو کوئی بھی اس سے محفوظ نہیں ر ہے گا ۔
