عبدالعلیم خان سے آذربائیجان کے نئے سفیر عرفان داوودوف کی ملاقات

اسلام آباد (این این آئی) وفاقی وزیر مواصلات عبدالعلیم خان نے کہا ہے کہ پاکستان چین کے راستے وسط ایشیائی ریاستوں سے تجارتی راہداریوں میں دلچسپی رکھتا ہے۔ تفصیلات کے مطابق وفاقی وزیر مواصلات عبدالعلیم خان سے پاکستان میں آذربائیجان کے نئے سفیر عرفان داوودوف نے ملاقات کی۔ پاکستان اور آذربائیجان کے مابین دوستانہ تعلقات مزید مستحکم بنانے کے عزم کا اظہار کیا گیا۔ وفاقی وزیر مواصلات نے عرفان داوودوف کا پاکستان میں تعیناتی پر خیر مقدم کرتے ہوئے مبارکباد دی اور ان کیلئے نیک خواہشات کا اظہار کیا۔ ملاقات میں دوطرفہ تعلقات کے فروغ پر تبادلہ خیال کیا گیا۔ پاکستان اور آذربائیجان کے درمیان مواصلات سمیت اقتصادی و تجارتی تعاون بڑھانے پر گفتگو کی گئی۔ وفاقی وزیر مواصلات عبدالعلیم خان نے کہاکہ پاکستان چین کے راستے وسط ایشیائی ریاستوں سے تجارتی راہداریوں میں دلچسپی رکھتا ہے۔