اسلام آباد (خصوصی رپورٹ) سکیورٹی امور سے متعلق متنازعہ خبر دینے والے صحافی سیرل المیڈا بیرون ملک روانہ ہو گئے۔ کور کمانڈرز کانفرنس میں سیرل المیڈا کی خبر پر تشویش کا اظہار کیا گیا تھا۔ ایک ٹی وی نے ذرائع کے حوالے سے بتایا کہ سیرل المیڈا 26اکتوبر کو ای کے 613کے ذریعے بیرون ملک گئے۔ حکومت نے سیرل المیڈا کا نام ای سی ایل میں ڈال کر نکال دیا تھا۔ ذرائع نے بتایا کہ سیرل المیڈا امریکہ کے صدارتی انتخابات کی کوریج کے لئے گئے ہیں۔ امکان ہے وہ 27نومبر کو واپس آ جائیں گے۔
امریکہ روانہ
راولپنڈی(بیورو رپورٹ)آرمی چیف جنرل راحیل شریف سے وزیراعلیٰ پنجاب شہباز شریف، وزیر خزانہ اسحاق ڈار اور وزیر داخلہ چودھری نثار علی خان کی ملاقات ہوئی جس میں ملک کی موجودہ سیاسی صورتحال پر تبادلہ خیال کیا گیا۔ ذرائع کے مطابق آرمی چیف جنرل راحیل شریف سے سیاسی رہنماﺅں کے وفد کی ملاقات اسلام آباد میں ہوئی جس میں اعلیٰ عسکری قیادت بھی شریک تھی۔ ملاقات میں عسکری اور سیاسی رہنماﺅں نے ملک کی موجودہ سیاسی صورتحال پر تبادلہ خیال کیا جبکہ اہم عمارتوں کی سکیورٹی کیلئے فوج کی تعیناتی پر تبادلہ خیال بھی کیا گیا۔ ذرائع کے مطابق ملاقات میں سیاسی قیادت نے تازہ ترین ملکی داخلی اور خارجی صورتحال پر بھی تبادلہ خیال کیا۔ پاک فوج کے شعبہ تعلقات عامہ ( آئی ایس پی آر) کے مطابق سربراہ پاک فوج جنرل راحیل شریف سے شہباز شریف، چوہدری نثار اور اسحاق ڈار پر مشتمل سیاسی رہنماو¿ں کے وفد نے آرمی ہاو¿س میں ملاقات کی جب کہ ملاقات میں ڈی جی آئی ایس آئی لیفٹیننٹ جنرل رضوان اختر بھی موجود تھے۔ آئی ایس پی آر کے مطابق سیاسی وفد کی ملاقات سہ پہر 4 سے ساڑھے 5 بجے تک جاری رہی جس میں حکومتی وفد نے آرمی چیف کو قومی سلامتی کے اجلاس کی خبر لیک ہونے کی تحقیقات سے آگاہ کیا جب کہ وفد نے آرمی چیف کو اپنی سفارشات بھی بتائیں۔
اسلام آباد (خصوصی رپورٹ) وفاقی حکومت نے تحریک انصاف کے 2 نومبر کے دھرنے کو ناکام بنانے کے لئے 6 روز قبل کارروائی شروع کردی ہے۔ جمعرات کو وزیراعظم محمد نوازشریف کی زیرصدارت اعلیٰ سطح کے اجلاس میں وفاقی وزیر داخلہ چودھری نثار کے دھرنا کو ناکام بنانے کی حکمت عملی کی منظوری دے دی گئی۔ چودھری نثار کا کیمپ آفس پنجاب ہاس منتقل ہو گیا ہے۔ وہ دن رات صورت حال کی مانیٹرنگ کریں گے۔ ریاست کی عمل داری کے لئے جہاں ضروری ہوا ان کے حکم پر انتظامی مشینری کارروائی کرے گی۔ ذرائع کے مطابق وزیراعظم محمد نوازشریف کی زیرصدارت فیصلہ کیا گیا 2 نومبر کو اسلام آباد کو کھلا رکھنے کے لئے تمام سرکاری وسائل استعمال کئے جائیں گے۔ وفاقی حکومت اور حکومت پنجاب نے تحریک انصاف کے رہنماﺅں اور کارکنوں کی گرفتاریوں کا فیصلہ کیا ہے ذرائع نے بتایا ہے آئندہ 48 گھنٹوں کے درمیان تحریک انصاف کی قیادت کو پابند سلاسل کردیا جائے گا۔ ذرائع کے مطابق حکومت پنجاب نے اسلام آباد کی جانب جانے والے راستوں پر کنٹینر کھڑے کر کے جلوسوں کو روکنے کا فیصلہ کیا ہے۔ دفعہ 144 کی خلاف ورزی کرنے والوں کے ساتھ سختی سے نمٹا جائے گا۔ راولپنڈی و اسلام آباد کے علاوہ گردو نواح کے تھانوں میں گرفتار کارکنوں کو رکھا جائے گا اسی طرح اڈیالہ جیل بھی گرفتار کارکنوں کو بھجوانے کا انتظام کیا جائے گا۔ وزیراعظم محمد نوازشریف کی صدارت میں تحریک انصاف کے 2 نومبر کے اسلام آباد لاک ڈان اعلان سے نمٹنے کے لئے مشاورت کی گئی۔ اجلاس میں پاکستان مسلم لیگ کے مرکزی قیادت کے اہم رہنما شریک ہوئے۔ ذرائع نے بتایا اجلاس میں فیصلہ کیا گیا قانون کے دائرے سے باہر ہر احتجاج سے سختی سے نمٹا جائے گا۔ جبکہ حکومت بات چیت اور مذاکرات سے بھی انکار نہیں کرے گی۔ ذرائع نے بتایا وزیر اعظم کو بتایا گیا پی پی پی کی طرف سے ایک بار پھر حکومت سے کہا گیا ہے وہ پانامہ پیپرز کے حوالے سے مشاورت سے قانون سازی کرے۔ اجلاس میں وزیر خزانہ سے کہا گیا وہ مذاکرات اور بات چیت کے سلسلے بھی آگے بڑھائیں۔ اجلاس میں قانون اور آئین کی حدود میں رہتے ہوئے تمام اقدامات کا فیصلہ کیا گیا جو اسلام آباد میں زندگی کو رواں دواں رکھنے کے لئے ضروری ہیں۔
اسلام آباد، نئی دہلی (آئی این پی+مانیٹرنگ ڈیسک) پاکستان نے بھارت کے سفارتی اہلکار سرجیت سنگھ کی سرگرمیوں پر گہری تشویش کا اظہار کرتے ہوئے ناپسندیدہ شخص قراردے دیااور29اکتوبر تک خاندان کے ہمراہ پاکستان چھوڑنے کا حکم دے دیا۔ جمعرات کو سیکرٹری خارجہ اعزاز چوہدری نے بھارتی ہائی کمشنر گوتم بمبا والا کو دفتر خارجہ طلب کر کے فیصلے سے آگاہ کیا۔سیکرٹری خارجہ نے کہا کہ سرجیت سنگھ کی سرگرمیاں ویانہ کنونشن اور سفارتی آداب کی خلاف ورزی ہیں ، پاکستان کی طرف سے بھارتی ہائی کمشنر کو احتجاجی مراسلہ بھی دیا گیا جس میں ورکنگ باﺅنڈری اور لائن آف کنٹرول پر بھارت کی طرف سے سیز فائر معاہدے کی خلاف ورزی پر شدید احتجاج کیا گیا۔ترجمان دفتر خارجہ کا کہنا ہے کہ بھارت متعصبانہ رویہ رکھے ہوئے ہے ، بھارت کو اپنا رویہ درست کرنے کی ضرورت ہے۔ واضح رہے کہ اس سے قبل بھارت نے بھی پاکستان کے سفارتی اہلکار محمود اختر کو ناپسندیدہ شخص قراردیکر ملک چھوڑنے کا حکم دیا تھا۔ اس سے پہلے نئی دلی پولیس نے پاکستانی ہائی کمیشن کے اہلکار محمود اختر کو فوج کے حساس نقشے رکھنے کے الزام میں حراست میں لے لیا تاہم بعد میں سفارتی استثنیٰ حاصل ہونے کے باعث اہلکار کو رہا کیاگیا اور انہیں48 گھنٹوں میں ملک چھوڑنے کا حکم دے دیا۔ ادھر بھارت میں متعین پاکستانی ہائی کمشنر عبدالباسط نے سفارتی عملے کے اہلکار پر لگائے گئے الزامات کو مسترد کرتے ہوئے کہاہے کہ سفارتی عملے سے بدسلوکی ویانا کنونش کی کھلی خلاف ورزی ہے۔ بھارت میں متعین ہائی کمشنر عبدالباسط نے پاکستانی سفارتی عملے کے اہلکار سے بدسلوکی پر بھارتی سیکرٹری خارجہ سے احتجاج کیا اور بھارت کی جانب سے لگائے گئے الزامات کو مسترد کردیا ہے۔ پاکستانی ہائی کمشنر عبدالباسط کا کہنا تھا کہ پاکستانی سفارتی عملے کے اہلکار محمود اختر کے ساتھ بھارت کی جانب سے بدسلوکی ویانا کنونش کی کھلی خلاف ورزی ہے، پاکستانی سفارت خانے نے سفارتی آداب کے منافی کبھی بھی کوئی قدم نہیں اٹھایا لہذا بھارتی حکومت اس بات کو یقینی بنائے کہ آئندہ ایسے واقعات رونما نہ ہوں۔ بھارتی وزارت خارجہ کے ترجمان وکاس سوارپ نے ایک اور جھوٹا دعویٰاور من گھڑت کہانی بیان کرتے ہوئے کہاہے کہ پاکستانی سفارتی اہلکار کو بھارتی جاسوسوں سے معلومات کا تبادلہ کرتے ہوئے پکڑا گیا۔بھارتی میڈیا کے مطابق وزارت خارجہ کے ترجمان وکاس سوارپ نے پریس کانفرنس کرتے ہوئے دعویٰ کیا کہ پاکستانی اہلکار کو جاسوں کے ساتھ معلومات کا تبادلہ کرتے ہوئے پکڑا گیا اور محمود اختر نے بتایا کہ وہ 1997میںبلوچ رجمنٹ میں شامل ہوا۔وکاس سوارپ کا کہناتھا کہ ہارٹ آف ایشیامیں پاکستان کا خیر مقدم کرتے ہیں ،تمام ممالک کا خیر مقدم کریں گے کیونکہ ہم افغانستان میں امن چاہتے ہیں۔ترجمان نے کہاکہ پاکستانی ہائی کمشنر کو دفتر خارجہ طلب کر کے کہا گیا کہ کوئی بھی اہلکار بھارت مخالف سرگرمیوں میں ملوث نہ ہو۔
اسلام آباد(مانیٹرنگ ڈیسک) چائے والے سے شہرت پانیوالے ارشد خان نے عمران خان کے دھرنے میں شرکت نہ کرنے کا دوٹوک اعلان کردیا اور کہاکہ کوئی بھی فضول بات کرے تو وہ اس کا جواب ہی نہیں دیتا، تاکہ آئندہ کوئی غلط بات نہ کرے۔ نجی ٹی وی کے پروگرام میں عمران خان سے محبت اور دھرنے میں شرکت وغیرہ سے متعلق سوال کے جواب میں ارشدخان کاکہناتھاکہ کسی پارٹی سے کوئی تعلق ہے اور نہ ہی کسی پارٹی کا شوق ہے ، عمران خان کے دھرنے میں بھی جانے کا ارادہ نہیں ، جب سے پیداہواہوں تو آج تک کسی جلسے میں گیا ہوں اور نہ ہی کبھی دھرنے میں شرکت کی ، اپنے کام سے کام رکھتاہوں ، اسی لیے یہاں تک آگیا۔ ارشد خان کاکہناتھا کہ خاموشی اور عزت سے اپنا کام کرتاہوں ، صبح کام پرآتاہوں اور شام کو چلا جاتاہوں ، کسی کو فضول بات کاجواب ہی نہیں دیتا۔
لاہور (خصوصی رپورٹ) تحریک انصاف کے 2نومبر کو اسلام آباد بند کرنے اور دھرنا دینے کے حوالے سے پی ٹی آئی نے پالیسی تبدیل کرنے پر غور شروع کردیا۔ ذرائع کے مطابق کارکنوں کی زیادہ گرفتاریوں کے بعد 2نومبر سے آگے کی تاریخ کا بھی اعلان کیا جا سکتا ہے۔ معلوم ہوا ہے کہ بنی گالہ میں ہونے والے اجلاس میں اس چیز پر زیادہ اتفاق کیا گیا ہے کہ یکم نومبر تک دیکھا جائے کہ گرفتاریوں کی کیا صورتحال ہے‘ حالات کیا بنتے ہیں‘ تحریک انصاف کو کتنی ہمدردیاں ملتی ہیں اور کس حد تک کارکن متحرک ہوتے ہیں‘ اگر نتیجہ بہتر رہا تو پھر 2نومبر کو دھرنا ورنہ یکم نومبر کو ہی اگلی تاریخ کا اعلان کر دیا جائے گا۔ ذرائع کے مطابق عمران خان کی طرف سے آج ملک بھر میں احتجاجی مظاہروں کا اعلان کیا گیا ہے تاکہ 2نومبر سے پہلے ہی صورتحال واضح ہو جائے کہ حکومت آخری حد تک کہاں تک جائے گی۔ اجلاس میں یہ بھی فیصلہ کیا گیا کہ کارکنوں کی پکڑدھکڑ اور خواتین پر تشدد کے بعد ملنے والی ہمدردیوں اور مختلف سیاسی جماعتوں کی طرف سے اس کی مذمت پر شاہ محمود قریشی‘ جہانگیر ترین‘ چودھری سرور اور دیگر مرکزی رہنما مختلف سیاسی جماعتوں سے رابطوں کا سلسلہ شروع کریں گے اور مختلف سفارتکاروں سے بھی ملیں گے۔ تحریک انصاف نے اس آپشن کو بھی رکھا ہوا ہے کہ اسلام آباد میں سخت انتظامات کے بعد اگر کارکن نہیں پہنچ سکتے تو یکم نومبر کو ہی متعدد شہروں میں ایسے احتجاجی مظاہرے ہوں کہ سڑکیں بلاک ہو جائیں جبکہ اسلام آباد میں خواتین پر تشدد کی ویڈیو پر عمران خان کی جانب سے ایک پیغام بنا کر آج سے چلایا جائے گا جو لوگوں کوگرمانے کیلئے ہو گا۔
اسلام آباد (خصوصی رپورٹ)پاکستان تحریک انصاف کے چیئرمین عمران خان، شاہ محمود قریشی، نعیم الحق اور پارٹی کے چند دیگر نمایاں رہنماﺅں کو جمعرات کی رات دیر سے نظر بند کر دیا گیا ہے۔ ذرائع نے بتایا ہے کہ حکومت نے عمران خان اور شیخ رشید کی تحریک کو دبانے اور ان کے منصوبے سے نمٹنے کیلئے یہ اقدام کیا ہے۔ ذرائع نے بتایا ہے کہ جمعہ کو پارٹی کی مکمل قیادت کو غیر اعلانیہ طور پر نظر بند کر دیا جائے گا جبکہ اسلام آباد پولیس اور پیرا ملٹری فورسز کی بھاری نفری عمران خان کی بنی گالہ کی رہائش گاہ پر تعینات کر دی گئی ہے۔ ذرائع کا کہنا ہے کہ عمران خان، پی ٹی آئی کی قیادت اور شیخ رشید کو لال حویلی کے احتجاج میں شرکت کرنے نہیں دی جائے گی اور حکومت نے اپنی حکمت عملی طور پر پیرا ملٹری فورسز کی بھاری نفری کو مقامی پولیس کی معاونت کیلئے طلب کرلیا ہے۔اسلام آباد پولیس اورفرنٹیئر کانسٹیبلری کی بھاری نفری جمعرات کی رات بنی گالہ پہنچ گئی اور انہوں نے عمران خان کے گھر کے قریب پہنچ کر متعدد گاڑیوں کو چیک کیا۔ذرائع کے مطابق سرکاری ذرائع نے رہنماﺅں کی نظربندی کی تصدیق نہیں کی۔
راولپنڈی (خصوصی رپورٹ)لال حویلی کو سیل کردیا گیا لال حویلی روڈ پر 100سے زائد کنٹینرز لگائے گئے۔ لال حویلی جانے والے تمام راستے بند کردئیے گئے۔ واضح رہے کہ پاکستان عوامی مسلم لیگ کا آج جلسہ ہے جس سے عمران خان خطاب کریں گے،عوامی مسلم لیگ کے سینکڑوں کارکنوں کو پولیس نے گرفتار کرکے ساﺅنڈ سسٹم اور دیگر سامان اپنی تحویل میں لے لیا ہے۔دوسری طرف پولیس کو شیخ رشید کو گرفتار کرنے کا حکم مل گیا،جبکہ پولیس نے عوامی مسلم لیگ کے متعدد کارکنان کو حراست میں لے لیا ہے۔راولپنڈی پولیس نے راولپنڈی کے ایم پی اے اعجاز خان جازی کے دو بھائیوں سمیت سات افراد کو گرفتار کرلیا ہے۔جبکہ سابق ناظم راول ٹاﺅن اور شیخ رشید کے ہتھچے راشد اور دیگر کی گرفتاری کیلئے چھاپے مارے جارہے ہیں۔
اسلام آباد (آن لائن) عوامی تحریک کے سربراہ علامہ طاہر القادری کو دو نومبر کے دھرنے میں شریک کرنے کے لئے شیخ رشید خصوصی طور پر لندن روانہ ہوں گے ۔ شیخ رشید نے غیر ملکی ایئرلائن سے لندن کی ٹکٹ بک کروالی ۔ عوامی مسلم لیگ کے سربراہ شیخ رشید احمد کا اس حوالے سے کہنا ہے کہ میرا خیال ہے کہ علامہ طاہر القادری دو نومبر کے دھرنے میں شرکت کے لئے نہیں آ رہے اس لئے میں جمعہ کو جلسہ کے بعد لندن کے لئے روانہ ہو جاﺅں گا اور طاہر القادری سے ایک فائنل ملاقات کر کے ہی اسی روز واپس آ جاﺅں گا کیونکہ پچھلے کچھ عرصہ میں علامہ طاہر القادری کا بہت زیادہ سیاسی نقصان ہوا ہے ۔ ان کے 18 کارکن شہید ہوئے اور 70 زخمی ہوئے ۔ طاہر القادری اس فیصلہ کن موڑ پر پاکستان میں ہونا ضروری ہے۔
کراچی (مانیٹرنگ ڈیسک )پیپلز پارٹی کے چیئرمین بلاول بھٹو آج دبئی سے کراچی پہنچیں گے ۔نجی ٹی وی کے مطابق بلاول بھٹو زرداری نے موجودہ سیاسی صورت حال پر مشاورت کیلئے پارٹی رہنماں کا اجلاس طلب کر لیا ہے جس کی صدارت کیلئے وہ آج دبئی سے کراچی پہنچیں گے ۔اجلاس میں ملکی سیاسی صورت حال پر تبادلہ خیال کیا جائے گا ۔ذرائع کا کہنا ہے کہ پیپلز پارٹی کے اجلاس میں عمران خان کے دھرنے اور حکومتی رابطوں سے متعلق بھی غور کیا جائے گا ۔ اجلاس میں خورشید شاہ ، اعتزا ز احسن ، لطیف کھوسہ ، سعید غنی سمیت اہم رہنما شریک ہونگے ۔
لاہور (ایجوکیشن رپورٹر) پاکستان عوامی تحریک کے رہنما خرم نواز گنڈا پور نے کہا ہے کہ ڈاکٹر طاہر القادری کے دھرنے سے قبل واپس آنے کے چانس ہیں۔ ”وزیراعظم خود کو احتساب کیلئے پیش کریں یا استعفیٰ دیں“۔ تحریک انصاف کے وفد سے ملاقات کے بعد مشترکہ پریس کانفرنس کرتے ہوئے پاکستان عوامی تحریک کے رہنما خرم نوازگنڈاپور نے کہا کہ پاکستان عوامی تحریک اسلام آباد دھرنے میں شرکت کریگی اور لال حویلی بھی جائے گی۔ اگر اسلام آباد میں نیا ماڈل ٹاﺅن ہوا تو اس کا ردعمل پہلے ماڈل ٹاﺅن جیسا نہیں ہوگا۔ پاناما لیکس پر انکا کہنا تھا کہ ملزمان کو پکڑنے کیلئے پاناما لیکس کی تحقیقات ضروری ہیں۔ جب تک سہولت کار موجود ہیں دہشتگردی ختم نہیں ہوسکتی۔ اس موقع پر پاکستان تحریک انصاف کے رہنما چودھری سرور نے کہا کہ ماڈل ٹاﺅن کے شہداءکو انصاف ملنا چاہئیے، جب تک ماڈل ٹاﺅن کے شہداءکو انصاف نہیں ملتا تحرک انصاف پاکستان عوامی تحریک کے ساتھ جدوجہد کرتی رہے گی۔ ذرائع کا کہنا ہے کہ دھرنے میں شرکت کیلئے رضا مند کرنے کیلئے پاکستان تحریک انصاف کا تین رکنی وفد چودھری سرور کی سربراہی میں منہاج القرآن سیکرٹریٹ پہنچا جہاں دونوں پارٹیوں کے رہنماﺅں میں مذاکرات ہوئے۔ ذرائع کے مطابق پاکستان عوامی تحریک کے وفد کی قیادت خرم نواز گنڈا پور نے کی جبکہ پی ٹی آئی کے وفد کی قیادت چودھری سرور کر رہے تھے تاہم ڈاکٹر طاہر القادری ٹیلی فون کے ذریعے مذاکرات میں شامل رہے۔ ذرائع نے مزید بتایا ہے کہ پاکستان عوامی تحریک دھرنے میں سینکڑوں کارکنوں سمیت شامل ہونے پر رضا مند ہوگئی ہے اور دونوں جماعتوں کے درمیان دھرنے میں شرکت کے طریقے کار پر بھی اتفاق ہوگیا ہے۔
ریاض(ویب ڈیسک)یمن کے حوثی باغیوں کی جانب سے مکّہ مکرمہ کی طرف بیلسٹک مزائل فائر کیا گیا.مگر اتحادی فورسز نے 65 کلومیٹر دور یمن کی حدود میں ہی میزائل کو ناکارہ بنا دیا حملہ یمن کے صوبے سعدہ سے کیا گیا جو مکّہ مکرمہ سے 800کلومیٹر کے فاصلے پر ہے . دو ہفتے قبل بھی طائف میں میزائل فائر کے گئے تھے.
Error 403: The request cannot be completed because you have exceeded your quota..
Domain code: youtube.quota
Reason code: quotaExceeded
