ٹریفک حادثات کے متاثرین کی یاد میں پولیس کا اظہار یکجہتی

اسلام آباد(پ،ر)ٹریفک حادثات کے متاثرین کی یاد کے عالمی دن کے موقع پر نیشنل ہائی ویز اینڈ موٹروے پولیس نے حادثات میں جان گنوانے والے افراد کو یاد کرتے ہوئے زخمیوں اور متاثرہ خاندانوں سے یکجہتی کا اظہار کیا ہے۔ یہ دن باقی صفحہ6بقیہ نمبر 53 ان خاندانوں کے دکھ کو یاد رکھنے کا موقع ہے جنہوں نے ٹریفک حادثات میں اپنے پیاروں کو کھویا، اور ان افراد سے اظہارِ یکجہتی کا دن ہے جو شدید زخمی ہونے کے بعد طویل علاج اور بحالی کے مراحل سے گزر رہے ہیں۔ ترجمان نے حادثات کے موقع پر امداد فراہم کرنے والے ریسکیو اہلکاروں اور طبی عملے کی خدمات کو بھی سراہا۔ترجمان نے کہا کہ اس سال عالمی مہم کا پیغام ”یاد کریں، ساتھ دیں، عمل کریں” ہے۔ اس موقع پر موٹروے پولیس نے شہریوں سے اپیل کی کہ ٹریفک کے تمام قوانین پر عمل کریں اور ان کی پابندی کو اپنی عادت بنائیں۔ ڈرائیور اور مسافر سفر شروع کرنے سے پہلے سیٹ بیلٹ باندھیں۔ ڈرائیور مقررہ حدِ رفتار کی پابندی کریں اور دورانِ ڈرائیونگ موبائل فون استعمال کرنے سے گریز کریں۔ موٹرسائیکل سوار ہیلمٹ پہنیں۔ترجمان نے کہا کہ موٹروے پولیس کے زیرِ انتظام موٹرویز اور قومی شاہراہوں پر کسی بھی ہنگامی صورتِ حال میں ہیلپ لائن130 پر رابطہ کیا جا سکتا ہے۔