راولپنڈی(خصوصی رپورٹر)وزیراعلی پنجاب مریم نواز شریف کے وژن کے مطابق صوبے میں شفاف، منصفانہ اور جدید امتحانی نظام کے فروغ، تعلیمی اصلاحات اور ادارہ جاتی کارکردگی میں بہتری کے لیے عملی اقدامات جاری ہیں۔ صوبائی وزیر تعلیم رانا سکندر حیات کی ہدایات کی روشنی میں امتحانی عمل کی موثر اور مسلسل نگرانی، نقل اور غیر قانونی ذرائع کے سدباب اور امتحانی مراکز میں نظم و ضبط برقرار رکھنے کے لیے زیرو ٹالرنس پالیسی پر سختی سے عمل درآمد یقینی بنایا جا رہا ہے۔پروفیسر ڈاکٹر اقبال محمود چیئرمین تعلیمی بورڈ راولپنڈی کی متحرک قیادت میں امتحان انٹرمیڈیٹ دوسرا سالانہ 2026 کے تمام امتحانی مراکز کی کمانڈ اینڈ کنٹرول سینٹر سے مسلسل ڈیجیٹل مانیٹرنگ کی جا رہی ہے، جبکہ سی سی ٹی وی کیمروں کے ذریعے امتحانی مراکز کی کڑی نگرانی بھی جاری ہے۔ امتحانی عمل کی شفافیت اور موثریت برقرار رکھنے کے لیے انسپکٹرز اور وجیلنس کمیٹیاں فیلڈ میں متحرک ہیں اور مختلف امتحانی مراکز کے دورے کرکے انتظامات کا جائزہ لے رہی ہیں۔ کنٹرولر امتحانات مبشر سعید امتحانی عمل کی نگرانی اور انتظامات کے جائزے کے لیے فیلڈ میں متحرک ہیں۔ مختلف امتحانی مراکز کے دوروں کے دوران امتحانی عمل، عملے کی حاضری، سکیورٹی انتظامات اور جاری کردہ ایس او پیز پر عمل درآمد کا جائزہ لیا جا رہا ہے، جبکہ امتحانی عمل کو شفاف اور منظم رکھنے کے لیے متعلقہ افسران اور عملے کو ضروری ہدایات بھی جاری کی جا رہی ہیں۔سیکرٹری تعلیمی بورڈ راولپنڈی ذوالکیف عمر شاہ بھی مختلف امتحانی مراکز کے دورے کر رہے ہیں اور انتظامی امور، نظم و ضبط اور امتحانی عمل کی مجموعی صورتحال کا جائزہ لے رہے ہیں تاکہ تمام مراکز میں امتحانی سرگرمیاں مقررہ ضابطہ کار کے مطابق جاری رہیں۔بورڈ انتظامیہ کی جانب سے امتحانی نظام کو محفوظ، شفاف اور ہر قسم کی بے ضابطگی سے پاک بنانے کے لیے جامع اقدامات کیے گئے ہیں۔ کمانڈ اینڈ کنٹرول سینٹر کے ذریعے مسلسل نگرانی، جدید ٹیکنالوجی کا استعمال اور فیلڈ افسران کی موثر موجودگی اس امر کو یقینی بنا رہی ہے کہ طلبہ کو میرٹ کی بنیاد پر امتحان دینے کے یکساں مواقع میسر ہوں۔تعلیمی بورڈ راولپنڈی کی جانب سے واضح کیا گیا ہے کہ امتحانی عمل میں شفافیت، میرٹ اور نظم و ضبط پر کوئی سمجھوتہ نہیں کیا جائے گا، جبکہ نقل اور ہر قسم کی غیر قانونی سرگرمیوں کے خلاف زیرو ٹالرنس پالیسی کے تحت کارروائی کا سلسلہ امتحانات کے اختتام تک جاری رہے گا۔
