نہر توڑ کر پانی چوری کرنیکا الزام ‘جھنگ پولیس کو قانون کے مطابق فیصلہ کرنیکی ہدایت

لاہور (کورٹ رپورٹر) لاہور ہائیکورٹ کے جسٹس سردار علی اکبر ڈوگر نے نہر توڑ کر پانی چوری کرنے کے الزام میں چھ سالہ بچے، نابینا اور معذور شخص کے خلاف درج مقدمے کے معاملے پر جھنگ پولیس کو درخواست گزار کا موقف سن کر قانون کے مطابق فیصلہ کرنے کی ہدایت کر دی۔ درخواست گزار کے وکیل ادریس مہدی خان نے موقف اختیار کیا کہ محکمہ آبپاشی نے نہر توڑ کر پانی چوری کرنے کے الزام میں 42 افراد کے خلاف مقدمہ درج کرایا، جن میں تین افراد کو نامزد کیا گیا اور ان میں ایک چھ سالہ بچہ، ایک نابینا اور ایک معذور شخص شامل ہے۔ وکیل نے موقف اختیار کیا کہ محکمہ آبپاشی نے جھوٹا مقدمہ درج کیا ہے، عدالت تینوں کے خلاف درج مقدمہ خارج کرنے کا حکم دے۔