گرین الیکٹرو بس میں کنڈیکٹر کی خاتون سے بدتمیزی’ویڈیو آگئی

لاہور (کرائم رپورٹر) گرین الیکٹرو بس میں خواتین مسافروں سے بدسلوکی کے واقعات میں اضافہ، کنڈیکٹر کی ایک اور خاتون سے بدتمیزی کی ویڈیو منظر عام پر آگئی۔ وزیر ٹرانسپورٹ پنجاب بلال اکبر خان کا واقعے کا فوری نوٹس، تشدد میں ملوث ملازم علی رضوان کو ملازمت سے فارغ کر دیا گیا۔ وزیر ٹرانسپورٹ پنجاب بلال اکبر خان نے متعلقہ افسران سے واقعے کی فوری رپورٹ طلب کرلی۔ ان کا کہنا تھا کہ الیکٹرو بس میں پیش آنے والے واقعے پر سخت افسوس ہے، خواتین کا تحفظ وزیراعلی پنجاب مریم نواز شریف کی اولین ترجیحات میں شامل ہے۔ خواتین کے ساتھ کسی بھی قسم کی زیادتی وزیراعلی پنجاب کی ریڈ لائن ہے۔ بلال اکبر خان نے واضح کیا کہ کسی بھی مسافر کے ساتھ بدتمیزی یا بدسلوکی ہرگز برداشت نہیں کی جائے گی۔ جو ملازم اپنے فرائض اور معاملات کو درست طریقے سے انجام نہیں دے گا اسے ملازمت سے فارغ کر دیا جائے گا۔ وزیر ٹرانسپورٹ نے متعلقہ حکام کو ہدایت کی کہ مسافروں، بالخصوص خواتین کے تحفظ اور باعزت سفری سہولیات کو یقینی بنایا جائے۔