لاہور (افضل سیال سے) سی او ایم سی کلیم یوسف اور ایم او پی رائے امتیاز کی نااہلی اور کرپشن اور سرپرستی کی وجہ سے واہگہ زون کی حدود میں سب زیادہ غیرقانونی تعمیرات کا انکشاف ہوا ہے ‘ سرکاری خزانے کے کروڑوں روپے ڈوب گئے۔ عابد گارڈن، انڈیگو سوسائٹی، علی ٹائون جی ٹی روڈ’ جلو موڑ سمیت واہگہ زون کے مختلف یوسیز میں کمرشل، رہائشی اور خلاف نقشہ منظوری تعمیرات کی بھرمار ہے۔ روزنامہ خبریں کی ٹیم نے سروے کرتے ہوئے سی او کلیم یوسف اور ایم او پی رائے امتیاز کی نااہلی اور سرپرستی میں تعمیر ہونے والی دو درجن سے زائد تعمیرات کا کھوج لگا لیا۔ عابد گارڈن میں درجن بھر غیر قانونی تعمیرات اب بھی جاری ہیں جس سے سرکاری خزانے کو کروڑوں روپے کے نقصان کا سامنا ہے، اس کے علاوہ قائداعظم مین روڈ گجراں دا واڑہ، تین تعمیرات، نیوغوثیہ ملک کے ساتھ مین کمرشل روڈ پر بیسمنٹ سمیت دو کنال ، اجبارہ روڈ دروغہ والہ نقشبندی بازار کے سامنے درجن بھر تعمیرات جاری ہیں اس طرح سے دروغہ والہ علی ٹائون مین روڈ، آخری سٹاپ اورنج لائن ٹرین’ ہربنس پورہ مین روڈ پر تعمیرات جاری ہیں۔ برکی روڈ ضرار شہید ہسپتال کے ساتھ کمرشل بلڈنگز سمیت کئی درجن بغیر نقشہ منظوری تعمیرات جاری ہیں۔ واہگہ زون کی ہر یوسی میں متعلقہ افسران کی سرپرستی میں رشوت خور چھوٹے ملازمین پر مشتمل گینگ نے غیر قانونی تعمیرات کی بھرمار کروا رکھی جن کو سینئر افسران کی سرپرستی حاصل ہے۔ بیدیاں روڈ ، برکی روڈ ، انڈیگو سوسائٹی، عابد گارڈن ، حفیظ گارڈن جی ٹی روڈ اور رنگ روڈ کے ملحقہ آبادیوں میں ہائی رائز بلڈنگز سمیت بڑی بڑی بلڈنگز زیرتعمیر ہیں۔ ایم سی ایل کے شعبہ پلاننگ واہگہ زون کی تمام یوسیز اپنے فرنٹ مین عدنان، شبیر اور دانش کو ٹھیکے پر دے رکھی ہیں، افسران کی نااہلی اور رشوت خوری کی وجہ سے سرکاری خزانے کو کروڑوں روپے ڈوب گئے۔
