واسا لاہور کا سمارٹ واٹر میٹرنگ سسٹم کا باقاعدہ آغاز کر دیا

لاہور (خبر نگار) واسا لاہور نے پانی کے استعمال کی جدید اور شفاف نگرانی کے لیے سمارٹ واٹر میٹرنگ سسٹم کا باقاعدہ آغاز کر دیا، جوہر ٹائون میں ایک ہزار الٹرا سونک سمارٹ واٹر میٹرز کامیابی سے نصب اور فعال کر دیئے گئے ہیں جبکہ منصوبےکے تحت آئندہ تین ماہ کے دوران مزید 10 ہزار سمارٹ میٹرز نصب کیے جائیں گے۔ ایم ڈی واسا لاہور غفران احمد نے سمارٹ واٹر میٹرنگ سسٹم اور ڈیوائس مینجمنٹ ڈیش بورڈ کا جائزہ لیا۔ اس موقع پر ڈائریکٹر پی اینڈ ای مدثر جاوید نے انہیں منصوبے کے تکنیکی پہلوئوں، میٹرز کی تنصیب اور جدید نظام کے ذریعے پانی کے استعمال کی نگرانی کے حوالے سے تفصیلی بریفنگ دی۔ بریفنگ میں بتایا گیا کہ سمارٹ میٹرنگ سسٹم کے تحت صارفین کو پانی کے حقیقی استعمال کے مطابق بل جاری کیے جارہے ہیں جبکہ پنجاب واسا کی موبائل ایپ کے ذریعے صارفین روزانہ پانی کی کھپت، میٹر ریڈنگ اور بلوں کی تفصیلات بھی باآسانی دیکھ سکتے ہیں۔ حکام کے مطابق جدید سمارٹ میٹرنگ نظام سے پانی کے ضیاع، چوری اور غیر قانونی کنکشنز کی روک تھام میں مدد ملے گی جبکہ ڈیوائس مینجمنٹ ڈیش بورڈ کے ذریعے نصب شدہ میٹرز کی موثر نگرانی اور پانی کی طلب و رسد کا درست تعین بھی ممکن ہو سکے گا۔ ایم ڈی واسا کو بتایا گیا کہ جدید ٹیکنالوجی کے استعمال سے پانی کے ذمہ دارانہ اور محتاط استعمال کو فروغ دینے کے ساتھ بلنگ کے نظام میں شفافیت لانے میں بھی مدد ملے گی۔ منصوبے کی توسیع کے تحت اگلے تین ماہ میں مزید 10 ہزار سمارٹ واٹر میٹرز نصب کرنے کا ہدف مقرر کیا گیا ہے۔