(ویب ڈیسک)بارش میں ڈوبتے کراچی کو دیکھ کر پی ٹی آئی قیادت نے حکومت سندھ کو آڑے ہاتھوں لیا اور  وفاقی وزرا نے سوشل میڈیا پر بیانات کی بھر مار کر دی۔ وفاقی وزیر اطلاعات سینیٹر شبلی فراز نے کہا کہ کراچی ڈوبا ہوا ہے اور نیرو اپنی سالگرہ منا رہا ہے، پیپلز پارٹی تیسری بار اقتدار میں لانے والے ووٹرز سے انتقام لے رہی ہے۔وفاقی وزیر علی زیدی نے کہا کہ 12 سال سے زائد عرصے سے اقتدار میں رہنے والی پیپلز پارٹی کراچی کے برساتی نالوں اور گٹر کی صفائی کا انتظام بھی نہیں کر سکی۔ بلاول پر تنقید کرتے ہوئے علی زیدی نے کہا کہ  سیاستدان ہونے کا ڈھونگ رچانے والا ایک بگڑا لاڈلا ٹی وی پر بیٹھ کر ہر کسی کو ہر برائی کا ذمہ دار ٹھہراتا ہے، یہ مجرمانہ غفلت کی انتہا ہے۔وزیراعظم کے معاون خصوصی برائے سیاسی روابط شہباز گل کا کہنا تھا کہ کراچی کے شہریوں کو  اپنے پیاروں کی لاشیں نکالتے دیکھ کر دل غمگین ہو گیا ہے۔واضح رہے کہ گزشتہ روز کراچی کے مختلف علاقوں میں موسلا دھار بارش کے بعد گرمی کا زور ٹوٹ گیا تاہم شاہراہوں پر پانی جمع ہو نے سے شہریوں کو شدید مشکلات کا سامنا کرنا پڑا،  بارش کے باعث کرنٹ لگنے سمیت مختلف واقعات میں 5 افراد بھی جاں بحق ہوئے۔

راولپنڈی(ویب ڈیسک  )پاکستان نے بھارت کے لیے جاسوسی کرنے والے کواڈ کاپٹر کو مار گرایا ۔ڈی جی آئی ایس پی آر کی جانب سے ٹوئٹر پر بھارت کے مار گرائے گئے کواڈ کاپٹر کی تصویر شیئر کی اور بتا یا کہ لائن آف کنٹروول کے پانڈو سیکٹر میں پاک فوج کے جوانوں نے بھارتی کوارڈ کاپٹر کو نشانہ بنا یا جو کہ پاکستانی حدود میں 200میٹر اندر آ چکا تھا ۔رواں سال اب تک پاک فوج کے جوانوں نے دس بھارتی کوارڈ کاپٹروں کو نشانہ بنایا ہے ۔

لاہور: (ویب ڈیسک ) وزیراعلیٰ پنجاب نے عید کے موقع پر صوبے میں اسمارٹ لاک ڈاؤن کی منظوری دیدی، مارکیٹیں اور شاپنگ مالز عید سے دو، تین روز قبل بند کرنے کا فیصلہ کر لیا گیا۔

چیف سیکرٹری پنجاب کہتے ہیں کورونا سے بچاؤ کیلئے عید سے قبل اسمارٹ لاک ڈاؤن مجبوری ہے، سول سیکرٹریٹ کے ذرائع کے مطابق اسمارٹ لاک ڈاؤن کا نوٹیفکیشن تیار کر لیا، کسی وقت بھی جاری ہو سکتا ہے۔

اسمارٹ لاک ڈاؤن کے دوران مویشی منڈیاں، یوٹیلیٹی اسٹورز، دودھ، دہی، تندور اور میڈیکل اسٹور کھلے رہیں گے۔ مویشی منڈیوں میں ایس او پیز اور سکیورٹی کے انتظامات مزید سخت کرنے کا فیصلہ کیا گیا ہے۔

دریں اثنا عیدالاضحیٰ کی نماز کے لیے پنجاب حکومت کی طرف سے ایس او پیز جاری کر دیئے گئے ہیں جن پر عمل درآمد کی ذمہ داری ضلعی حکام کے ساتھ ساتھ مساجد کمیٹیوں پر عائد ہو گی۔ خلاف ورزی سامنے آنے پر قواعد کے مطابق کارروائی بھی کی جائے گی۔

اسلام آباد (ویب ڈیسک ) : ایف اے ٹی ایف بل کی منظوری پر اپوزیشن نے نیب بل کی منظوری کی شرط رکھی ہے۔ وفاقی وزیر اطلاعات شبلی فراز نے انکشاف کیا ہے کہ اپوزیشن نے ایف اے ٹی ایف بل کی منظوری پر نیب بل کی منظوری کی شرط رکھی دی ہے۔ انہوں نے کہا ہے کہ نیب قوانین سے متعلق اپوزیشن صرف اپنے لیے بات کررہی ہے تاکہ بچت کا راستہ نکل سکے۔شبلی فراز نے بتایا ہے کہ خود کمیٹی کا ممبر ہوں جس میں اپوزیشن جماعتوں کے اراکین نے ایف اے ٹی ایف بل کی منظوری کے لیے نیب بل کی شرط رکھی، دراصل فنانشل ایکشن ٹاسک فورس بل پر اپوزیشن ڈیل کرکے نیب بل بھی منظور کروانا چاہتی ہے۔ شبلی فراز نے کہا کہ اپوزیشن نےملک میں رہ کر اداروں کو کمزور کیا،سرکاری اداروں میں سیاسی بھرتیاں کی گئیں،ہمیں بھارت سے لڑنےکی ضرورت نہیں،اپوزیشن ہی کافی ہے کیونکہ اُس نے ہمارےاداروں کو اندرونی طور پر تباہ کردیا ہے،ہم نے حکومت سنبھالی تو معیشت دیوالیہ ہونے کےقریب تھی،روپےکی قدر سہارے پر تھی،موجودہ حکومت کے اقدامات کے بعد صورت حال بہتر ہوئی ہے۔

شبلی فراز نے کہا کہ بلاول بھٹو جو سوالات ہم سےکر رہے ہیں وہ اپنے والد سے ہی پوچھ لیں،وہ زرداری سے پوچھیں سرے محل کس کا تھا،جعلی اکاؤنٹس کی کیاکہانی ہے، پاکستان میں مسٹرٹین پرسنٹ کس کو کہا جاتا تھا، پیپلزپارٹی کے چیئرمین ان باتوں کا جواب بھی قوم کو دیں کیونکہ عمران خان اپنی پوری منی ٹریل سپریم کورٹ میں پیش کرچکے ہیں اور عدالت نے ہی انہیں صادق و امین قرار دیا، افسوس اب پیپلزپارٹی آصف زرداری کی جماعت ہوگئی،قمرزمان کائرہ اور چوہدری منظورجیسے نظریاتی لوگ آج بھی بھٹو کے نظریے اور ویژن پر چل رہے ہیں،مسلم لیگ ن اورپیپلزپارٹی نے مک مکا کر کے ملک اور قوم کو لوٹا ہے۔

ویب ڈیسک : وفاقی وزیر فواد چو ہدری کا کہنا ہے کہ پاکستان میں اسلام کو نہ ٹک ٹاک سے خطرہ ہے، نہ ہی کتابوں سے۔

تفصیلات کے مطابق وفاقی وزیر برائے سائنس و ٹیکنالوجی فواد چوہدری نے سماجی رابطے کی ویب سائٹ ٹویٹر پر جاری اپنے پیغام میں لکھا ہے کہ  پاکستان میں اسلام کو نہ ٹک ٹاک سے خطرہ ہے، نہ ہی کتابوں سے۔

پاکستان میں اسلام کو نہ TikTok سے خطرہ ہے، نہ ہی کتابوں سے ہاں ہمیں فرقہ ورانہ بنیادوں پر تقسیم سے خطرہ ہے اور شدت پسندی سے خطرہ ہے۔ محلوں میں مقید حضرات احتیاط کریں ایسی آگ کو ہوا نہ دیں کہ خود جل جائیں۔۔۔

— Ch Fawad Hussain (@fawadchaudhry) July 26, 2020

فواد چوہدری کا کہنا تھا کہ ہمیں فرقہ ورانہ بنیادوں پر تقسیم سے خطرہ ہے اور شدت پسندی سے خطرہ ہے، محلوں میں مقید حضرات احتیاط کریں، ایسی آگ کو ہوا نہ دیں کہ خود جل جائیں۔

انہوں نے پنجاب اسمبلی میں پاس کیے جانے والے قانون کے حوالے سے کہا کہ میں نے یہ قانون نہیں پڑھا لیکن اس وقت پارلیمان خصوصاً پنجاب میں ایسا ماحول بنا دیا گیا ہے کہ ہر رکن روزانہ ایک نئی تحریک لے کر آتا ہے اور بتایا جاتا ہے اگر یہ نہ ہوا تو اسلام خطرے میں ہے۔

فواد چوہدری کا مزید کہنا تھا کہ یہ خطرناک رویہ ہے اس سے ہم فرقہ ورانہ اور مذہبی شدت پسندی کے گرداب میں دھنستے جائیں گے۔