کاروباری برادری کاروزگار فراہمی، صنعتی ترقی میں اہم کردار: چیئرمین سینیٹ

ملتان(خبرنگار) چیئرمین سینیٹ سید یوسف رضا گیلانی نے پاکستان کی معاشی ترقی کے لیے مستقل، قابلِ پیش گوئی اور کاروبار دوست پالیسیوں، ادارہ جاتی ہم آہنگی اور پارلیمان و کاروباری برادری کے درمیان مسلسل روابط کی ضرورت پر زور دیا ہے۔ لاہور چیمبر آف کامرس اینڈ انڈسٹری کے نومنتخب عہدیداران اور اراکین سے خطاب کرتے ہوئے انہوں نے صدر علی حسام اصغر، سینئر نائب صدر سردار عثمان غنی اور نائب صدر چوہدری خادم حسین کو انتخاب پر مبارکباد دی اور اس اعتماد کا اظہار کیا کہ نئی قیادت ملکی معاشی ترقی میں مؤثر کردار ادا کرے گی۔ چیئرمین سینیٹ نے تجارت، صنعت اور کاروبار کے حوالے سے لاہور کی تاریخی اہمیت کو سراہتے ہوئے کہا کہ کاروباری برادری روزگار کی فراہمی، صنعتی ترقی اور قومی خوشحالی میں اہم کردار ادا کر رہی ہے۔ انہوں نے کہا کہ ان کے دورے کا مقصد صرف خطاب کرنا نہیں بلکہ کاروباری برادری کے مسائل اور تحفظات کو سننا بھی ہے۔ انہوں نے کہا کہ ٹیکسوں، ریگولیٹری مشکلات، پالیسیوں کے عدم تسلسل اور کاروبار کی بڑھتی ہوئی لاگت سے متعلق چیمبر کے تحفظات حقیقی ہیں اور سنجیدہ توجہ کے متقاضی ہیں۔ سید یوسف رضا گیلانی نے کہا کہ ایک مستحکم معیشت کیلئے اچھی پالیسیوں کے ساتھ تسلسل، پیش گوئی کی صلاحیت اور اعتماد بنیادی اہمیت رکھتے ہیں۔ انہوں نے کاروباری برادری کو قومی ترقی کا اہم شراکت دار قرار دیا۔ انہوں نے کہا کہ پاکستان کا معاشی مستقبل اس کے اداروں، کاروباری شخصیات اور عوام کی مشترکہ قوت سے وابستہ ہے۔ کاروبار کی ترقی سے روزگار کے مواقع بڑھتے ہیں، معاشی امکانات وسیع ہوتے ہیں اور قوم مضبوط بنتی ہے۔ انہوں نے ایک مضبوط، منصفانہ اور پیداواری معیشت کی تعمیر کے لیے مشترکہ کوششوں کی ضرورت پر زور دیا۔
یوسف رضا گیلانی