پیپلزپارٹی، جمعیت اہلحدیث پاکستان کا سیاسی کشیدگی میں کمی پر اتفاق

لاہور (این این آئی) صدر جمعیت اہلحدیث پاکستان علامہ ڈاکٹر حافظ ہشام الٰہی ظہیر نے بلاول ہائوس لاہور میں پیپلز پارٹی کی سینئر قیادت فریال تالپور، راجہ پرویز اشرف، نیئر حسین بخاری اور دیگر رہنمائوں سے ملاقات کر کے ملکی سیاسی صورتحال پر تبادلہ خیال کیا ۔ملاقات میں جمعیت اہلحدیث پاکستان اور پیپلز پارٹی قیادت نے سیاسی کشیدگی میں کمی اور قومی مفاہمت کی ضرورت پر اتفاق کیا ۔ علامہ ہشام الٰہی ظہیر نے کہا کہ سیاسی اختلافات کو دشمنی میں تبدیل نہیں ہونا چاہیے، تمام جماعتیں مکالمے اور مذاکرات کو فروغ دیں، ملک کو درپیش چیلنجز سے نمٹنے کے لیے سیاسی قوتوں کے درمیان باہمی اعتماد اور تعاون ضروری ہے، فریال تالپور اور پیپلز پارٹی قیادت کی جانب سے علامہ ہشام الٰہی ظہیر کے سیاسی و قومی امور پر موقف کا خیرمقدم کرتے ہوئے باہمی روابط کے فروغ پر گفتگو کی ۔اس موقع پر اتفاق کیا گیا کہ قومی معاملات پر سیاسی جماعتوں کے درمیان رابطے اور مشاورت کا عمل جاری رہنا چاہیے۔ ملاقات میں اتفاق رائے کیا گیا کہ سیاسی استحکام اور جمہوری تسلسل کے لیے تمام سیاسی قوتوں کو ذمہ دارانہ کردار ادا کرنا ہوگا۔ بلاول ہائوس میں ہونے والی ملاقات میں سیاسی تنا ئوکم کرنے، افہام و تفہیم اور قومی مفاہمت کے لیے مثبت ماحول پیدا کرنے پر زور دیا گیا۔