اسلام آباد (عادل عباسی)ملک بھر میں بڑھتے ہوئے سائبر جرائم کی روک تھام اور متاثرہ شہریوں کو فوری سہولت فراہم کرنے کے لیے اہم پیش رفت سامنے آئی ہے، پولیس ہیلپ لائن 15 کو نیشنل سائبر کرائم انویسٹی گیشن ایجنسی (این سی سی آئی اے) سے منسلک کر دیا گیا ہے، جس کے بعد شہری آن لائن فراڈ، مالیاتی دھوکہ دہی، سوشل میڈیا ہراسگی، جعلی اکانٹس، بلیک میلنگ اور دیگر سائبر جرائم سے متعلق اپنی شکایات پولیس کی ہیلپ لائن 15 پر بھی درج کرا سکیں گے۔اس اقدام کے تحت پولیس ہیلپ لائن 15 اور این سی سی آئی اے کے درمیان رابطے کا نظام قائم کیا گیا ہے تاکہ سائبر جرائم کا شکار ہونے والے شہریوں کو شکایت درج کرانے کے لیے مختلف دفاتر کے چکر نہ لگانے پڑیں اور ان کی شکایات بروقت متعلقہ تحقیقاتی ادارے تک پہنچائی جا سکیں۔ شہری کسی بھی سائبر جرم کی صورت میں ہیلپ لائن 15 پر رابطہ کر کے اپنے ساتھ پیش آنے والے واقعے کی اطلاع دے سکیں گے۔ذرائع کے مطابق اس اقدام کا بنیادی مقصد سائبر جرائم سے متاثرہ افراد کے لیے شکایات کے اندراج کا طریقہ کار آسان بنانا، پولیس اور سائبر کرائم سے متعلق تحقیقاتی ادارے کے درمیان رابطہ کاری بہتر بنانا اور شہریوں کو فوری رہنمائی فراہم کرنا ہے۔ جدید ٹیکنالوجی کے بڑھتے ہوئے استعمال کے ساتھ آن لائن مالیاتی فراڈ، جعلی شناخت کے ذریعے دھوکہ دہی، سوشل میڈیا پر ہراساں کرنے اور شہریوں کی نجی معلومات کے غیر قانونی استعمال جیسے واقعات میں اضافے کے باعث اس نوعیت کے اقدامات کی ضرورت محسوس کی جا رہی تھی۔نئے نظام کے تحت آن لائن مالیاتی فراڈ، بینک اکانٹس اور ڈیجیٹل ذرائع سے رقم ہتھیانے، جعلی سوشل میڈیا پروفائلز بنانے، خواتین کو آن لائن ہراساں کرنے، تصاویر اور ویڈیوز کے ذریعے بلیک میل کرنے اور دیگر الیکٹرانک جرائم سے متاثرہ شہری پولیس ہیلپ لائن 15 کے ذریعے اپنی شکایت متعلقہ ادارے تک پہنچا سکیں گے۔اس پیش رفت کو شہریوں کے ڈیجیٹل تحفظ کے حوالے سے اہم قدم قرار دیا جا رہا ہے، کیونکہ اکثر شہری سائبر جرائم کا شکار ہونے کے بعد یہ فیصلہ نہیں کر پاتے کہ انہیں کس ادارے سے رابطہ کرنا چاہیے۔ پولیس ہیلپ لائن 15 کو این سی سی آئی اے سے منسلک کرنے سے شکایات کے اندراج اور متعلقہ ادارے تک رسائی کا عمل آسان بنانے میں مدد ملے گی۔شہریوں کو ہدایت کی گئی ہے کہ آن لائن فراڈ یا کسی بھی سائبر جرم کا شکار ہونے کی صورت میں فوری طور پر متعلقہ اداروں کو اطلاع دیں، مالیاتی دھوکہ دہی کی صورت میں اپنے بینک کو بھی فوری آگاہ کریں اور اپنے پاس ورڈز، بینکنگ تفصیلات، شناختی معلومات اور تصدیقی کوڈز کسی غیر متعلقہ شخص کے ساتھ شیئر نہ کریں۔حکام کے اس اقدام کا مقصد ملک میں سائبر جرائم کے خلاف کارروائی کے نظام کو مزید مثر بنانا اور شہریوں کو روایتی پولیس نظام کے ذریعے بھی ڈیجیٹل جرائم کی شکایات متعلقہ تحقیقاتی ادارے تک پہنچانے کی سہولت فراہم کرنا ہے۔
