اسلام آباد: (ویب ڈیسک) اسلام آباد ہائی کورٹ نے پشاور اور واہ کینٹ کے کنٹونمنٹ بورڈز اور بلدیاتی اداروں کو کام سے روکنے کا حکم معطل کردیا۔
اسلام آباد ہائی کورٹ میں دو کنٹونمنٹ بورڈز میں بلدیاتی حکومتوں کو معطل کئے جانے کیخلاف درخواست کی سماعت کے بعد دو پٹشنرز کی حد تک الیکشن کمیشن کا حکم معطل کر دیا گیا۔
عدالت نے کنٹونمنٹ بورڈ پشاور اور کنٹونمنٹ بورڈ واہ کو کام جاری رکھنے کی ہدایت دیتے ہوئے کہا کہ الیکشن ابھی ہوا نہیں صرف شیڈول آیا ہے اور آپ نے معطلی کا نوٹیفکیشن جاری کردیا، الیکشن کمیشن بتائے لوکل باڈیز کو کام سے کیوں روکا گیا اور بلدیاتی نمائندوں کو کس قانون کے تحت معطل کیا گیا؟
چیف جسٹس اسلام آباد ہائیکورٹ جسٹس عامر فاروق نے کہا کہ ابھی صرف درخواست گزاروں کی حد تک نوٹیفکیشن معطل کرتا ہوں، آئندہ سماعت پر الیکشن کمیشن عدالت کو مطمئن کرے۔
بعدازاں اسلام آباد ہائی کورٹ نے کیس کی مزید سماعت 14 مارچ تک کے لئے ملتوی کردی۔

اسلام آباد: (ویب ڈیسک) الیکشن کمیشن آف پاکستان نے چیئرمین پی ٹی آئی عمران خان کو پارٹی سربراہی سے ہٹانے کے کیس کی سماعت میں جواب جمع کرانے کی ہدایت کردی۔
الیکشن کمیشن میں کیس کی سماعت کے دوران عمران خان کے وکیل نے کہا کہ درخواست گزار آفاق احمد تو پیش ہی نہیں ہو رہا، عدم پیروی پر عمران خان کیخلاف درخواست خارج کی جائے، جس پر الیکشن کمیشن کے رکن کے پی نے کہا کہ آپ اپنے دلائل دیں، پھر اس معاملے کو دیکھیں گے۔
عمران خان کے وکیل بیرسٹر گوہر نے بتایا کہ لاہور ہائیکورٹ الیکشن کمیشن کو عمران خان کیخلاف کارروائی سے روک چکی ہے، الیکشن کمیشن کے ممبر کے پی اکرام اللہ نے جواب دیا کہ حکم امتناع تو نااہلی کے ڈیکلریشن دینے کی حد تک لگ رہا ہے۔
وکیل نے کہا کہ لاہور ہائیکورٹ نے معاملہ فل بنچ کو بھجوا دیا ہے، جس پر ممبر کے پی نے کہا کہ لاہور ہائیکورٹ میں جو درخواست دائر کی تھی اس کی کاپی فراہم کریں، وکیل نے بتایا کہ الیکشن کمیشن کا پارٹی سربراہی سے ہٹانے کا نوٹس چیلنج کیا گیا ہے، لاہور ہائیکورٹ کے حکمنامے میں الیکشن کمیشن کا نوٹس موجود ہے۔
الیکشن کمیشن کے ممبر کے پی نے کہا کہ درخواست آتی ہے تو آپ لوگ ہائیکورٹ پہنچ جاتے ہیں، سٹے آرڈر کے بعد ہمارا کام صرف آنا بیٹھنا اور جانا رہ گیا ہے، دوران سماعت ممبر بلوچستان نے کہا کہ ہائیکورٹ نے کیس چلانے سے نہیں روکا۔
عمران خان کے وکیل کا کہنا تھا کہ موجودہ کیس میں الیکشن کمیشن نے سوموٹو لیا ہے، جس پر ممبر کے پی اکرام اللہ نے جواب دیا کہ الیکشن کمیشن سوموٹو لیتا ہے نہ ایسا کوئی اختیار ہے، درخواست گزار کو بھی نوٹس کر رہے ہیں وہ دلچسپی رکھتا ہے یا نہیں۔
بعد ازاں الیکشن کمیشن نے پارٹی سربراہی سے ہٹانے کے کیس میں عمران خان کو جواب جمع کرانے کی ہدایت کرتے ہوئے آئندہ سماعت 7 مارچ تک ملتوی کردی۔

منڈی بہاؤالدین: (ویب ڈیسک) دیرینہ دشمنی کے باعث مخالفین نے فائرنگ کر کے 2 افراد کو موت کے گھاٹ اتار دیا۔
پولیس ذرائع کے مطابق یہ افسوسناک واقعہ نواحی گاؤں 33 چک میں پیش آیا جہاں مخالفين کی اندھا دھند فائرنگ کی زد میں آکر 2 افراد موقع پر ہی جاں بحق اور ایک نوجوان شدید زخمی ہوگیا۔
چند روز قبل مخالفین کے 4 افراد کو سابقہ دشمنی پر قتل کیا گیا تھا، پوليس کی بھاری نفری جائے وقوعہ پر پہنچ گئی، ملزمان پولیس کے پہنچنے سے قبل ہی موقع سے فرار ہوگئے۔
پولیس کا مزید کہنا ہے کہ واقعہ کی تحقیقات کا آغاز کر دیا گیا ہے، ملزمان کو جلد گرفتار کر لیں گے۔

اسلام آباد: (ویب ڈیسک) پاکستان تحریک انصاف (پی ٹی آئی) کے رہنما اور سابق وفاقی وزیر اسد عمر نے کہا ہے کہ انتخابات کی تاریخ دینے میں تاخیر کرکے الیکشن کمیشن توہین عدالت کا مرتکب ہو رہا ہے۔
سماجی رابطے کی ویب سائٹ ٹوئٹر پر اپنے پیغام میں پی ٹی آئی کے جنرل سیکرٹری اسد عمر نے کہا کہ 4 دن سے زیادہ ہوگئے عدالت کا فیصلہ آئے، الیکشن کمیشن اپنی آئینی ذمہ داری سے انحراف کر رہا ہے۔
پی ٹی آئی رہنما نے مطالبہ کیا کہ الیکشن کمیشن گورنر سے مشاورت کرکے فوری طور پر پنجاب اسمبلی الیکشن کی تاریخ کا اعلان کرے۔

اسلام آباد: (ویب ڈیسک) پاکستان تحریک انصاف کے سابق ارکان قومی اسمبلی پارلیمنٹ لاجز میں رہائش کی مد میں نادہندہ نکلے ہیں۔
دستاویز کے مطابق سابق ارکان اسمبلی پر پارلیمنٹ لاجز کے کرائے، بجلی اور سوئی گیس کی مد میں لاکھوں روپے واجب الادا ہیں۔
دستاویز کے مطابق سابق وفاقی وزیر فخر امام پارلیمنٹ لاجز کے 2 لاکھ 59 ہزار روپے کے نادہندہ نکلے، فخر امام پر لاجز میں رہائشگاہ کے بجلی کے بل کی مد میں 49 ہزار سے زائد روپے واجب الادا ہیں، فخر امام گھر کے کرائے کی مد میں 2 لاکھ 10 ہزار روپے کے نادہندہ ہیں۔
سابق وفاقی وزیر علی زیدی بھی پارلیمنٹ لاجز کے ایک لاکھ 51 ہزار روپے کے نادہندہ ہیں، پی ٹی آئی رہنما صداقت عباسی کے ذمے پارلیمنٹ لاجز کے ساڑھے 7 لاکھ روپے واجب الادا ہیں، پی ٹی آئی رہنما کنول شوزب 5 لاکھ 98 ہزار کی نادہندہ ہیں جبکہ منور بی بی 16 لاکھ 12 ہزار کی نادہندہ ہیں، عاصمہ قدیر 4 لاکھ روپے اور عندلیب عباس 60 ہزار روپے کی نادہندہ ہیں، سابق رکن اسمبلی ابراہیم خان 60 ہزار،کرامت علی کھوکھر 85 ہزار کے نادہندہ ہیں۔
دستاویز کے مطابق امجد علی خان کے ذمے 43 ہزار روپے واجب الادا ہیں، حیدر علی خان 13 لاکھ 92 ہزار، علی خان جدون 56 ہزار، مجاہد علی 11 لاکھ 67 ہزار کے نادہندہ ہیں جبکہ شیرعلی ارباب پر 3 لاکھ 61 ہزار اور گل داد خان کے ذمے 2 لاکھ 96 ہزار واجب الادا ہیں۔
اس کے علاوہ ساجد خان ایک لاکھ 92 ہزار، عامر محمود کیانی 2 لاکھ 69 ہزار کے نادہندہ نکلے، شوکت علی بھٹی 8 لاکھ 40 ہزار اور ملک عمر اسلم 60 ہزار روپے کے نادہندہ ہیں۔

لاہور: (ویب ڈیسک) لاہور ہائی کورٹ نے پنجاب میں انتخابات کی تاریخ کے معاملے پر الیکشن کمیشن کو رپورٹ جمع کرانے کی ہدایت کردی۔
جسٹس جواد حسن نے عدالتی احکامات کے باوجود پنجاب میں الیکشن کی تاریخ نہ دینے پر الیکشن کمیشن اور گورنر پنجاب کے خلاف توہین عدالت کی درخواست پر سماعت کی۔
دوران سماعت جسٹس جواد حسن نے ریمارکس دئیے کہ اظہر صاحب آپ کی درخواست اتنی جلدی لگ کیسے جاتی ہے؟ آپ کو اتنی جلدی کیا ہے، کیا آپ کو عدالتوں پر اعتماد نہیں ہے؟، عدالت نے استفسار کیا کہ الیکشن کمیشن اور گورنر کے وکیل کہاں ہیں؟ کیا الیکشن کمیشن نے کوئی اپیل دائر کی ہے؟
جسٹس جواد حسن نے کہا کہ عدالت نے اپنا کام کردیا ہے، اب عدالت انتظار کر رہی ہے وہ کیا کر رہے ہیں، درخواست گزار کے وکیل نے عدالت کو بتایا کہ الیکشن کمیشن نے پریس ریلیز جاری کی ہے، گورنر نے تاریخ دینے سے انکار کیا ہے۔
جسٹس جواد حسن نے کہا کہ عدالت پریس ریلیزوں کو نہیں مانتی، الیکشن کمیشن کے پاس اپیل کے لیے 20 روز ہیں، آپ انتظار کریں۔
وفاقی حکومت کے وکیل نے عدالت کو بتایا کہ الیکشن کمیشن نے آج 11 بجے اجلاس طلب کر رکھا ہے، الیکشن کمیشن نے عدالتی ہدایت کے مطابق گورنر سے مشاورت کی۔
بعد ازاں عدالت نے الیکشن کمیشن کو اب تک کی پیش رفت رپورٹ جمع کرانے کی ہدایت کردی۔