امریکہ’بھارت’ بوسنیا میں 4ہیلی کاپٹرز گرکر تباہ’13افراد ہلاک

واشنگٹن’ بھارت(آئی این پی )امریکا اور بوسنیا میں 3 ہیلی کاپٹرز گرکر تباہ ہوگئے جس کے نتیجے میں 7 افراد ہلاک اور متعدد زخمی ہوگئے ۔عالمی میڈیا رپورٹس کے مطابق امریکی ریاست اوریگن میں دو ہیلی کاپٹر فضا میں ٹکرا گئے۔ حادثے میں 3 افراد ہلاک ہوگئے۔ دونوں ہیلی کاپٹر تصادم کے بعد ایک شاہراہ کے قریب کھیت میں گر کر تباہ ہوگئے۔ ہلاک ہونے والوں میں 22 سالہ امریکی خاتون فلائٹ انسٹرکٹرایک برطانوی زیرِ تربیت پائلٹ اور دوسرے ہیلی کاپٹر میں سوار ایک شخص شامل ہے۔فضائی تصادم کی وجہ تاحال معلوم نہ ہوسکی۔ امریکی فیڈرل ایوی ایشن ایڈمنسٹریشن نے حادثے کی تحقیقات شروع کردی ہیں۔دوسری جانب بوسنیا میں اطالوی فوج کا سی ایچ فورٹی سیون چنوک ہیلی کاپٹر گر کر تباہ ہوگیا، حادثے میں 4 فوجی ہلاک اور 11 زخمی ہوگئے۔ غیر ملکی میڈیا کے مطابق حادثے کا شکار ہیلی کاپٹر یورپی یونین کے امن مشن میں حصہ لے رہا تھا۔ ہیلی کاپٹر میں عملے کے 15 ارکان سوار تھے۔دریں اثناء بھارت کی ریاست اترا کھنڈ کے پہاڑی علاقوں میں ہیلی کاپٹر گر تباہ ہوگیا اور 6 افراد لاپتا ہوگئے ہیں، جن کے ہلاک ہونے کا خدشہ ظاہر کیا جا رہا ہے۔ غیرملکی خبررساں ادارے کی رپورٹ کے مطابق ہیلی کاپٹر بدری ناتھ میں پہاڑی میں واقع ہندوں کے معروف مذہبی مقام سے دیہرادون کی طرف پر پرواز کر رہا تھا، جس میں پائلٹ اور 5 مسافر موجود تھے۔