لاہور: مسافروں کے لیے بڑی خوش خبری سامنے آگئی۔

وزیر اعلی پنجاب کی ہدایت پر تیل کی قیمتوں میں کمی کے ریلیف کو عوام تک منتقلی کا آغاز کردیا گیا۔ ضلعی انتظامیہ کے موٹر ٹرانسپورٹ فیڈریشن کے عہدے داروں سے مذاکرات کامیاب ہوگئے۔

موٹر ٹرانسپورٹ فیڈریشن ٹرانسپورٹ کے کرایوں میں 10 فیصد تک کمی کرے گی، پرائیویٹ اڈوں سے چلنے والی ٹرانسپورٹ کے کرایوں میں بھی 10 فی صد فیصد تک کمی کی جائے گی۔

نگراں وزیراطلاعات اور پنجاب حکومت کے ترجمان نے کہا ہے کہ سرکاری اسکولوں کی نجکاری کا کوئی فیصلہ کیا گیا اور نہ ہی ایسا کوئی پروگرام زیر غور ہے۔

سیالکوٹ: سابق وفاقی وزیر دفاع اور مسلم لیگ (ن) کے رہنما خواجہ آصف نے کہا ہے کہ چودہ ماہ کی حکومت میں ہر روز لگتا تھا کہ اقتدار ختم ہوجائے گا، نواز شریف کی وطن واپسی سے مہنگائی آہستہ آہستہ کم ہوگی۔

اسلام آباد: ترجمان دفتر خارجہ کا کہنا ہے  کہ پاکستان نے غزہ کے لیے امدادی سامان  بھجوانے کا فیصلہ کرلیا ہے۔ 

ترجمان کے مطابق غزہ میں اسرائیلی جارحیت اور محاصرے  کے پیش نظر مظلوم  فلسطینی بھائیوں کو امداد کی فوری ضرورت ہے ۔

غزہ میں رونما ہونے والے انسانی المیے کے پیش نظر حکومت پاکستان نے فلسطینی بھائیوں  کے لیے فوری طور پر انسانی بنیادوں پر امداد  روانہ کرنے کا فیصلہ کیا ہے۔

ترجمان دفتر خارجہ نے کہا کہ فلسطینی ہلال احمر سوسائٹی، اقوام متحدہ کی متعلقہ ایجنسیوں، حمصر اور بیرون ملک پاکستانی مشنز کے ساتھ رابطے میں ہیں تاکہ امدادی سامان کی ترسیل کے طریقوں کو حتمی شکل دی جا سکے۔

 اسلام آباد: سابق صدر آصف علی زرداری اور جے یو آئی کے سربراہ مولانا فضل الرحمان کی اہم ملاقات ہوئی ہے۔

 صدر آصف علی زرداری اپنے پرانے اتحادی مولانا فضل الرحمان سے ملاقات کیلئے ان کی رہائش گاہ پہنچے، دونوں رہنماؤں کے درمیان ملاقات 50 منٹ تک جاری رہی۔

سابق صدر نے جے یو آئی سربراہ سے ان کی خوش دامن کے انتقال پر تعزیت کی جبکہ دونوں رہنماؤں نے ملک کی مجموعی سیاسی صورتحال پر بھی مشاورت ہوئی۔

جے یو آئی ایف کی جانب سے جاری اعلامیہ میں کہا گیا کہ سابق صدر آصف علی زرداری سربراہ جے یو آئی سے ان کی خوش دامن کے انتقال کے بعد اظہار تعزیت کیلئے آئے۔

ذرائع کے مطابق دونوں رہنماؤں کے درمیان 50 منٹ تک ملاقات جاری رہی، ملاقات میں مولانا عبدالغفور حیدری ، ڈاکٹر عاصم حسین، مولانا اسعد محمود اور رخسانہ بنگش بھی شریک ہوئے۔

ذرائع کے مطابق ملاقات میں ملکی سیاسی صورتحال اور آئندہ عام انتخابات کے امور بھی زیر غور آئے، یہ ملاقات ایسے تناظر میں ہوئی جب جے یو آئی اور پیپلز پارٹی قیادت کے درمیان گزشتہ کچھ عرصے کے دوران فاصلے بڑھے دونوں جماعتوں کے رہنماؤں کی جانب سے ایک دوسرے کے خلاف بیان بازی اور الزام تراشی بھی کی جاتی رہی ہے۔

کراچی: ضلع ملیر کے مختلف علاقوں میں زلزلے کے جھٹکے محسوس کیے گئے، ریکٹر اسکیل پر زلزلے کی شدت 3.1 ریکارڈ کی گئی۔

  پیر کی شب 11 بج کر 20 منٹ پر قائدآباد، بھینس کالونی ، بن قاسم ، گلشن حدید ،  مجید کالونی، مظفرآباد، شاہ لطیف ٹاؤن  میں زلزلے کے جھٹکے محسوس کیے گئے۔

لانڈھی اورمسلم آباد کالونی کے مکینوں نے بھی زلزلے کے جھٹکے محسوس کیے۔

زلزلہ پیما مرکز کے مطابق  ریکٹر اسکیل پر زلزلے کی شدت 3.1  ریکارڈ کی گئی اور اس کا مرکز 15 کلومیٹر گہرائی میں تھا۔

زلزلے کے موقع پر شہریوں کی بڑی تعداد خوفزدہ ہو کر کلمہ طیبہ کا ورد کرتے ہوئے گھروں سے باہر نکل آئے۔ زلزلہ پیما مرکز کا کہنا ہے کہ زلزلے کا مرکز قائد آباد کے قریب تھا جبکہ زلزلے کی گہرائی 15 کلو میٹر ریکارڈ کی گئی ہے۔ خوش قسمتی سے زلزلے کے نتیجے میں کوئی جانی یا مالی نقصان نہیں ہوا۔

 پشاور: سیکیورٹی فورسز نے جنوبی اور شمالی وزیرستان میں دو علیحدہ علیحدہ کارروائیوں میں دو دہشت گردوں کو ہلاک کردیا جبکہ فائرنگ کے تبادلے میں دو سپاہی بھی شہید ہوگئے۔

پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق 16 اکتوبر 2023 کو شمالی اور جنوبی وزیرستان کے اضلاع میں اپنے ہی فوجیوں اور دہشت گردوں کے درمیان دو شدید مقابلے ہوئے۔

پہلی جھڑپ ضلع جنوبی وزیرستان کے عام علاقے اسمان منزہ میں ہوئی، جہاں دہشت گردوں کے ٹھکانے کو مؤثر انداز سے نشانہ بنایا گیا، اس دوران فائرنگ کے تبادلے میں ایک دہشت گرد ہلاک جبکہ ایک زخمی ہو گیا۔

آئی ایس پی آر کے مطابق تاہم شدید فائرنگ کے تبادلے کے دوران سپاہی ساجد اعظم (عمر 31 سال، ساکن کوٹلی، آزاد کشمیر) نے بہادری سے لڑتے ہوئے شہادت کو گلے لگا لیا۔

دوسری کارروائی شمالی وزیرستان کے ضلع میران شاہ کے عام علاقے میں کی گئی، جہاں دہشت گردوں اور فورسز کے درمیان فائرنگ کے شدید تبادلے میں ایک دہشت گرد ہلاک ہوا جبکہ سپاہی کرک کے رہائشی 27 سالہ سپاہی وارث خان نے جام شہادت نوش کیا۔

ترجمان پاک فوج کے مطابق دونوں علاقے میں دہشت گردوں کے خلاف سرچ آپریشن جاری ہے۔

آئی ایس پی آر کے اعلامیے میں مزید کہا گیا ہے کہ پاکستان کی سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں اور بہادر جوانوں کی ایسی قربانیاں ہمارے عزم کو مزید مضبوط کرتی ہیں۔

 لاہور: چیئرمین پی ٹی آئی کی ضمانتیں خارج کرنے کے فیصلے کے خلاف درخواستیں لاہور ہائی کورٹ میں سماعت کے لیے مقرر کرلی گئیں۔

جناح ہاؤس حملہ کیس سمیت 7 مختلف مقدمات میں چیئرمین پی ٹی آئی عمران خان کی عبوری ضمانتیں خارج کرنے کے فیصلے کے خلاف درخواستیں سماعت کے لیے مقرر   کرلی گئیں۔ لاہور ہائیکورٹ کی جسٹس عالیہ نیلم کی سربراہی میں 2 رکنی بینچ آج چیئرمین پی ٹی آئی کی درخواستوں پر سماعت کرے گا ۔

درخواست میں سپرنٹنڈنٹ اٹک جیل سمیت دیگر کو فریق بنایا گیا  ہے۔ چیئرمین پی ٹی آئی نے بیرسٹر سلمان صفدر ایڈووکیٹ کی وساطت سے ضمانتوں کو چیلنج کیا۔ درخواست میں مؤقف اختیار کیا گیا ہے کہ درخواست گزار کو سیاسی انتقام کا نشانہ بنایا جارہا ہے ۔ درخواست گزار کو 5 اگست کو توشہ خانہ کے کیس میں حقائق کے برعکس سزا ہوئی ۔ سزا کے فوری بعد پولیس نے درخواست گزار کو گرفتار کرلیا ۔

لاہور ہائی کورٹ سے استدعا  کی گئی ہے کہ عدالت ضمانتوں کو میرٹ کی بنیاد پر سننے کا حکم دے ۔

واضح رہے کہ دہشت گردی عدالت نے 9 و مئی مقدمات میں چیئرمین پی ٹی آئی کی ضمانتوں کو خارج کیا تھا۔