سابق وزیر اعظم میاں نواز شریف کا قائم کردہ ہومیو پیتھی پروگرام زوال کا شکار

گوجر خان( بیورو رپورٹ)پنجاب کے عوامی اور طبی حلقوں نے، بشمول ‘پاک ہومیو ایمپلائز ڈاکٹرز آرگنائزیشن (PHEDO)’ پنجاب ونگ، وزیر اعلی پنجاب مریم نواز اور سابق وزیر اعظم میاں نواز شریف سے پرزور اپیل کی ہے کہ وہ پنجاب بھر کے سرکاری ہسپتالوں میں ہومیوپیتھی شعبہ کی بحالی اور تقرریوں کے لیے فوری اقدامات کریں۔تفصیلات کے مطابق، فیڈو کے صدر ہومیو ڈاکٹر محمد عابد خان نے واضح کیا کہ 1988 میں میاں نواز شریف نے اپنے دورِ وزارتِ اعلی میں پنجاب کے غریب اور مستحق طبقے کو سستی اور موثر طبی سہولیات فراہم کرنے کے لیے پرائمری ہیلتھ سینٹرز (RHCs)، تحصیل ہیڈکوارٹر ہسپتالوں (THQs)، اور ڈسٹرکٹ ہیڈکوارٹر ہسپتالوں (DHQs) میں ہومیوپیتھی ڈسپنسریوں کا ایک وسیع نیٹ ورک قائم کیا تھا۔ اس اقدام کے تحت تقریبا 239 بنیادی ہومیوپیتھک ڈسپنسریاں قائم کی گئیں، جہاں ہومیوپیتھک ڈاکٹرز اور ڈسپنسرز خدمات سرانجام دے رہے تھے، جس سے لاکھوں مریض مستفید ہو رہے تھے۔رپورٹ کے مطابق، بدقسمتی سے، 02 فروری 2016 کو جاری ہونے والے ایک بیبنیاد نوٹیفکیشن کے ذریعے اس اہم پروگرام پر سخت پابندیاں عائد کر دی گئیں۔ اس نوٹیفکیشن کے نتیجے میں، جب بھی ہومیوپیتھک ڈاکٹرز یا ڈسپنسرز ریٹائر ہوئے، ان کی جگہ نئی تقرریوں کے بجائے ان آسامیوں کو مکمل طور پر ختم کر دیا گیا۔ اس عمل سے 239 بنیادی ڈسپنسریوں کی تعداد آہستہ آہستہ سکڑ کرکم ہو رہی ہے، اور ہزاروں کوالیفائیڈ ہومیوپیتھک ڈاکٹرز اور ڈسپنسرز بے روزگاری کا شکار ہیں۔طبی ماہرین کا کہنا ہے کہ ہومیوپیتھی ایک کم لاگت اور بے ضرر طریقہ علاج ہے، جو عوامی صحت کے نظام پر پڑنے والے بوجھ کو کم کرنے میں مددگار ثابت ہو سکتا ہے۔ تاہم، موجودہ پالیسی کی وجہ سے یہ اہم شعبہ زوال پذیر ہے۔اس سنگین صورتحال کے پیش نظر، ‘PHEDO’ پنجاب ونگ اور عوامی حلقوں نے موجودہ حکومت پنجاب سے، جس کی قیادت مریم نواز شریف کر رہی ہیں، پرزور مطالبہ کیا ہے کہ 2016 کا پابندی والا نوٹیفکیشن فوری طور پر واپس لیا جائیاورہومیوپیتھک آسامیوں کو ختم کرنے کا عمل روکا جائے نیز 239 بنیادی ڈسپنسریوں کا تحفظ کیا جائے۔ہومیوپیتھک ڈاکٹروں اور ڈسپنسروں کی خالی اور نئی آسامیوں پر، 12 مارچ 2021 کے نظرثانی شدہ نوٹیفکیشن کے مطابق، فوری بھرتیوں کا عمل بھی شروع کیا جائے۔طبی حلقوں نے امید ظاہر کی ہے کہ وزیر اعلی پنجاب مریم نواز اپنے والد میاں نواز شریف کے وژن کو آگے بڑھاتے ہوئے اس عوامی فلاحی پروگرام کو دوبارہ بحال کریں گی، تاکہ پنجاب کے غریب عوام کو ان کی دہلیز پر سستے اور موثر علاج معالجہ کی سہولیات میسر آ سکیں۔