لاڑکانہ (بیورو رپورٹ) چیئرمین پیپلزپارٹی بلاول بھٹو زرداری نے پارٹی رہنماﺅں کو متحدہ کے معاملے پر زبان بند رکھنے کی ہدایت کی۔بلاول بھٹو نے کہا ہے کہ نواز شریف صرف پنجاب صوبے کے وزیر اعظم نہ بنیں بلکہ پورے پاکستان کے وزیر اعظم بنیں ، میں انہیں پانامہ بل منظور کرنے کے لئے 27دسمبر تک مہلت دیتا ہوں کہ وہ میرے چار مطالبات تسلیم کر لیں بصورت دیگر پورے ملک میں دمادم مست قلندر کرتے ہوئے گو نواز گو کا نعرہ جو میری والدہ شہید بے نظیربھٹو نے لگایا تھا وہ میرا بھی نعرہ بن جائے گا، نو دیرو ہاﺅس میں صحافیوں سے ملاقات اور گفتگو کرتے ہوئے بلاول بھٹو زرداری کا مزید کہنا تھا کہ نواز شریف اٹھاوریں ترمیم کے خلاف کام کر کے جمہوریت کے ساتھ ملکی عوام کو نقصان پہنچا رہے ہیں، یہ نہ ہو کہ ہر آدمی گو نواز گو کا نعرہ لگانے پر مجبور ہو جائے کیونکہ ان کے ساتھ نا انصافیاں ہو رہی ہیں۔ انہوں نے کہا کہ میں نے کبھی یو ٹرن نہیں لیا آج بھی اس مو¿قف پر قائم ہوں کہ پانامہ پیپر س کا معاملہ حل ہونا چاہئے ، کشمیر الیکشن میں مودی کے یار کو غدار نہیں بلکہ یہ ضرور کہا کہ گرتی ہوئی دیوار کو ، مودی کے یار کو ، چوروں کے سردار کو ایک دھکا اور دو۔ انہوں نے کہا کہ وزیر اعظم نواز شریف مودی سے کیوں مل رہے ہیں اور انہیں شادی پر مدعو کیوں کیا گیا جب اتنے قریبی مراسم ہونگے تو پھر اختلافات کیسے رکھے جائیں گے یہ سوال اہم ہے، پیپلزپارٹی چیئرمین بلاول بھٹو زرداری نے پارٹی کی تنظیم نو کے حوالے سے کہا کہ پورے ملک میں پیپلزپارٹی کی از سر نو تنظیم سازی کی جا رہی ہے اور تشکیل کردہ رابطہ کمیٹیوں کی رپورٹ مل چکی ہے کل کراچی بلاول ہاﺅس میں نئے عہدیداروں کا اعلان کر دونگا جس میں صوبہ سندھ کے لئے پیپلزپارٹی کے صوبائی صدور کے لئے سید قائم علی شاہ، نثار کھوڑو اور مولا بخش چانڈیو کے نام موجود ہیں۔ بلاول بھٹو کا کہنا تھا کہ کراچی اسٹاک ایکسچینج کا نام تبدیل کر کے پاکستان اسٹاک ایکسچینج رکھ کر اسے اسلام آباد شفٹ کیا جا رہا ہے جس پر ہمیں کوئی اعتراض نہیں لیکن کراچی اسٹاک ایکسچینج سرمایہ کاری کا بڑا نام ہے جس کی تبدیلی کے لئے پیپلزپارٹی سمیت عوام کو اعتماد میں لینا ہو گا۔ ایک سوال کے جواب میں ان کا کہنا تھا کہ پیپلزپارٹی کے قائدین نے جانوں کے نذرانے دیئے ہیں ان پر اگر ہم روتے ہیں تو ہمیں غدار کہا جاتا ہے اور جب ریلی میں ڈانس کرتے ہیں تو ہمیں عیاش کہا جاتا ہے ، میری زندگی کا مشن ہے کہ میں ملک کی عوام کے ساتھ مل کر قائد اعظم کا پاکستا ن بناﺅں۔ انہوں کامیاب ریلی پر کراچی والوں کا شکریہ ادا کرتے ہوئے کہا ہے کہ وہ دل سے کراچی والوں کے مشکور ہیں ،کیونکہ نو سال بعد کراچی میں عوامی سمندر امنڈ آیا اور ریلی میں ایک ملین عوام نے شرکت کی، سانحہ کار ساز کے حوالے سے ان کا کہنا تھا کہ یہ واقع دنیا کی تاریخ میں کسی بھی سیاسی جماعت پر ہونے والا تیسرا بڑا دہشتگردی کا واقعہ تھا ، ملک میں کئی نائین الیون جیسے واقعات ہوتے ہیں ، میری والدہ نے سانحہ میں شہید ہونے والوں کی لاشوں کو وصول کرنے کیلئے 6ماہ کوششیں کیں لیکن مشرف لاشیں دینے کو تیار نہیں تھے اور کہتے تھے کہ لاشوں پر سیاست کرنا بند کرو۔ بلاول بھٹو زرداری نے کہا ہے کہ پاکستان میں جتنی دہشت گردی ہوئی یہاں تو ہر ہفتے ہم نے نائن الیون دیکھا ہے‘ سانحہ کار ساز کے شہداءکے لواحقین کسمپرسی کی زندگی گزار رہے ہیں‘ سلام شہداءریلی میں پورا کراچی نکلا یہ دہشت گردی کے خلاف پیغام تھا‘ یہاں کے عوام دہشت گردی کے خلاف اور جمہوریت کے ساتھ ہیں۔ انہوں نے کہا کہ سولہ اکتوبر کو ریلی کامیاب بنانے پر کراچی والوں کا شکریہ ادا کرتا ہوں اتنی بڑی تعداد میں عوام کی شرکت سے ثابت ہوا کہ عوام دہشت گردی کے خلاف اور جمہوریت کے ساتھ ہیں۔ بلاول بھٹو نے کہا کہ سلام شہداءریلی میں پورا کراچی نکلا یہ دہشت گردی کے خلاف ٹھوس پیغام تھا۔ کراچی کے لوگوں نے بی بی کے بیٹے کو بہت عزت دی۔ لاڑکانہ میرا حلقہ ےہ اور آپ میرے ووٹرز ہیں۔ پارٹی کی تنظیم نو کے لئے کمیٹی کی رپورٹ مل گئی ہے مقامی سطح پر کارکنوں اور وکرز کے لئے رائے طلب کی گئی۔ بلاول بھٹو نے کہا کہ مسلم لیگ (ن) کی حکومت کو تمام اداروں کو لاہور منتقل کرنے کی کیا ضرورت ہے اسٹیٹ بنک کے محکموں کی کراچی سے منتقلی پر ہمیں شدید تحفظات ہیں حکومت سندھ ہر صورت میں صوبے کے عوام کے حقوق کا تحفظ کریگی۔ انہوں نے کہا کہ وفاقی حکومت کے اقدامات اٹھارویں ترمیم اور جمہوریت کے خلاف ہیں ہم اپنے مطالبات کے حق میں کوشش کرتے رہیں گے۔ اعتزاز احسن ملک کے بہترین وکیل ہیں۔

کراچی (این این آئی)پاک سرزمین پارٹی نے گورنر سندھ پر جوابی وار کرتے ہوئے جرائم پیشہ عناصر کی سرپرستی کرنے کا الزام عائد کردیا پی ایس پی کے رہنما انیس ایڈوکیٹ نے عشرت العباد کو فی الفور گرفتار کرنے اور ان کا نام ایگزٹ کنٹرول لسٹ میں ڈالنے کا مطالبہ کردیاہے۔پی ایس اپی رہنما انیس ایڈوکیٹ نے گورنر سندھ کی جانب سے مصطفی کمال پر کی جانے والی تنقید پر ردعمل ظاہر کرتے ہوئے کہا ہے کہ گورنر سندھ سیاسی ہوچکے اور انہوں نے گورنر ہاو¿س کو سیاسی اکھاڑا بنادیا ہے سربراہ پی ایس پی پر الزام لگانے والے عشرت العباد خود جرائم پیشہ عناصر کی سرپرستی کر رہے ہیں۔انیس ایڈوکیٹ نے کہا کہ سانحہ بارہ مئی کی تحقیقات ہوگی تو گورنر سندھ بھی اس میں ملوث ہوں گے وہ گورنر ہاو¿س کی چار دیواری سے باہر نکلے تو انہیں پتہ چل جائے گا کہ دنیا کیا ہے ، بحیثیت مئیر کراچی مصطفی کمال نے کراچی شہر کی ترقی کے لئے جو ترقیاتی کام کئے اسے پاکستان نہیں بلکہ پوری دنیا نے سراہا ، سابق مئیر نے اپنے دور میں شہر کی شکل تبدیل کرڈالی اس کا اعتراف خود ان کے بدترین مخالفین نے بھی کیا ۔ اس موقع پر انہوں نے مطالبہ کیا کہ گورنر سندھ اپنے عہدے سے استعفیٰ دیکر حقائق کا سامنا کریں۔

لاہور (مانیٹرنگ ڈیسک) چینل ۵ کے تجزیوں اور تبصروں پر مشتمل معروف پروگرام ”ضیا شاہد کے ساتھ“ میں گفتگو کرتے ہوئے سینئر صحافی اور تجزیہ کار ضیا شاہد نے ایم کیو ایم کے تمام رہنما ایک ہی تھیلی کے چٹے بٹے ہیں۔ کئی حکومتیں آئیں اور چلی گئیں لیکن گورنر سندھ عشرت العباد ہی رہے۔ کافی عرصہ قبل لندن میں ایک پروگرام میں ڈاکٹر عشرت العباد سے ملاقات ہوئی تو انہیں الطاف حسین کے مجموعی طرز عمل سے بھی دو ہاتھ آگے ہی پایا۔ وہ بڑی تلخ کلامی سے وفاقی حکومت، فوج اور پنجاب کو اتنا ہی برا بھلا کہہ رہے تھے جتنا بعد میں الطاف حسین نے کھل کر کہا۔ مصطفی کمال جب میئر تھے تو ان کو معمار کراچی اور فرشتہ قرار دیا جاتا تھا، میڈلز اور ایوارڈ دیئے گئے اس وقت مصطفی کمال بھی ہر وقت الطاف بھائی کی گردان کرتے نظر آتے تھے۔ سننے میں آتا ہے کہ مصطفی کمال سے لوٹ مار کے پیسوں پر متحدہ قائد کا جھگرا ہوا جس کے بعد وہ جان کے خطرے کے باعث دوبئی فرار ہو گئے اور وہاں ملک ریاض کے ادارے میں پناہ کی۔ متحدہ کی تاریخ ہے کہ اس میں اختلاف کرنے والے یا تنظیم سے الگ ہونے والوں کو مار دیا جاتا ہے۔ اب مصطفی کمال واپس آ گئے ہیں اور بغاوت کر دی ہے لیکن وہ جن پر الزامات لگا رہے ہیں ان کے بھی ساتھی رہے ہیں۔ فاروق ستار بھی الطاف حسین کے ہر جرم میں برابر کے شریک رہے ہیں۔ متحدہ نے جب جان لیا کہ وہ سندھ کی وزارت اعلیٰ کسی صورت حاصل نہیں کر سکتے تو گورنر شپ لے لی تھی۔ ڈاکٹر عشرت العباد کو الطاف حسین نے چنا تھا۔ سینئر تجزیہ کار نے کہا کہ جس وقت عشرت العباد سے متحدہ ناراض ہوئی اور انہیں پارٹی سے بھی نکال دیا اس دوران میری عشرت العباد سے ملاقات ہوئی تو وہ بیٹی کی شادی کے کارڈ دینے نائن زیرو جا رہے تھے۔ اس لئے میں کہوں گا کہ ان تمام متحدہ رہنماﺅں کے باہمی تعلقات ایسے ہی تھے اور ایسے ہی رہیں گے کیونکہ یہ سب ایک ہی تھیلی کے چٹے بٹے ہیں۔ ہمارے نمائندہ کراچی وحید جمال کے بقول اگر عشرت العباد واقعی پاکستان میں برطانیہ کے نمائندے ہیں تو یہ لمحہ فکریہ ہے۔ الطاف حسین کو بھی برطانیہ نے پناہ دے رکھی ہے۔ برطانیہ اور امریکہ ایک ہی ہیں۔ نسرین جلیل اور فاروق ستار بھی امریکی سفارتکار کے پاس دوڑے جاتے ہیں اور فریاد کرتے ہیں کہ ہم پر ظلم و ستم بند کرائے۔ یہ رہنما اپنے حقوق اس پارلیمنٹ سے تو نہیں مانگتے جس میں نمائندے کے طور پر بیٹھتے ہیں بلکہ امریکہ اور برطانیہ سے فریاد کرتے نظر آتے ہیں۔ ماضی میں پاک فوج سے کئی غلطیاں ہوئیں جس میں ایک ایم کیو ایم کا قیام بھی تھا۔ یہ جماعت فوجی دور میں بنی اور فوجی دور میں ہی مضبوط ہوئی۔ مشرف ایک بار پہلے بھی متحدہ کا سربراہ بننے کی کوشش کر چکے ہیں اور اب ایک بار پھر کراچی کے مہاجروں کا لیڈر بننے کی کوشش میں ہیں۔ کراچی ایک انتہائی اہم شہر ہے اس پر بڑی طاقتوں کی عرصہ دراز سے نظر ہے اور کئی بڑے ملک چاہتے ہیں کہ اسے ہانگ کانگ کی طرز پر انٹرنیشنل کاروباری سنٹر بنا دیا جائے۔ سینئر تجزیہ کار نے کہا کہ کراچی پاکستان کا شہر اور معاشی حب ہے ہم کبھی بھی کسی ملک کو اجازت نہیں دیں گے کہ اس شہر کو عالمی سطح پر کنٹرول کیا جائے اور عالمی کاروباری سنٹر بنایا جائے۔ اگر منتخب پارلیمنٹ میں اکثریت اس بات کی حامی ہے کہ آرمی چیف کے تقرر میں بھی اپوزیشن لیڈر سے مشاورت کی جانی چاہئے تو اس میں کوئی مضائقہ نہیں ہے۔ موجودہ صورتحال میں لیکن یہ مسئلہ سامنے آئے گا کہ حقیقی اپوزیشن لیڈر کون ہے اور اپوزیشن لیڈر کی باقاعدہ تعریف متعین کرنا پڑے گی کیونکہ موجودہ اپوزیشن لیڈر خورشید شاہ کو تو ملک کا کوئی شخص بھی اپوزیشن لیڈر نہیں سمجھتا ہر کسی کا خیال ہے کہ عمران خان حقیقی اپوزیشن لیڈر ہیں۔ خورشید شاہ کے تو بیانات میں ہی تضاد ہوتا ہے دبئی سے کال آ جائے تو بھی وہ بیان بدل دیتے ہیں۔ اس حق میں ہی نہیں ہوں کہ صرف دو پارٹیاں مل کر چیف جسٹس، چیف الیکشن کمشنر اور اسی طرح کے بڑے عہدوں پر تقرری کریں اگر یہ دو پارٹیاں جو حکومت میں اور اپوزیشن میں ہیں آپس میں فرینڈلی ہیں تو وہ کیسے کسی ایسے شخص کا تقرر کریں گی جو حقیقی معنوں میں احتساب کر سکتا ہے۔ تمام سیاسی جماعتوں کا بڑے عہدوں کی تقرری میں کردار ہونا چاہئے۔ نیب کی مثال سامنے ہے کہ اس اہم ادارے نے بڑی کرپشن کی تحقیقات اور فیصلہ کرنا ہوتا ہے جبکہ یہاں یہ ہوتا ہے کہ حکومت نیب کو اپنے مخالفوں کے خلاف استعمال کرتی ہے اور اپوزیشن جب حکومت میں آئے تو وہ بھی یہیکردار ادا کرتی نظر آتی ہے۔ خورشید شاہ نے ڈگڈگی بجانے والے سے مراد جو اشارہ کیا ہے وہ فوج کی جانب ہے اور کیا حافظ سعید اور مولانا مسعود اظہر ڈگڈگی بجا رہے ہیں۔ سینئر تجزیہ کار نے کہا کہ ہمارے پرانے دوست نجم سیٹھی نے بیان دیا ہے کہ متنازع خبر سے قومی سلامتی کی خلاف ورزی نہیں ہوتی۔ نجم سیٹھی ہمیشہ سے بباطن سیاستدان رہے ہیں نیب پر پابندی کا ریفرنس سپریم کورٹ میں پیش ہوا تو ولی خان، عطاءاللہ مینگل و دیگر میں نجم سیٹھی کا نام بھی شامل تھا۔ بلوچستان اسلحہ سپلائی کیس میں بھی ان کا نام شامل تھا۔ پنجاب میں الیکشن کے دوران 35 پنکچر لگانے کا الزام بھی ان پر لگا جو ثابت نہ ہو سکا۔ متنازعہ خبر کے حوالے سے وفاقی دارالحکومت میں افواہیں گردش کر رہی ہیں کہ جن خاتون کا نام اس میں لیا جا رہا ہے وہ نجم سیٹھی کی اہلیہ جگنو محسن ہیں۔ سینئر تجزیہ کار نے کہا کہ وزیر قانون زاہد حامد، نجم سیٹھی اور کئی وزراءکا خیال ہے کہ یہ متنازع خبر والا معاملہ بھی چند دنوں میں ختتم ہو جائے گا۔ آرمی کی جانب سے دباﺅ بھی ختم ہو جائے گا جس کی وجہ یہ ہو گی کہ اس دباﺅ کا مقابلہ کرنے کیلئے حکومت بلوچستان میں لاپتہ افراد کے معاملے کو دوبارہ ہوا دے گی جس کا الزام فوج پر لگایا جاتا ہے۔ امیر جماعت اسلامی کراچی معراج الہدیٰ نے کہا کہ کراچی کی تعمیر و ترقی میں سابق میئر نعمت اللہ کا کردار ناقابل فراموش ہے۔ گورنر سندھ عشرت العباد نے اپنے بیان میں جو اعتراف کیا ہے اس سے حقیقت کھل کر سامنے آ گئی ہے۔ مصطفی کمال نے نعمت اللہ کے ترقی کے سفرکو آگے بڑھایا لیکن ان کے دور میں کرپشن کی داستانیں بھی سامنے آئیں۔ گورنر عشرت العباد نے بہت سی حکومتوں کے ساتھ چل کر ریکارڈ بنایا ہے۔ موجودہ صورتحال میں بھی ایسا نہیں ہے کہ وہ بہت سے لوگوں کیلئے ناقابل قبول ہیں ان کی پوزیشن کو کوئی خطرہ نہیں ہے۔ نمائندہ خبریں کراچی وحید جمال نے کہا کہ مصطفی کمال کو گورنر سندھ سے کچھ توقعات تھیں جو پوری نہ ہونے پر بیان داغے گئے۔ وہ سمجھتے ہیں کہ عشرت العباد کے فاروق ستار پارٹی سے رابطے ہیں اور پاک سرزمین کو مائنس کیا جا رہا ہے۔ دونوں گروپوپں نے جو ایک دوسرے پرالزامات لگائے ہیں ان سے سابت ہوا ہے کہ یہ تمام لوگ جرائم میں برابر کے شریک رہے ہیں۔ عشرت العباد جماعت اسلامی کا حصہ نہیں رہے ان کی ہمدردیاں صرف متحدہ کے ساتھ رہی ہیں۔ عشرت العباد برطانیہ کے نامزد کردہ اور انہی کے وفادار ہیں ان کے پاس برطانوی شہریت بھی ہے۔ جب گورنر سندھ ناراض ہو کر دبئی گئی تو برطانیہ کے دباﺅ پر ہی متحدہ نے انہیں واپس لیا تھا۔