سعودی عرب: (ویب ڈیسک) تمر یا مینگروو کے جنگلات کی افزائش قدرے نامساعد حالات میں ہوتی ہیں کیونکہ مٹی نمک سے بھری ہوتی ہے جس میں غذائی اجزا نہیں ہوتے اور دیگر مشکلات بھی درپیش ہوتی ہیں۔ اس موقع پر مٹی میں دب کر رہنے والے کیکڑے مٹی میں شامل مفید بیکٹیریا اوپر نیچے کرکے درختوں کو فائدہ پہنچاتے ہیں۔
اس سے قبل ماہرین نے مینگروو جنگلات میں خردبینی اجسام اور مفید بیکٹیریا پر غور نہیں کیا تھا لیکن اب شاہ عبداللہ یونیورسٹی برائے سائنس و ٹیکنالوجی کے سائنسدانوں نے تمر کے جنگلات میں رہنے وال فڈلر کیکڑوں کا تفصیلی مطالعہ کیا ہے جو مٹی میں بل نما گھر بنا کررہتے ہیں اور بار بار اندر اور باہر آتے رہتے ہیں۔ لیکن اس عمل میں وہ مٹی میں موجود قدرتی مفید بیکٹیریا اوپر لاتے رہتے ہیں جنہیں پاکر درخت خوب پھلتے پھولتے ہیں۔
سائنسداں ڈاکٹر مارکو فیوسی کہتے ہیں کہ مینگرووز کاربن ڈائی آکسائیڈ جذب کرنے میں اپنا جواب نہیں رکھتے لیکن ماحولیاتی تبدیلیوں اور عالمی حدت سے ان جنگلات پر منفی اثر پڑ رہا ہے۔
ماہرین نے نوٹ کیا کہ بے چین کیکڑے تمر کے نیچے کی مٹی مسلسل الٹ پلٹ کرتے رہتے ہیں اور یوں ایک انجینیئر کی طرح کا کردار ادا کرتے ہوئے مفید بیکٹیریا اور غذائی اجزا پودوں تک پہنچاتے ہیں۔ دوسری بات یہ ہے کہ یہ مسلسل گڑھے کرکے وہاں آکسیجن جمع ہونے دیےہیں جس کا فائدہ خود تمر کے شجر کو ہوتا ہے۔
بحیرہ احمر (ریڈ سی) میں دس مقامات پر سائنسدانوں نے اس عمل کا مشاہدہ کیا ہے۔ جہاں کیکڑے موجود تھے ان کی مٹی میں کئی اقسام کے ایلفا پروٹوبیکٹیریا اور گیما پروٹوبیکٹیریا نوٹ کیے گئے جو بہت مفید تھے۔ اس علاقے کی مٹی میں فولاد کی کمی ہے اور یہی وجہ ہے کہ کیکڑے نیچے دبی ہوئی فولاد کو اوپر لاتے ہیں۔
دوسری جانب کیکڑوں کی سرگرمی مٹی کو توانا اور بہتر حالت میں بھی رکھتی ہے۔

ٹورنٹو: (ویب ڈیسک) پٹیاں، پھاہے اور بینڈیج طبی دنیا میں عام استعمال ہوتی ہیں لیکن انہیں چپکائے رکھنا یا چپکنے کی صلاحیت کنٹرول کرنا محال ہوتا ہے۔ اب آواز کی لہروں اور باریک بلبلوں کی مدد سے نہ صرف نم دار جلد پر بھی پٹیوں کو چسپاں رکھا جاسکتا ہے بلکہ ان میں چپکنے کی صلاحیت بھی قابو کی جاسکتی ہے۔
یونیورسٹی آف برٹش کولمبیا اور دیگر جامعات کے سائنسدانوں نے یہ ٹیکنالوجی وضع کی ہے جس میں الٹراساؤنڈ اور بلبلوں کی مدد سے نہ صرف پٹیوں میں چپکنے کی صلاحیت کو بڑھانا ممکن ہے بلکہ ضرورت کے لحاظ سے چپکنے والے مادے کی افادیت کم یا زیادہ کی جاسکتی ہے۔
مکِ گِل یونیورسٹی سے وابستہ پروفیسر جیان یاؤ لائی نے کہا کہ اس کی تیاری میں کئی اداروں کے مختلف شعبوں کے ماہرین نے حصہ لیا ہے۔ وہ کہتے ہیں کہ پسینے یا نمی والی جلد پر پٹی بار بار پھسل جاتی ہے۔ اب نئی ٹیکنالوجی انہیں مضبوطی سے ایک جگہ چپکائے رکھتی ہے۔
سائنسدانوں نے دیکھا کہ بینڈیج کی اطراف الٹرا ساؤنڈ ڈال کر اس کے اندر موجود چپکنے والی گوند کو مضبوط بنایا جاسکتا ہے اور وہ جلد یا ٹشوز سے اچھی طرح پیوست ہوجاتی ہے۔
دوسری جانب جرمن ماہرین نے خردبینی بلبلوں کی مدد سے گوند کو مزید مضبوطی سے چپکنے کے قابل بنایا ہے اور اس سے زخم بھرنے کے عمل میں کئی فوائد حاصل ہوسکتے ہیں۔
دونوں ٹیموں نے چوہوں پر اس کے تجربات کیے ہیں جس سے پرامید نتائج برآمد ہوئے ہیں۔ علاوہ ازیں پٹیوں کی گوند کو بلبلوں سے تحریک دے کر ضرورت کے تحت اندر چھپی دوا بھی خارج کی جاسکتی ہے۔ پھر بلبلوں کو کینسر، ٹشو کی مرمت اور درست ترین ادویہ میں بھی استعمال کیا جاسکتا ہے۔