شہر کے مختلف علاقوں میں خاتون سمیت 3 افراد جاں بحق

لاہور (کرائم رپورٹر) شہر کے مختلف علاقوں لاری اڈہ، بھاٹی گیٹ اور چوکی نیاز بیگ کے قریب تین مختلف واقعات میں خاتون سمیت تین افراد جاں بحق ہو گئے، جن میں سے دو افراد کی شناخت نہیں ہو سکی۔ ایدھی ترجمان کے مطابق لاری اڈہ کے علاقے میں70 سالہ شخص حرکت قلب بند ہونے کے باعث جاں بحق ہوا، جس کی شناخت شیخ صفدر کے نام سے ہوئی جو حافظ آباد کا رہائشی تھا۔ دوسرے واقعے میں بھاٹی گیٹ دربار پیر مکی کے سامنے میٹرو برج کے نیچے سے تقریبا 80 سالہ نامعلوم خاتون کی لاش برآمد ہوئی جو بظاہر گداگر معلوم ہوتی ہے جبکہ چوکی نیاز بیگ کے علاقے مریدوال چوک سے بھی تقریبا 40 سالہ نامعلوم شخص مردہ حالت میں پایا گیا۔ اطلاع ملنے پر پولیس اور متعلقہ تحقیقاتی اداروں نے ضروری کارروائی مکمل کی، جس کے بعد ایدھی رضاکاروں نے تینوں لاشیں مردہ خانے منتقل کر دیں۔