آئی جی پنجاب کی زیر صدارت کرائم کنٹرول سے متعلق دوسرا فالواپ اجلاس

لاہور (اپنے سٹاف رپورٹر سے) انسپکٹر جنرل پولیس پنجاب عبدالکریم کی زیر صدارت کرائم کنٹرول سے متعلق دوسرا فالو اپ اجلاس سنٹرل پولیس آفس میں منعقد ہوا جس میں دو ہفتے قبل وزیر اعلی پنجاب مریم نواز شریف کی زیر صدارت منعقدہ اجلاس میں دی گئی ہدایات کی روشنی میں تمام ریجنز اور اضلاع کی ہفتہ وار کارکردگی کا جائزہ لیا گیا۔ اجلاس میں بریفنگ دیتے ہوئے بتایا گیا کہ پنجاب بھر میں قتل، ڈکیتی، گاڑی چوری، راہزنی سمیت سنگین جرائم کی وارداتوں میں کمی کا رجحان رواں ہفتے بھی برقرار رہا ہے اور جرائم میں کمی کا ٹرینڈ مزید بہتری کی جانب گامزن ہے۔آئی جی پنجاب عبدالکریم نے ہدایت کی کہ سنگین جرائم کے مکمل خاتمے کے لیے کرائم ہاٹ سپاٹس کی نشاندہی کے مطابق فوری اور موثر اقدامات یقینی بنائے جائیں۔ انہوں نے کہا کہ ڈکیتی، رابری، قتل، بچوں اور خواتین سے زیادتی اور آرگنائزڈ کرائم کی سرکوبی پر خصوصی توجہ مرکوز رکھی جائے۔ وزیر اعلی پنجاب کی ہدایت پر صوبے میں جرائم کی صورتحال اور پولیس کارکردگی کا ہفتہ وار باقاعدگی سے جائزہ لیا جارہا ہے۔آئی جی پنجاب نے کہا کہ پنجاب پولیس میں احتساب کا عمل کسی بھی دیگر ادارے سے زیادہ سخت اور موثر ہے۔ اختیارات سے تجاوز، ضابطہ اخلاق کی خلاف ورزی اور کرپشن میں ملوث ذمہ داران کا کڑا احتساب جاری رہے گا۔ انہوں نے واضح کیا کہ بدعنوانی سمیت غیر قانونی سرگرمیوں میں ملوث پولیس افسران و اہلکاروں کی محکمہ پولیس میں کوئی جگہ نہیں۔ اجلاس میں ایڈیشنل آئی جی لاجسٹکس اینڈ پروکیورمنٹ، ایڈیشنل آئی جی انوسٹی گیشن، ایڈیشنل آئی جی آپریشنز، اے آئی جی آپریشنز، اے آئی جی کوآرڈینیشن اور اے آئی جی مانیٹرنگ نے شرکت کی جبکہ سی سی پی او لاہور، تمام آر پی اوز، سی پی اوز، ڈی پی اوز، ڈی آئی جی آپریشنز لاہور اور ڈی آئی جی انوسٹی گیشن لاہور سمیت متعلقہ افسران نے بذریعہ ویڈیو لنک اجلاس میں شرکت کی۔