اقوام متحدہ کے ادارہ برائے مہاجرین کی موسم سرما کے لیے 5 کروڑ ڈالر امداد جمع کرنے کی اپیل

اقوام متحدہ (این این آئی)اقوام متحدہ کے ادارہ برائے مہاجرین (یو این ایچ سی آر)نے اپنی
سالانہ موسم سرما امدادی مہم کا آغاز کر دیا جس کے تحت یوکرین، شام، لبنان اور افغانستان میں تقریبا 90 لاکھ افراد کی مدد کے لیے کم از کم 5 کروڑ ڈالر جمع کرنے کا ہدف مقرر کیا گیا ہے۔اماراتی نیوز ایجنسی کے مطابق اقوام متحدہ کے ترجمان سٹیفن دوجارک نے کہا کہ فنڈز کی کمی اور توانائی کی قیمتوں میں اضافے کے باعث انسانی ضروریات میں اضافہ ہوا ہے جبکہ کم از کم 90 لاکھ افراد کو موسم سرما گزارنے کے لیے اضافی امداد درکار ہے۔یو این ایچ سی آر کا ہدف ہے کہ27۔2026کے موسم سرما کے دوران امدادی سرگرمیوں کے لیے اپنی سالانہ مہم کے ذریعے کم از کم 5 کروڑ ڈالر جمع کیے جائیں۔اس مہم میں انفرادی عطیہ دہندگان اور نجی شعبے سے تعلق رکھنے والے عطیہ دہندگان کو ہدف بنایا گیا ہے تاکہ ادارے کے بجٹ میں نمایاں کمی کے اثرات کو کم کیا جا سکے۔یہ ہدف گزشتہ سال جمع ہونے والی امدادی رقم سے 30 لاکھ ڈالر زیادہ ہے۔