فلوریڈا: (ویب ڈیسک) سمندری طوفان ’’آئن‘‘امریکی ریاست فلوریڈا کے ساتھ ٹکرا گیا۔ 241 کلومیٹر فی گھنٹہ کی رفتار سے چلنے والی ہواؤں نے تباہی مچادی، درخت جڑوں سے اکھڑگئے، سیکڑوں گھروں کو بھی نقصان پہنچا۔ امریکی ریاست فلوریڈا میں کیٹیگری 4 کے طوفان کے باعث موسلادھار بارشیں ہوئیں، بارشوں کے بعد فلوریڈا کے کئی علاقوں میں سیلابی صورتحال پیدا ہوگئی، تیز بارشوں اور سیلاب کے باعث معمولات زندگی درہم برہم ہوگئے،فلوریڈا میں پہلے ہی ایمرجنسی نافذ ہے،سکول اور ایئرپورٹس بند ہیں۔ فلوریڈا کے ساحل کے قریب پناہ گزینوں کی کشتی کو حادثہ پیش آگیا، کیوبا سے آنے والی کشتی طوفان کی زد میں آکر الٹ گئی، 23 افراد طوفان میں لاپتہ ہوگئے جبکہ 4 ساحل پہنچنے میں کامیاب رہے، میڈیا رپورٹس کے مطابق کشتی میں زیادہ تر کیوبا سے آنے والے پناہ گزین تھے۔

ویتنام: (ویب ڈیسک) سمندری طوفان ’’نورو‘‘ نے ویتنام کے مختلف علاقوں میں تباہی مچادی، سکول، دکانیں اور کئی ایئرپورٹس بند، متعدد علاقوں میں کرفیو نافذ کر دیا گیا۔ سمندری طوفان ویتنام کے ساحلی علاقوں سے ٹکراگیا، تیز ہواؤں نے اونچی عمارتوں کو ہلا کر رکھ دیا ہے،طوفان کے باعث 183 کلومیٹر فی گھنٹہ کی رفتار سے ہوائیں چلتی رہیں، بارشوں کا سلسلہ شروع ہونے سے کئی نشیبی علاقوں میں پانی جمع ہوگیا۔ حکام نے لینڈ سلائیڈنگ اور سیلابی صورتحال کا خدشہ ظاہر کیا ہے، طوفان سے ملک کے آدھے ایئرپورٹس بند ہوگئے، سکول اور دکانیں بھی کھولنا ممکن نہیں رہا، کئی علاقوں میں کرفیو نافذ کرنا پڑا، جو علاقے زیادہ متاثر ہونے کا خدشہ ہے وہاں سے 2لاکھ 60 ہزار لوگوں کو نکال لیا گیا ہے۔

واشنگٹن: (ویب ڈیسک) وزیرخارجہ بلاول بھٹو زرداری نے کہا ہے سیلاب سے نقصان کا تخمینہ 30ارب ڈالر سے بھی بڑھ سکتا ہے، دورہ امریکا کا اولین مقصد سیلاب زدگان کیلئے مدد حاصل کرنا ہے، عمران خان نے خارجہ پالیسی اور معیشت کو نقصان پہنچایا، غلطی عمران خان کرے اور سزاسد مجید کو ملے یہ تو ناانصافی ہوگی۔ وزیرخارجہ بلاول بھٹو نے امریکا میں پریس کانفرنس کے دوران سابق وزیراعظم کو نشانے پر رکھ لیا، بلاول بھٹو نے عمران خان پر کھل کر تنقید کی۔ بلاول بھٹو نے کہا عمران خان نے خارجہ تعلقات اور معیشت کو نقصان پہنچایا، غلطی عمران خان کرے اور سزا اسد مجید کو ملے یہ تو ناانصافی ہوگی، پاکستان کے امریکہ سے تعلقات میں بہتری آئی ہے، چھ ماہ پہلے اور آج کے پاکستان میں بہت فرق ہے، اسد مجید اپنی ذمہ داریاں ادا کررہے ہیں، غیرقانونی کام عمران خان نے کیا۔ وزیرخارجہ نے کہا دورہ امریکا کا اولین مقصد سیلاب زدگان کے لیے مدد حاصل کرنا تھا، وزیراعظم کی وہاں اہم ملاقاتیں ہوئیں، کورونا اور یوکرین جنگ کے باعث دنیا کو مہنگائی کا سامنا کرنا پڑا۔ انہوں نے کہا ہے کہ حال ہی میں آئی ایم ایف سے معاہدہ ہوا اور سیلاب آگیا، سیلاب سے نقصان کا تخمینہ30ارب ڈالر سے بڑھ سکتا ہے، سیلاب سے بڑی تباہی آئی، حکومت اور اپوزیشن کو ملکر کام کرنا ہوگا، ریلیف کے مراحل ابھی باقی ہیں، متاثرین کیلئے جتنا بھی کرلیں ناکافی ہے، سیکرٹری جنرل، یو این نے سیلاب کو ایجنڈے پر سرفہرست رکھا، ابھی تک جتنی بھی مدد ملی اس پر دنیا کے شکرگزار ہیں۔ وزیرخارجہ بلاول بھٹو کا کہنا تھا پاکستان اور بھارت کو موسمیاتی تبدیلی پر ملکر کام کرنا ہوگا، ان مسائل پر اتفاق نہ ہوا تو دنیا کو نقصان ہوگا، موسمیاتی تبدیلی کا شکار 10 بڑے ممالک کو آواز بلند کرنا ہوگی۔

اسلام آباد : (ویب ڈیسک) ملک بھر میں کورونا وائرس کے وار تھمنے لگے ہیں، مثبت کیسز کی شرح میں نمایاں کمی ہو گئی ہے۔ قومی ادارہ صحت ( این آئی ایچ) کی رپورٹ کے مطابق گزشتہ 24 گھنٹوں کے دوران ملک بھر میں 11 ہزار 226 کورونا ٹیسٹ کئے گئے ہیں۔ این آئی ایچ کی جانب سے جاری کردہ اعداد و شمار کے مطابق گزشتہ 24 گھنٹوں کے دوران 67 افراد کے کورونا ٹیسٹ مثبت آئے ہیں۔ قومی ادارہ صحت کے مطابق گزشتہ 24 گھنٹوں میں کئے گئے مثبت کورونا ٹیسٹ کی شرح 0.60 فیصد رہی ہے، مزید برآں اس دوران کورونا وائرس سے ایک مریض جاں بحق ہوا جبکہ 85 مریضوں کی حالت تشویشناک ہے۔