راولپنڈی گیارویں قومی انڈورمین اینڈ ویمن روئنگ چیمپئین شپ

راولپنڈی(سٹی رپورٹر)گیارویں قومی انڈور مین اینڈ ویمن روئنگ چیمپئن شپ میں ہائر ایجوکیشن کمیشن (ایچ ای سی) کی ٹیم نے دو چاندی اور دو کانسی کے تمغے حاصل کر لیے۔ چیمپئن شپ میں ایچ ای سی کی ٹیم مینجمنٹ کی ذمہ داری راولپنڈی ویمن یونیورسٹی کو سونپی گئی، جبکہ یونیورسٹی کی وائس چانسلر پروفیسر ڈاکٹر طیبہ ظریف نے بطور مہمانِ خصوصی شرکت کی۔ چیمپئن شپ کا انعقاد پاکستان روئنگ فیڈریشن اور ڈائریکٹوریٹ آف اسپورٹس، پاکستان آرمی کے اشتراک سے کیا گیا۔اس موقع پر وائس چانسلر پروفیسر ڈاکٹر طیبہ ظریف نے کھلاڑیوں کی کارکردگی کو سراہتے ہوئے کہا کہ کھیل نوجوانوں کی شخصیت سازی اور ان کی ہمہ جہت ترقی میں اہم کردار ادا کرتے ہیں۔ کھیلوں میں شرکت سے نوجوانوں میں نظم و ضبط، ٹیم ورک، قیادت، عزم اور مثبت مسابقت کا جذبہ پروان چڑھتا ہے، جو انہیں عملی زندگی میں بھی بہتر کارکردگی دکھانے کے قابل بناتا ہے۔ انہوں نے کہا کہ کھیلوں کے میدان میں کامیابی انفرادی صلاحیت کے ساتھ اجتماعی کوشش، باہمی تعاون اور مثر حکمت عملی کا نتیجہ ہوتی ہے۔ نوجوان کھلاڑیوں کو اپنی صلاحیتوں کے اظہار اور قومی سطح پر آگے بڑھنے کے مواقع فراہم کرنا ضروری ہے۔ وائس چانسلر نے کھیلوں کے فروغ کے لیے متعلقہ اداروں کی کوششوں کو بھی سراہا۔ ان کا مزید کہنا تھا کہ راولپنڈی ویمن یونیورسٹی نوجوان کھلاڑیوں کی حوصلہ افزائی کے لیے آئندہ بھی ہر ممکن سہولت اور معاونت فراہم کرتی رہے گی۔چیمپئن شپ کے مقابلوں میں ایچ ای سی کی ٹیم نے لائٹ ویٹ ویمنز پیئر اور اوپن مکسڈ پیئر کے 2000 میٹر مقابلوں میں چاندی کے تمغے حاصل کیے، جبکہ لائٹ ویٹ مینز پیئر اور لائٹ ویٹ مکسڈ پیئر کے 2000 میٹر مقابلوں میں کانسی کے تمغے اپنے نام کیے۔ایچ ای سی کی ٹیم مینجمنٹ کی ذمہ داری راولپنڈی ویمن یونیورسٹی کو سونپا جانا قومی سطح پر کھیلوں کے فروغ میں یونیورسٹی کے بڑھتے ہوئے کردار کی عکاسی کرتا ہے۔ وائس چانسلر پروفیسر ڈاکٹر طیبہ ظریف کی خصوصی توجہ اور سرپرستی میں یونیورسٹی کی جانب سے اس ذمہ داری کو مثر انداز میں انجام دینے کے لیے انتظامی و تنظیمی معاونت فراہم کی گئی۔