جنوبی افریقہ:پانی کے بحران سے نمٹنے کیلئے زیر زمین آبی ذخائر کو محفوظ بنانیکا منصوبہ

کیپ ٹائون (این این آئی) جنوبی افریقہ کی حکومت نے ملک کے بڑے شہروں اور زرعی علاقوں کو درپیش پانی کی شدید قلت کے بحران سے نمٹنے کے لیے زیرِ زمین آبی ذخائر کو محفوظ بنانے اور بارش کے پانی کو ذخیرہ کرنے کا ایک جامع قومی منصوبہ شروع کر دیا۔ غیر ملکی میڈیا کے مطابق وزارتِ آبی وسائل کے حکام نے بتایا کہ گزشتہ چند برسوں کے دوران موسمیاتی تبدیلیوں اور غیر متوقع خشک سالی کے باعث ملک کے بڑے ڈیموں میں پانی کی سطح تشویشناک حد تک گر چکی جس سے شہریوں کو راشن کے ذریعے پانی فراہم کرنا پڑ رہا تھا۔ حکام نے کہاکہ اس نئے منصوبے کے تحت شہری علاقوں میں بارش کے پانی کو ضائع ہونے سے بچانے کے لیے زیرِ زمین بڑے ٹینک اور مصنوعی تالاب تعمیر کیے جارہے جبکہ پرانی اور خستہ حال پائپ لائنوں کی مرمت کا کام بھی تیز کر دیا گیا ہے۔ ماہرین کے مطابق اس اقدام سے پانی کے ضیاع میں چالیس فیصد تک کمی لائی جا سکے گی۔