اسلام آباد: چیف جسٹس پاکستان قاضی فائز عیسی نے کہا ہے کہ ڈاکوؤں اور ریاست میں کوئی تو فرق ہونا چاہیے۔

سپریم کورٹ میں زمین کے معاوضے کی کیس کی سماعت ہوئی۔ چیف جسٹس نے ایڈیشنل ایڈووکیٹ جنرل پنجاب اور سرکاری افسران پر شدید برہمی کا اظہار کیا۔

پشاور: (خبریں ڈیجیٹل) آرمی چیف جنرل سید عاصم منیر کا دورہ پشاور، خواتین سمپوزیم اور صوبائی ایپکس کمیٹی کے اجلاس میں شرکت کی۔

پاک فوج کے شعبہ تعلقات عامہ کے مطابق سمپوزیم میں خواتین سے خطاب کرتے ہوئے آرمی چیف جنرل سید عاصم منیر نے کہا کہ پاکستان کی تاریخ میں خواتین نے ملکی ترقی میں مثبت اور اہم کردار ادا کیا ہے، ملکی ترقی میں خواتین کا کردار نہایت اہمیت کا حامل ہے۔

آئی ایس پی آر کے مطابق آرمی چیف کا کہنا تھا کہ خیبرپختونخوا کی خواتین نے دہشت گردی کے خلاف طویل جنگ کے باعث بے شمار چیلنجز کا سامنا کیا، خیبر پختونخوا کی خواتین نے ان تمام تر چیلنجز کے باوجود پختہ عزم اور بہادری کا ثبوت دیا۔

پاک فوج کے شعبہ تعلقات عامہ کے مطابق آرمی چیف نے خواتین کی حوصلہ افزائی بھی کی، آرمی چیف نے کہا کہ خواتین خیبرپختونخوا اور نئے ضم شدہ اضلاع کی ترقی میں زیادہ سے زیادہ حصہ لیں، خواتین اس تبدیلی کا پورا پورا فائدہ اٹھائیں۔

آئی ایس پی آر کے مطابق آرمی چیف جنرل عاصم منیر نے بعد ازاں صوبائی ایپکس کمیٹی کے اجلاس میں شرکت کی، اجلاس میں نگران وزیر اعلیٰ خیبرپختونخوا محمد اعظم خان بھی شریک ہوئے۔

اپیکس کمیٹی میں آرمی چیف کو ذخیرہ اندوزی، منشیات اور دیگر اشیا کی سمگلنگ کے خلاف اقدامات پر بریفنگ دی گئی، آرمی چیف کو مجموعی سکیورٹی صورتحال کے بارے میں بھی بریفنگ دی گئی۔

کمیٹی شرکا نے اس عزم کا اعادہ کیا کہ ریاستی ادارے عوام کے جان و مال کے تحفظ کیلئے متحد ہیں، اجلاس کے شرکاء نے شہداء کو بھی زبردست خراج عقیدت پیش کیا۔

اس موقع پر آرمی چیف جنرل سید عاصم منیر نے کہا کہ ہمیں اپنے ملک کی ترقی و استحکام اور امن کیلئے ایک دوسرے کے ساتھ تعاون کو بڑھانا ہوگا، ملک کے امن اور خوشحالی کے لیے اپنی کوششوں کو ہم آہنگ کرنا ہوگا۔

آرمی چیف نے کہا کہ پاک فوج خیبرپختونخوا کی ترقی اور استحکام کو یقینی بنانے کیلئے اپنا بھرپور کردار ادا کرتی رہے گی، پاک فوج صوبے کی معاشی ترقی کی رفتار کو بڑھانے میں تعاون جاری رکھے گی، آرمی چیف کی پشاور آمد پر کور کمانڈر پشاور نے ان کا استقبال کیا۔

لاہور: (خبریں ڈیجیٹل) پاکستان مسلم لیگ (ن) کے سینئر رہنما اور سابق وزیر داخلہ رانا ثناء اللہ نے کہا ہے کہ کسی بھی سیاسی جماعت اور لیڈر کو الیکشن سے پہلے اور بعد میں نشانہ نہیں بنانا چاہیے۔

اپنے ایک بیان میں ن لیگی رہنما رانا ثناء اللہ نے کہا کہ ہم سیاسی جماعتوں کو نشانہ بنانے کے حق میں نہیں ہیں لیکن اگر کوئی جماعت یا لیڈر ملکی دفاع پر چڑھ دوڑے، شہدا کے مجسموں کی بے حرمتی کرے تو کیا اس پر کیس اس لیے نہیں چلنا چاہیے کہ اس نے الیکشن لڑنا ہے؟۔

انہوں نے کہا کہ نواز شریف 21 اکتوبر کو لاہور پہنچیں گے، نواز شریف لاہور پہنچنے کے بعد مینار پاکستان جائیں گے، مینار پاکستان پر جلسہ ہوگا جس سے نواز شریف خطاب کریں گے، ہماری الیکشن مہم کا آغاز مینار پاکستان سے ہوگا۔

رانا ثناء اللہ نے کہا کہ نواز شریف کے خلاف جتنے بھی کیسز ہیں وہ جھوٹ پر مبنی ہیں، آج ملک جس حال میں ہے وہ اس سازش کی وجہ سے ہے جو نوازشریف کے خلاف کی گئی، 2018ء میں جب 25 جولائی کو الیکشن ہوئے تو نواز شریف کہاں تھے؟۔

ان کا مزید کہنا تھا کہ نواز شریف کو اقامہ میں نا اہل کیا گیا، سینیٹ میں ہمارے سینیٹرز کو دوہری شہریت کی بنا پر نا اہل قرار دیا گیا، یہ سب کچھ آن ریکارڈ ہے۔

کندھ کوٹ میں راکٹ لانچر کا گولا پھٹنے سے دھماکا ہوگیا جس کے نتیجے میں بچوں اور خاتون سمیت 9 افراد جاں بحق جبکہ 4 زخمی ہوگئے۔

پولیس کا کہنا ہے کہ شہر کے کچے کے علاقے میں راکٹ لانچر کا گولا پھٹا جس کی وجہ سے دھماکا ہوگیا۔

پولیس کے مطابق دھماکے سے چار بچوں اور تین اتین سمیت 9 افراد جاں بحق ہوگئے جن کی لاشوں کو اسپتال منتقل کردیا گیا ہے۔

پولیس نے بتایا کہ واقعہ گھوڑاگھٹ تھانہ کی حدودعلی نواز سبزوئی میں پیش آیا جہاں اہلخانہ نامعلوم مقام سے ملنے والا گولہ بیچنے کے لئے توڑ رہے تھے۔

پولیس کا کہنا ہے کہ واقعے کی مزید تفتش جاری ہے جب کہ پولیس اور رینجرز نے موقع پر پہنچ کر علاقے کا محاصرہ کرلیا۔

ایس ایس پی روحیل کے مطابق نیاز ، ایاز ، زبیر قربان، حنیفہ، رخسانہ، خدیجہ اور شائستہ واقعے میں جاں بحق ہوئے جب کہ جاں بحق افراد میں ایک ماں بیٹا بھی شامل ہیں۔

ذرائع کے مطابق نیاز اور ایاز دونوں نے کچے کی زمین سے مارٹن گولہ برآمد کیا جو گھر لے کر آئے تو انہوں نے مل کر ہتھڑوں سے توڑنے کی کوشش کی جس سے دھماکہ ہوا اور یہ واقعہ پیش آیا ہے۔

نگراں وزیراعلیٰ سندھ مقبول باقر نے کندھ کوٹ میں راکٹ لانچر واقع پر نوٹس لیتے ہوئے آئی جی سندھ سے رپورٹ طلب کرلی۔

مقبول باقر نے سوال کیا کہ راکٹ لانچر زنگی سبزوئی گوٹھ میں کیسے پہنچا، کیا کوئی اسلحہ کی کھیپ کچے میں اسمگل ہو رہی تھی یا ان کے سہولت کار موجود ہیں؟

نگراں وزیراعلیٰ نے آئی جی سندھ سے کہا کہ راکٹ لانچر کیسے بلاسٹ ہوئے جس سے اتنا جانی نقصان ہوا، تفصیلی رپورٹ دیں۔

دوسری جانب گورنر سندھ کامران خان ٹیسوری نے بھی کندھ کوٹ میں راکٹ پھٹنے کے واقعے کا نوٹس لیتے ہوئے آئی جی سندھ اور کمشنر لاڑکانہ سے رپورٹ طلب کرلی ہے۔

کامران ٹیسوری نے جاں بحق افراد کے ورثاء سے اظہار تعزیت کی اور زخمیوں کو بہترئین طبی سہولیات فراہم کرنے کی ہدایت کی۔

اس کے علاوہ سابق وزیر خارجہ اور چیئرمین پیپلز پارٹی بلاول بھٹو زرداری نے کندھ کوٹ کے قریب کچے کے علاقے میں گھر کے اندر راکٹ کا گولہ پھٹنے کے معاملے پر تحقیقات کا مطالبہ کردیا۔

بلاول بھٹو نے واقعے میں معصوم بچوں سمیت 8 افراد کی ہلاکتوں پر اظہارِ افسوس کرتے ہوئے کہا کہ سندھ اور پنجاب کے کچے کے علاقوں کو اسلحے سے پاک جب کہ جرائم کی آماجگاہ بننے سے روکنا ہوگا۔

راکٹ لانچر کا گولہ پٹھنے سے جاں بحق 9 افراد کی نماز جناز ادا

دوسری جانب کندھ کوٹ میں راکٹ لانچر کا گولہ پٹھنے سے جاں بحق ہونے والے 9 افراد کی نماز جناز ادا کردی گئی۔

نماز جنازہ میں سبزوئی قبیلے کے افراد سمیت علاقے کے معززین نے شرکت کی، نماز جنازہ کے بعد آبائی قبرستان میں تدفین کی گئی۔

اس افسوسناک واقعے کے بعد علاقے میں سوگ کا ماحول ہے۔