لاہور: (ویب ڈیسک) منی لانڈرنگ کیس میں سلیمان شہباز کو بے گناہ کرنے کی ایف آئی اے کی رپورٹ سپیشل کورٹ نے مسترد کر دی۔
خصوصی عدالت نے تحریری فیصلہ جاری کرتے ہوئے حکم دیا کہ سلیمان شہباز اور طاہر نقوی بطور ملزم آئندہ سماعت پر پیش ہوں، شہباز شریف اور حمزہ شہباز کے خلاف کچھ نہیں لکھ رہے کیونکہ انہیں پچھلے جج اعجاز اعوان بری کر چکے ہیں۔
تحریری حکم نامے میں سپیشل سینٹرل عدالت نے سلیمان شہباز، طاہر نقوی کو آئندہ سماعت پر بطور ملزم طلب کیا، دونوں کو 50،50 ہزار روپے کے مچلکے جمع کرانے کی بھی ہدایت کی گئی، سلیمان شہباز اور طاہر نقوی کے خلاف مواد موجود ہے، متعلقہ افسران ضروری دستاویزات عدالت میں پیش کریں۔
تحریری فیصلے میں سلیمان شہباز سمیت دیگر ملزمان کے وکلاء کو بریت کی درخواستوں پر دلائل دینے کا کہا گیا ہے، ضمنی چالان میں ایف آئی اے نے سلیمان شہباز اور طاہر نقوی کو ملزم قرار نہیں دیا تھا۔

کراچی: (ویب ڈیسک) سعودی سفیر نواف سعید المالکی نے گورنر ہاؤس سندھ کا دورہ کیا اور گورنر سندھ کامران خان ٹیسوری کو غلاف کعبہ کا حصہ پیش کیا۔
گورنر سندھ کامران خان ٹیسوری نے اس قیمتی اور متبرک تحفے پر سعودی عرب کے سفیر کا شکریہ ادا کیا، انہوں نے کہا کہ خادم حرمین الشریفین کی جانب سے اس مقدس تحفے پر ان کا انتہائی مشکور ہوں۔
گورنر سندھ نے کہا کہ پاکستان میں سعودی عرب کے سفیر نواف سعید المالکی کا گورنر ہاؤس میں استقبال کر کے خوشی ہوئی، دونوں ممالک کے درمیان بہترین برادرانہ تعلقات ہیں، دعا ہے کہ مستقبل میں یہ تعلقات دونوں ممالک کے لوگوں کو فائدہ پہنچاتے ہوئے مزید فروغ پائیں۔

اسلام آباد: (ویب ڈیسک) ملک بھر میں بجلی کے بڑے بریک ڈاؤن کے معاملے پر نیپرا نے 5 رکنی تحقیقاتی کمیٹی تشکیل دے دی۔
ذرائع کے مطابق نیپرا کے سینئر ایڈوائزر کی سربراہی میں کمیٹی تحقیقات کرے گی، تحقیقاتی کمیٹی میں 3 تکنیکی ماہرین کی خدمات حاصل کی گئی ہیں، کمیٹی ایک ماہ میں چیئرمین نیپرا کو رپورٹ پیش کرے گی۔
قائمہ کمیٹی برائے توانائی کی ہدایت پر کمیٹی قائم کی گئی ہے، کمیٹی بریک ڈاؤن کے ذمہ داروں کا تعین کرے گی، تحقیقات کے بعد ذمہ داروں کے خلاف قانونی چارہ جوئی بھی عمل میں لائے جانے کا امکان ہے۔

اسلام آباد: (ویب ڈیسک) پاکستان تحریک انصاف کے سینیٹر شوکت ترین کی پنجاب اور خیبرپختونخوا کے وزراء خزانہ کے ساتھ لیک آڈیو کے معاملے کی ایف آئی اے نے تحقیقات مکمل کر لیں۔
ذرائع کے مطابق تحقیقات کے بعد شوکت ترین کے خلاف قانونی کارروائی شروع کرنے کا فیصلہ کر لیا گیا، ایف آئی اے نے شوکت ترین کے خلاف قانونی کارروائی کیلئے اجازت مانگ لی ہے، سابق وفاقی وزیر خزانہ کی گرفتاری کیلئے وزارت داخلہ سے اجازت مانگی گئی ہے۔
ایف آئی اے کے مطابق شوکت ترین کی گفتگو آئی ایم ایف سے ڈیل کو نقصان پہنچانے کیلئے تھی، وہ قومی مفادات اور سکیورٹی کو نقصان پہنچانا چاہتے تھے، واضح رہے وفاقی حکومت نے شوکت ترین کی لیک آڈیو پر تحقیقات کیلئے معاملہ ایف آئی اے کو بھجوایا تھا۔

اسلام آباد: (ویب ڈیسک) مسلم لیگ (ن) کی چیف آرگنائزر مریم نواز نے کہا ہے کہ جب ملک نااہلوں کے پاس ہوتا ہے تو نواز شریف کو آواز لگاتے ہیں اور جب ملک ٹھیک ہو جاتا ہے تو پھر نکال دیتے ہیں۔
اسلام آباد میں پارٹی کے تنظیمی کنونشن سے خطاب کرتے ہوئے مریم نواز نے کہا کہ سب کو نوازشریف کا سلام، آج صرف کارکنوں سے ملنے آئی ہوں، لندن میں نواز شریف نے کہا تنظیمی کنونشن کرو، مخالفین کو لگا مہنگائی ہے رسپانس نہیں ملے گا، آج وہ دوربین لگا کر بیٹھے ہیں، عوام بیوقوف نہیں سب پتا ہے مہنگائی کو لانے والا کون ہے، گھڑی چور کو چھوڑیں گے نہیں اس پر بات کریں گے۔
مسلم لیگ (ن) کی چیف آرگنائزر نے کہا کہ گزشتہ حکومت میں نیب کے انتقام کو بھگتا، نالائقی، نااہلی کی وجہ سے راول فلائی اوور نہیں بنا سکا، شہباز شریف نے فلائی اوور کو مکمل کیا، شہباز سپیڈ کی وجہ سے منصوبے مکمل ہوئے، موازنہ ہو گا تو شہباز شریف کے 10 اور عمران خان کے خیبرپختونخوا کے 10 سال سے ہو گا، جب معیشت ہچکولے کھاتی ہے تو نواز شریف کو ٹھیک کرنے کیلئے لاتے ہیں۔
مریم نواز نے مزید کہا کہ اسحاق ڈار آئی ایم ایف سے معاہدہ کر رہے ہیں، شہباز شریف، اسحاق ڈار مذاکرات کرنے کے بجائے جو چھپ کر بیٹھا ہے اس کو آئی ایم ایف کے سامنے بٹھاتے، خود تو آرام سے زمان پارک کے بنکر میں بیٹھ گیا، نواز شریف نے آئی ایم ایف معاہدہ پورا کیا تھا لیکن آٹے، چینی کی قیمت نہیں بڑھنے دی، یہ وہی بے حس حکمران تھا جو کہتا تھا پیاز کی قیمتیں کم کرنے نہیں آیا۔
مسلم لیگ (ن) کی رہنما نے کہا بنی گالہ، زمان پارک کا کچن کوئی اور چلاتا ہے، عوام اپنے کچن کو خون پسینے کی کمائی سے چلاتے ہیں، اس مجرم کو عوام کے کٹہرے میں کھڑا کیا جائے، خدا کو گواہ بنا کر کہتی ہوں شہبازشریف، اسحاق ڈار صبح فجر کے بعد کام شروع کرتے ہیں، جو یہ گند مچا کر گیا جلد ٹھیک نہیں ہو گا، یہ اگلے 5 سال پر نظر رکھ کر بیٹھا ہے، اس نے گزشتہ 4 سالوں میں ملک کا بیڑہ غرق کر دیا۔
انہوں نے مزید کہا ہے کہ اس کو اگر اگلے 5 سال مل جاتے تو ملک کا کیا حال ہوتا؟ آج ایوان صدر کی ملاقات کو مان گیا ہے، رات کو چھپ چھپ کر ملتا ہے، اسٹیبلشمنٹ کو کہہ رہا ہے تالی ایک ہاتھ سے نہیں بجتی، اس کا رونا دھونا جاری ہے اس کو تالی بجانے کیلئے دوسرا ہاتھ نہیں مل رہا، اب یہ تالی نہیں بجے گی، کہتا ہے مسلم لیگ الیکشن سے ڈر رہی ہے، سلیکشن والے الیکشن سے ڈرتے ہیں۔
مریم نواز نے کہا کہ سن لو 2018 کی تمہاری سلیکشن کمیٹی اب ٹوٹ گئی ہے، سلیکٹرز گھر چلے گئے اب تمہیں فکر ہونی چاہیے، پرسوں سن رہی تھی کہہ رہے تھے عمران کا گھر جانا ضروری تھا، اب آپ کی کہانی ختم، سلیکشن اور بابا رحمتے ختم، وہ قوم کیلئے بابا زحمت بن گیا، بابا رحمتے نے اس کو سرٹیفکیٹ دیئے تھے، تحفے بیچ کر کھا گیا، جتنے مرضی پلاسٹر چڑھاؤ گھڑی چوری، اولاد کا بھی حساب دینا پڑے گا۔
مسلم لیگ (ن) کی رہنما نے کہا کارکنوں کا جذبہ دیکھ کر میرا جذبہ کوہ ہمالیہ جیسا بلند ہو جاتا ہے، اس دفعہ اسلام آباد کی سیٹ جیت کر دکھانی ہے، ہم نے کمر باندھ لی ہے، نعرے، جھوٹ، پروپگنڈا اور گالی گلوچ کی سیاست چھوڑو، آپ کا مستقبل اس جماعت سے وابستہ ہونا چاہیے جس نے لیپ ٹاپ، سکالر شپس دیئے۔

وزیر آباد: (ویب ڈیسک) امیر جماعت اسلامی سراج الحق نے کہا ہے کہ شہباز شریف صاحب قوم مقروض ہے کیا ایسے میں 85 وزیر چاہئیں، اس بار عوام کی نہیں شہباز شریف کی قربانی چاہئے۔
جماعت اسلامی کا مہنگائی کے خلاف مارچ وزیر آباد پہنچ گیا، امیر جماعت اسلامی سراج الحق نے اللہ والا چوک کے قریب خطاب کرتے ہوئے کہا کہ ہماری حکومت آئے گی تو یہ وزیروں کی فوج ظفر موج نہیں ہو گی، ہمارے ججوں کے پاس انگریزوں کی کتاب نہیں قرآن مجید ہو گا، ہم نوجوانوں کو بے روزگاری الاؤنس دیں گے، پروٹوکول کلچر ختم کریں گے سودی حکومت ختم ہو گی۔
امیر جماعت اسلامی نے کہا کہ پی ڈی ایم اور پی ٹی آئی ملک کی معاشی ابتری کے ذمہ دار ہیں، اللہ نہیں چاہتا اس کا بندہ کفار کے آگے ہاتھ پھیلائے، آج 23 کروڑ عوام کا پاکستان ہے، ان کی قسمت کے فیصلے اسلام آباد نہیں واشنگٹن میں ہوتے ہیں، گندم یہاں کی، چاول، آلو، ٹماٹر یہاں کا لیکن اس کی قیمت کا فیصلہ یہاں نہیں ہوتا۔
انہوں نے کہا کہ حکمران آنیاں جانیاں کرتے ہیں، یہ چابی پر چلتے ہیں، چابی دینے والا امریکہ ہے، اتنا زیادہ قرضہ ان کی پالیسیوں کی وجہ سے چڑھ چکا ہے، عوام پر قرضہ چڑھتا چلا جا رہا ہے صرف ان کی غلط پالیسیوں کی وجہ سے۔ یہاں 80 ملین ایکڑ زمین ہے اس کے باوجود چاول، دال، آٹا کی قیمتیں آسمان سے بات کر رہی ہیں۔
سراج الحق نے کہا کہ حکمرانوں کے کتے، بلیوں کے لئے خوراک فرانس سے آتی ہے، عوام کے بچے بھوکے سوتے ہیں، عوام بچوں کو کھلائیں گے یا پڑھائیں گے؟ یہ مہنگائی اور بیروزگاری ان کی وجہ سے ہے۔
امیر جماعت اسلامی نے کہا کہ انہوں نے آپ کے ملک کو دو لخت کیا ہے بیروزگاری ان کی وجہ سے آئی ہے، پی ڈی ایم اور پی ٹی آئی کی لڑائی صرف کرسی لئے ہے، یہ اپنی پراپرٹیز میں اضافہ کرتے ہیں۔
سراج الحق نے کہا کہ انہوں نے اداروں، بینکوں کو یرغمال بنایا، امریکہ کی یہ غلامی کرتے ہیں، اپنے گلے بچائیے اس بار عوام کو قربانی نہیں دینی چاہئے، ہم آئی ایم ایف کی غلامی نہیں مانتے۔