اسلام آباد:(ویب ڈیسک) وفاقی وزیر برائے ماحولیاتی تبدیلی شیری رحمان نے کہا ہے کہ پاکستان کا فضائی آلودگی میں حصہ ایک فیصد سے بھی کم ہے، مگر یہاں ہم 45 ڈگری سینٹی گریڈ کا درجہ حرارت برداشت کر رہے ہیں۔
اسلام آباد میں بزنس سمٹ سے خطاب کرتے ہوئے شیری رحمان نے کہا ہے کہ عالمی مالیاتی ادارے اس لئے بنائے گئے ہیں تا کہ ترقی پذیر ممالک کی معاونت کریں، فرانس میں ہونے والی کانفرنس عالمی مالیاتی نظام کی تنظیم نو کرے گی، پاکستان نے کوپ 27 میں موقع حاصل کیا اور ایک گروپ کو متحد کیا ہے، پاکستان ماحولیاتی آلودگی کے اہداف کو حاصل کر لے گا۔
وفاقی وزیر ماحولیاتی تبدیلی نے کہا ہے کہ موجودہ مالیاتی نظام کلائمیٹ فنانس اہداف کیلئے موزوں نہیں ہے یہ کام نہیں کر سکے گا کیونکہ ماحولیاتی تبدیلی کیلئے ہزاروں ارب ڈالر کی ضرورت ہے، بھارت ہمارے پڑوس میں ایک بڑا آلودگی پھیلانے والا ہے، ایڈ اور فنڈنگ پائلٹس میں نہ لائیں چند اضلاع میں کام کرنے سے فائدہ نہیں ہو رہا ہے، پلاسٹک کو عالمی سطح پر ختم کیا جا رہا ہے۔
انہوں نے مزید کہا ہے کہ پلاسٹک ہمارے سمندروں میں چھا رہا ہے، پاکستان سالانہ دو کے ٹو کے مساوی پلاسٹک کا کچرا پیدا کرتا ہے، ان صنعتوں کی معاونت کی جائے جو کہ اپنے کاروبار اور کاموں کو گرین پر منتقل کر رہے ہیں، حکومتیں آلودگی نہیں پھیلا رہی ہیں، بڑی صنعتیں اور کمپنیاں سب سے بڑی آلودگی پھیلانے والی ہیں، شام کو مارکیٹس کیوں 6 بجے کے بعد کھلی رہتی ہیں۔

لاہور:(ویب ڈیسک) وزیر اعظم کے مشیر برائے امور کشمیر قمر زمان کائرہ نے کہا ہے کہ پیپلز پارٹی میں بہت سارے لوگ شمولیت اختیار کر رہے ہیں، اب انہیں اس جماعت بارے پتا چل گیا تو واپس آ رہے ہیں، ہم جماعتوں پر پابندیوں کے خلاف ہیں۔
لاہور میں پریس کانفرنس کرتے ہوئے قمر زمان کائرہ نے کہا ہے کہ اس وقت سیاسی محاذ پر بڑی کشیدگی ہے، خواتین کے حوالے سے جنسی زیادتی کے گھٹیا الزامات لگائے جا رہے ہیں، سوشل میڈیا کے ذریعے جعلی خبریں پھیلائی جاتی ہیں، سوشل میڈیا پر الزامات کی بارش ہو رہی ہے، ایک بیٹی کو بالوں سے پکڑا گیا ہم نے بھی مذمت کی، وہ خاتون پولیس والوں کو گالیاں اور پتھرمار رہی تھی۔
وزیر اعظم کے مشیر برائے کشمیر قمر زمان کائرہ نے کہا ہمارے قائد کو سکھر کی سی کلاس جیل میں رکھا گیا، یہ ایک دن جیل میں رہے تو چیخیں نکل گئی ہیں، اگر کسی نے کوئی جرم کیا تو فیئر ٹرائل کے بعد سزا اور جزا کا فیصلہ ہونا چاہیے، کریمنل، انسداد دہشت گردی اور آرمی ایکٹ کے تحت ٹرائل ہوں گے، کسی کا ملٹری کورٹ کے تحت ٹرائل ہوتا ہے تو تین دفعہ اپیلوں کا حق ہو گا۔
قمر زمان کائرہ نے مزید کہا ہے کہ ماضی میں ملٹری کورٹ کا استعمال بہت خوفناک ہے، تمام ذمہ دار عناصر کو قانون کے مطابق قرار واقعی سزا ملنی چاہیے، القادر ٹرسٹ کیس کی تحقیقات تو نو مئی سے پہلے ہو رہی تھی، انہیں تو بن مانگے بھی عدالت سے ریلیف مل جاتا ہے۔

ملتان:(ویب ڈیسک) پی پی 269 سے ٹکٹ ہولڈر رفاقت گیلانی نے پاکستان تحریک انصاف چھوڑنے کا اعلان کر دیا۔
پریس کانفرنس کرتے ہوئے تحریک انصاف کے پی پی 269 سے ٹکٹ ہولڈر رفاقت گیلانی کا کہنا تھا کہ 9 مئی کے واقعات کی مذمّت کرتا ہوں، شہداء کی یادگاروں کی بے حرمتی پر افسردہ ہوں۔
انہوں نے کہا کہ میرے نوٹس میں نہیں ہے کہ 9 مئی واقعات کی پلاننگ ہوئی، 9 مئی کو دنیا میں بڑا غلط تاثر گیا، 9 مئی واقعات میں جو بھی ملوث ہے ان کو سخت سے سخت سزا ملنی چاہئے۔
رفاقت گیلانی نے کہا کہ تشدد کی سیاست کبھی کی اور نہ کرنا چاہتے ہیں، تحریک انصاف کی ٹکٹ واپس کر رہا ہوں، پی ٹی آئی کو چھوڑنے کا اعلان کرتا ہوں، مجھ پر کسی قسم کا کوئی دباؤ نہیں، حلقے کے عوام کی مشاورت سےاگلا قدم اٹھاؤں گا۔

پشاور:(ویب ڈیسک) مسلم لیگ ق کی رہنما عائشہ گلالئی نے کہا ہے کہ خیبر پختونخوا میں 10 سال کے دوران طالبان کی آباد کاری کی گئی۔
پریس کانفرنس کرتے ہوئے عائشہ گلالئی کا کہنا تھا کہ پاکستان مسلم لیگ ق تقسیم، نفرت کی سیاست نہیں کرتی، انہوں نے کہا کہ آج پاکستان ڈیفالٹ تک پہنچ گیا ہے، مالی مشکلات بڑھ گئی ہیں، عوام بنیادی سہولیات سے محروم ہیں۔
انہوں نے کہا کہ آج ملک میں معاشی بحران سمیت بجلی اور دیگر سہولیات میسر نہیں، خیبرپختونخوا میں دس سال حکومت کرنے والے نے عوام کو کچھ نہیں دیا۔

پشاور:(ویب ڈیسک) مسلم لیگ (ق) کے مرکزی رہنما چودھری سرور نے کہا ہے کہ ہر موڑ پر تحریک انصاف کی قیادت کو سمجھاتا رہا لیکن وہ نہیں سمجھے، مخالفین کو بدنام کرتے کرتے تحریک انصاف خود تباہ ہو گئی۔
پشاور میں پریس کانفرنس کرتے ہوئے سابق گورنر پنجاب چودھری سرور نے کہا ہے کہ 75 سالوں سے چند ایک چہرے ہی قومی و صوبائی اسمبلیوں پر قابض ہیں، تحریک انصاف کا منشور الزامات کے سوا کچھ نہیں، پی ڈی ایم کا بھی کوئی منشور نہیں سوائے توشہ خانہ اور سکینڈلز کے، اس وقت ملک کو مخلص قیادت کی ضرورت ہے۔
چودھری سرور نے کہا سیاست کو قربان کر کے ریاست بچانے کی دعویدار تحریک انصاف ریاست ڈبونے نکل پڑی، اس قوم کے مسائل حل کرنے میں پی ڈی ایم بھی ناکام ہے، متوسط لوگوں کو دعوت دیتا ہوں آئیں ہمیں جوائن کریں، یقین دلاتا ہوں اپنے کارکنان اور ورکرز کو عزت دوں گا، ہم نے خود سے سوال کرنا ہے کیا ہم نے منارٹیز کو حقوق دیئے ہیں، کیا ہم نے اپنی خواتین کو تحفظ دیا ہے؟۔
سابق گورنر پنجاب چودھری سرور نے مزید کہا ہے کہ آج ملک میں سیکڑوں خواتین پر تیزاب پھینکا جاتا ہے، ملک میں جزا اور سزا کا نظام ہونا چاہیے، جب میں گورنر تھا تو لوگوں کو پینے کا صاف پانی دیا، میں نے یونیورسٹیز کے وائس چانسلرز میرٹ پر لگائے، ہمارے ملک میں کرپشن ہے لیکن کوئی ڈائریکشن نہیں ہے، مل کر پاکستان کو اس دلدل سے نکال سکتے ہیں۔

کراچی:(ویب ڈیسک) سندھ ہائیکورٹ نے بڑا حکم جاری کرتے ہوئے تھری ایم پی او کے تحت نظر بندی کا نوٹیفکیشن معطل کر دیا، سانگھڑ، میرپور خاص، جیکب آباد، شہید بے نظیرآباد، سکھر و دیگر جیلوں میں نظربند شہریوں کو رہا کرنے کا حکم دے دیا۔
سندھ ہائیکورٹ نے نظربند شہریوں کو 10، 10 ہزار روپے کے مچلکے جمع کروانے کی ہدایت کرتے ہوئے اپنے حکم میں کہا ہے کہ شہری کسی اور جرم میں پولیس کو مطلوب نہیں ہیں تو رہا کیا جائے، دوسرے مقدمات میں گرفتار ملزمان کو بھی اندرون سندھ کی جیلوں سے کراچی منتقل کیا جائے، جن شہریوں کا نظر بندی کا نوٹیفکیشن معطل کیا گیا ہے وہ ضمانت کیلئے متعلقہ عدالت سے رجوع کریں۔
دوران سماعت چیف جسٹس سندھ ہائی کورٹ نے ریمارکس دیتے ہوئے کہا کہ لوگوں کے پاس کھانے کے پیسے نہیں ہیں وہ اندرون سندھ ملاقات کیلئے کیسے جائیں گے؟، سکھر جیل میں نظربند خاتون کو پولیس سکیورٹی اور سیفٹی میں واپس کراچی منتقل کرنے کے حکم پر خاتون کی نظر بندی کا نوٹیفکیشن واپس لے لیا گیا۔
چیف جسٹس نے استفسار کیا کہ جن افراد کو اندرون سندھ کی جیلوں سے رہا کیا گیا لوگ ان کو لینے کیلئے وہاں کیسے جائیں؟، لوگوں کی جیب میں تو پیسے ہی نہیں ہیں، ایڈیشنل ایڈووکیٹ جنرل سندھ، محکمہ داخلہ سندھ نے تحریری جواب جمع کرانے کیلئے مہلت مانگ لی، عدالت نے درخواستوں کی سماعت موسم گرما کی تعطیلات کے بعد تک ملتوی کر دی۔

اسلام آباد:(ویب ڈیسک) وزیر اعظم شہباز شریف ترکیہ کے صدر رجب طیب اردوان کی دعوت پر ترکیہ کا دورہ کریں گے۔
ترجمان دفتر خارجہ ممتاز زہرا بلوچ نے ہفتہ وار بریفنگ میں بتایا کہ وزیر اعظم شہباز شریف 3 جون کو ترکیہ کا اہم دورہ کریں گے، وزیر اعظم ترکیہ کے صدر رجب طیب اردوان کو پاکستان کے دورے کی بھی دعوت دیں گے۔
ترجمان کا مزید کہنا تھا کہ وزیر اعظم شہباز شریف کا دورہ ترکیہ، پاکستان اور ترکیہ کے دیرینہ اور دوستانہ تعلقات کا عکاس ہے۔

اسلام آباد:(ویب ڈیسک) وزیراعظم کے معاون خصوصی عطا تارڑ کاکہنا ہے کہ9مئی کے واقعات ایک سوچی سمجھی منصوبہ بندی تھی، شرپسند کسی رعایت کے مستحق نہیں ہیں ۔
اسلام آباد میں پریس کانفرنس کرتے ہوئے پاکستان مسلم لیگ ن کے رہنما و وزیراعظم کے معاون خصوصی عطا تارڑ کاکہنا ہے کہ پارٹی چیئرمین نے کارکنان کو ہدایات جاری کررکھی تھیں، لوٹے ہوئے70ارب روپے قوم کے پیسے تھے، فوجی تنصیبات پر دھاوا بولنے والوں نے ملکی سالمیت پر حملہ کیا ہے۔
انہوں نے کہاکہ قوم کا 190 ملین پاؤنڈ قومی خزانے میں نہیں جمع کروایا گیا،9 مئی کے واقعات پر شہید قرار دے کر فوٹیج چلوا کر پروپیگنڈا کیاگیا،ایک واقعہ ہوا ہی نہیں اس کو اصل بنا کرپیش کیاگیا،جھوٹی تصاویر اور ویڈیوز کو 9 مئی سے لنک کیا جارہا ہے۔
عطاتارڑ نے کہا کہ کسی خاتون کے ساتھ بدتمیزی کا تصور نہیں کیا جاسکتا ، کسی خاتون کے ساتھ نہ بدتمیزی ہوئی نہ زیادتی کا نشانہ بنایا گیا ، بیرون ملک سے مدداور عالمی میڈیا کی توجہ کیلئے جھوٹی مہم چلائی گئی، خواتین محفوظ ہیں اور جیل مینوئل کے مطابق جو سہولیات ہیں، انہیں دی جارہی ہیں۔
انہوں نے کہا کہ ہر وہ کام کیا جارہا ہے جو جرائم پیشہ اور ملک دشمن لوگ کرتے ہیں، آفیشل اکاؤنٹ سے ٹویٹ کرتے ہیں اور پھر ڈیلیٹ کردیتے ہیں، بچوں کا نام لے کر سیاست نہ کی جائے ۔
عطاتارڑ کاکہنا تھا کہ شرپسندوں کو کیفر کردار تک پہچنا ہے ، یہ کسی رعایت کے مستحق نہیں ہیں، قانون کے آہنی ہاتھ ان سے نمٹیں گے۔

اسلام آباد:(ویب ڈیسک) سابق سپیکر قومی اسمبلی اسد قیصر نے تھری ایم پی او کے تحت گرفتاری سے بچنے کیلئے اسلام آباد ہائیکورٹ سے رجوع کرلیا۔
اسلام آباد ہائیکورٹ میں دائر درخواست میں رہنما تحریک انصاف اسد قیصر نے کہا کہ 9 مئی کے واقعات کے بعد ہماری جماعت کے رہنماؤں کو تھری ایم پی او اور مختلف مقدمات میں گرفتار کیا گیا، میرے خلاف دو بے بنیاد مقدمات درج کیے گئے جن میں ضمانت لے رکھی ہے، خدشہ ہے کہ مجھے بھی تھری ایم پی او کے تحت گرفتار کرلیا جائے گا۔
درخواست میں استدعا کی گئی ہے کہ ڈپٹی کمشنر اسلام آباد سے تھری ایم پی او کے تحت کارروائی کی تفصیلات طلب کی جائیں، ڈپٹی کمشنر کو تھری ایم پی او کے تحت گرفتاری کا آرڈر جاری کرنے سے روکا جائے، گرفتاری مطلوب ہے تو بتایا جائے کہ کن وجوہات پر تھری ایم پی او کی کارروائی بنتی ہے۔

لاہور:(ویب ڈیسک) قومی احتساب بیورو (نیب) نے سابق وزیراعلیٰ پنجاب سردار عثمان بزدار کو آمدن سے زائد اثاثوں کے کیس میں 5 جون کو طلب کر لیا۔
سابق وزیراعلیٰ پنجاب عثمان بزدار کو آمدن سے زائد اثاثہ جات کی انکوائری میں دسویں مرتبہ طلب کیا گیا ہے، نیب کیجانب سے تحقیقات کیلئے بار بار طلبی پر عثمان بزدار صرف 2 مرتبہ پیش ہوئے ہیں، نیب طلبی کے نوٹس عثمان بزدار کی لاہور اور آبائی رہائش گاہ ڈی جی خان ارسال کیے گئے ہیں۔
نیب ذرائع کے مطابق عثمان بزدار نیب تفتیش میں لیت و لعل سے کام لے رہے ہیں، نیب عثمان بزدار کیخلاف مجموعی طور پر 9 ارب سے زائد مالیت کے اثاثہ جات بنانے پر تحقیقات کر رہا ہے۔
عثمان بزدار نے تاحال ایسیٹ ڈکلیریشن پرفارمہ پر مکمل تفصیلات نیب کو فراہم نہیں کیں جس پر نیب ٹیم کو تشویش ہے، سابق وزیر اعلیٰ پنجاب کیخلاف اہم پیشرفت کے طور پر نیب نے محکمہ سی اینڈ ڈبلیو سے عثمان بزدار دور کے تمام منصوبہ جات کی تفصیلات بھی 5 جون تک طلب کر لی ہیں۔
ذرائع کا مزید کہنا ہے کہ عثمان بزدار کیجانب سے عدم تعاون کی صورت میں تادیبی کارروائی پر بھی غور کیا جا رہا ہے، نیب ٹیم نے آخری مرتبہ عثمان بزدار کو 30 مئی کو طلب کیا تھا لیکن وہ بیماری کے باعث پیش نہیں ہوئے۔