حضرو میں گرینڈ جرگہ کا بلدیاتی اور جنرل انتخابات کے مکمل بائیکاٹ کا اعلان

اٹک (بیورو رپورٹ) تحصیل حضرو بڑے گائوں نرتوپہ میں گرینڈ جرگہ نے بلدیاتی اور جنرل انتخابات کے مکمل بائیکاٹ کا اعلان کر دیا، تفصیلات کے مطابق تحصیل حضرو کے گاؤں نرتوپہ کے ایک بڑے اور تاریخی عوامی اجتماع میں علمائے کرام کی سرپرستی میں اہلِ نرتوپہ نے اپنی تاریخی شناخت، اجتماعی وحدت اور سابقہ یونین کونسل کی بحالی کے لیے متوقع بلدیاتی انتخابات سمیت آئندہ جنرل انتخابات کے مکمل اور پُرامن بائیکاٹ کا حتمی فیصلہ کر لیا ، اجتماع سے خطاب کرتے ہوئے مقررین نے کہا کہ حلقہ بندیوں کے نام پر گاؤں نرتوپہ کو چار مختلف یونین کونسلوں میں تقسیم کرنا اس تاریخی گاؤں کی اجتماع شناخت، انتظامی حقوق اور وحدت پر کاری ضرب ہے، اس فیصلے کے خلاف اہلِ نرتوپہ نے بارشوں کے باوجود الیکشن کمیشن سے رجوع کیا، لاہور ہائی کورٹ راولپنڈی بینچ اور دیگر متعلقہ قانونی و آئینی فورمز پر بھرپور جدوجہد کی اور سیاسی قیادت کے سامنے بھی اپنا مؤقف پیش کیا، تاہم تاحال انصاف نہ ملنے پر عوام نے اب ایک متفقہ اور دوٹوک لائحہ عمل اختیار کرنے کا فیصلہ کیا ہے، اجتماع میں واضح کیا گیا کہ اہلِ نرتوپہ کسی دوسرے علاقے کے حقوق کے مخالف نہیں بلکہ صرف اپنی سابقہ یونین کونسل نرتوپہ کی بحالی چاہتے ہیں، مقررین کا کہنا تھا کہ یہ محض انتظامی تقسیم کا معاملہ نہیں بلکہ گاؤں کی تاریخی پہچان، عوامی سہولت، خاندانی معاملات، سماجی شناخت اور آنے والی نسلوں کے مستقبل کا سوال ہے، اجتماع میں متفقہ طور پر حتمی فیصلہ کیا گیا کہ جب تک سابقہ یونین کونسل نرتوپہ بحال نہیں کی جاتی، اہلِ نرتوپہ تمام متوقع بلدیاتی انتخابات اور آئندہ جنرل انتخابات کا مکمل اور پُرامن بائیکاٹ کریں گے، اس فیصلے پر کسی سیاسی دباؤ یا مصلحت کو خاطر میں نہیں لایا جائے گا جبکہ قانونی جدوجہد لاہور ہائی کورٹ سے سپریم کورٹ سمیت تمام متعلقہ آئینی و قانونی فورمز پر جاری رکھی جائے گی، شرکاء نے اس عزم کا بھی اظہار کیا کہ سیاسی وابستگیوں سے بالاتر ہو کر گاؤں کی اجتماعی وحدت کے تحفظ کے لیے متحد رہیں گے اور یونین کونسل کی بحالی تک کسی بھی سیاست دان کو انتخابی عمل میں حمایت فراہم نہیں کی جائے گی، اجتماع کے شرکاء نے دوٹوک مؤقف اختیار کیا کہ نرتوپہ کل بھی ایک تھا، آج بھی ایک ہے اور اپنی تاریخی وحدت و شناخت کی بحالی تک متحد رہے گا۔